Стих: И ты, отроча́, / проро́к Вы́шняго нарече́шися.
Глаго́ли ми я́вственнейше, / по чему́ позна́ю сие́? / Па́ки ко А́нгелу блаже́ннейший ста́рец рече́: / я́ко ви́диши, испо́лнен бо дний есмь, / Елисаве́т же непло́ды есть: / ка́ко у́бо мне глаго́лы веща́еши па́че естества́? / Удивля́юся, / отню́д не и́стинствующа тя ны́не помышля́ю, / о челове́че, отыди́! / Аз бо лю́дем избавле́ния испроша́ю, / а не отроча́ прия́ти, / вещь неудобоприя́тну.
Стих: Служи́те Ему́ преподо́бием и пра́вдою пред Ним, / вся дни живота́ на́шего.
Бо́га Вседержи́теля Арха́нгел аз есмь, / Гаврии́л мне и́мя, / ста́рцу рече́ безтеле́сный: / и ны́не огло́хни / и молча́нию научи́ся, / не ве́ровав мои́м глаго́лом. / Егда́ же роди́т ти трубу́ Сло́ва сопру́жница, / Ду́ху уясня́ющу твой язы́к, / возопие́ши я́вственнейше: / проро́к Высоча́йшаго назове́шися, о отроча́! / Того́ предугото́вати благода́тию стези́, / я́ко благоволи́.
Слава, глас 6. Самогласен: А́нгел из непло́дных ложе́сн / произше́л еси́, Крести́телю: / от са́мых пеле́н в пусты́ню всели́лся еси́, / печа́ть же всех Проро́́ков показа́лся еси́. / Его́же бо они́ многообра́зно прови́деша / и гада́тельне пропове́даша, / Сего́ крести́ти во Иорда́не удосто́ился еси́. / Глас же услы́шал еси́ Оте́ческий с Небесе́, / свиде́тельствующь Того́ Сыновство́, / и Ду́ха ви́дел еси́ голуби́цы в ви́де, / глас влеки́й на Креща́емаго. / Но, о проро́ков всех вы́шший! / Не преста́й моли́тися о нас, / ве́рно твою́ соверша́ющих па́мять.
И ныне, Богородичен: Никто́же притека́яй к Тебе́, / посра́млен от Тебе́ исхо́дит, / Пречи́стая Богоро́дице Де́во, / но про́сит благода́ти и прие́млет дарова́ние / к поле́зному проше́нию.
Тропарь Предтечи, глас 4:
Пе́рвее неражда́ющая непло́ды, возвесели́ся, / се бо зачала́ еси́ Со́лнца свети́льника я́ве, / просвеща́ти иму́ща всю вселе́нную, слепото́ю неду́гующую. / Лику́й, Заха́рие, вопия́ со дерзнове́нием: / проро́к Вы́шняго есть хотя́й роди́тися.
Слава, и ныне, Богородичен: Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́емь, / и Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.
На повечерии, по Трисвятом, кондак Предтечи, глас 1:
Весели́тся све́тло Заха́рия вели́кий / со всесла́вною Елисаве́тию сопру́жницею, / досто́йно зачина́юще Иоа́нна Предте́чу, / его́же Арха́нгел благовести́, ра́дуяся, / и челове́цы достодо́лжно почти́м, / я́ко таи́нника благода́ти.
На утрени
На Бог Господь: тропарь Предтечи, глас 4: Пе́рвее неражда́ющая непло́ды, возвесели́ся, / се бо зачала́ еси́ Со́лнца свети́льника я́ве, / просвеща́ти иму́ща всю вселе́нную, слепото́ю неду́гующую. / Лику́й, Заха́рие, вопия́ со дерзнове́нием: / проро́к Вы́шняго есть хотя́й роди́тися.
Слава, и ныне, Богородичен: Е́же от ве́ка утае́ное / и А́нгелом несве́домое та́инство, / Тобо́ю, Богоро́дице, су́щим на земли́ яви́ся Бог, / в несли́тном соедине́нии воплоща́емь, / и Крест во́лею нас ра́ди восприи́м, / и́мже воскреси́в первозда́ннаго, / спасе́ от сме́рти ду́ши на́ша.
По 1-м стихословии седален, глас 5. Подобен: Собезначальное Слово:
Елисаве́т непло́дствия свободи́ся, / Де́ва же па́ки Де́ва пребы́сть, / егда́ гла́сом Гаврии́ловым во чре́ве зача́т. / Но во утро́бе предыгра́ет, / и́же во чре́ве де́вственнем Бо́га предуве́дав и Влады́ку, Предте́ча Иоа́нн, / во спасе́ние на́ше воплоща́ема. Дважды.
Слава, и ныне: Ра́дуйся, горо́ свята́я и Богохо́дная; / ра́дуйся, одушевле́нная купино́ и неопа́льная; / ра́дуйся, еди́не к Бо́гу мíра мо́сте, / преводя́щий сме́ртныя к ве́чней жи́зни; / ра́дуйся, нетле́нная Отрокови́це, / неискусому́жно ро́ждшая спасе́ние душ на́ших.
По 2-м стихословии седален, глас 4. Подобен: Скоро предвари:
Го́рлица пустынолю́бная, / свяще́нный Крести́тель, / пропове́давый покая́ние / и яви́вый Христа́, бы́вша Челове́ка, / всех греша́щих роди́ся предста́тель, / всем обурева́емым помоществу́я неотсту́пне. / Того́ мольба́ми, Христе́, спаси́ мiр Твой. Дважды.