Тебе́ припа́даем, Госпоже́, и мо́лимся, / зря́ще пречестну́ю ико́ну Твою́, / сию́ бо и Афо́н ликовству́ет, / име́я во огра́де свое́й зало́г благода́ти Бо́жия, / да вси притека́ющии прие́млют неоску́дно / благопотре́бнаго проше́ния своего́ исполне́ние, / приими́, Влады́чице Всепе́тая, / ве́рных Твои́х раб мольбы́, / честву́ющих пра́здник явле́ния Твоего́, / Ты бо нам на ико́не Свое́й три руки́ яви́ла еси́ / в сла́ву Бо́га на́шего, / Того́ моли́ спасти́ся душа́м на́шим.
Тебе́ припа́дая, мо́лимся, / о Де́во Чи́стая Богоро́дице, / Ма́ти Бо́га на́шего, / ви́дяще ико́ну святу́ю Твою́, / сия́ющую па́че со́лнечных луч, / подае́ши бо ми́лости прося́щим, / скорбя́щим ско́рби облегча́еши, / немощны́м здра́вие да́руеши, / я́ко получи́ исцеле́ние десны́я своея́ руки́ святы́й Иоа́нн Дамаски́н, / е́йже и мы ны́не со умиле́нием, предстоя́ще, мо́лимся / и, любе́зно облобыза́в, глаго́лем: / спаси́ нас, Госпоже́, от гла́да, огня́, меча́ и всех бед, / почита́ющих ве́рно Твое́ явле́ние, / и пода́ждь по́мощь спасти́ся душа́м на́шим.
Сла́ва, и ны́не, глас 6: Днесь, собо́ри ве́рных, соше́дшеся, / восплещи́те рука́ми весе́лия, / духо́вне торжеству́юще день пресла́внаго явле́ния / цельбоно́сныя ико́ны Присноде́вы Чи́стыя Богоро́дицы, / Е́йже мы предстои́м и единогла́сно возопии́м: / ра́дуйся, Преблагослове́нная, / я́ко изображе́нием на ико́не пречи́стых рук Твои́х в Тро́ице Бо́га сла́виши: / ра́дуйся, я́ко еди́ну си́лу и благода́ть в них име́еши; / ра́дуйся, я́ко двема́ рука́ма Сы́на и Го́спода держи́ши, / тре́тиею же от всех напа́стей и бед нас избавля́еши; / ра́дуйся, Засту́пнице на́ша Всенаде́жная ко Христу́ Бо́гу на́шему, / Того́ моли́ спасти́ся душа́м на́шим.
Славосло́вие великое.
Тропа́рь Богоро́дицы, глас 4:
Днесь всемíрная ра́дость возсия́ нам ве́лия: / дарова́ся святе́й Горе́ Афо́нстей / цельбоно́сная Твоя́, Влады́чице Богоро́дице, ико́на, / со изображе́нием тричи́сленно и неразде́льно пречи́стых рук Твои́х / в прославле́ние Святы́я Тро́ицы, / созыва́еши бо ве́рных и моля́щихся Тебе́ о сем позна́ти, / я́ко двема́ Сы́на и Го́спода держи́ши, / тре́тию же яви́ на прибе́жище и покро́в чту́щим Тя, / от вся́ких напа́стей и бед избавля́ти, / да вси, притека́ющии к Тебе́, ве́рою прие́млют неоску́дно от всех зол свобожде́ние, / от враго́в защище́ние, / сего́ ра́ди и мы вку́пе со Афо́ном вопие́м: / ра́дуйся, Благода́тная, Госпо́дь с Тобо́ю.
И отпу́ст.
На литурги́и
Блаже́нны от кано́на, пе́сни 3-я и 6-я, на 8.
Тропа́рь Богоро́дицы, глас 4:
Днесь всемíрная ра́дость возсия́ нам ве́лия: / дарова́ся святе́й Горе́ Афо́нстей / цельбоно́сная Твоя́, Влады́чице Богоро́дице, ико́на, / со изображе́нием тричи́сленно и неразде́льно пречи́стых рук Твои́х / в прославле́ние Святы́я Тро́ицы, / созыва́еши бо ве́рных и моля́щихся Тебе́ о сем позна́ти, / я́ко двема́ Сы́на и Го́спода держи́ши, / тре́тию же яви́ на прибе́жище и покро́в чту́щим Тя, / от вся́ких напа́стей и бед избавля́ти, / да вси, притека́ющии к Тебе́, ве́рою прие́млют неоску́дно от всех зол свобожде́ние, / от враго́в защище́ние, / сего́ ра́ди и мы вку́пе со Афо́ном вопие́м: / ра́дуйся, Благода́тная, Госпо́дь с Тобо́ю.
Кондак Богоро́дицы, глас 8. Подо́бен: Взбра́нной Воево́де:
Днесь весе́лое наста́ ны́не Твое́ торжество́, Богома́ти Пречи́стая, / вси ве́рнии испо́лнишася ра́дости и весе́лия, / я́ко сподо́бльшеся изря́дно воспе́ти / преди́вное явле́ние честна́го о́браза Твоего́ / и ро́ждшагося из Тебе́ Младе́нца, и́стинна же Бо́га, / Его́же двема́ рука́ма объе́млеши, / и тре́тиею от напа́стей и бед нас изыма́еши / и избавля́еши от всех зол и обстоя́ний.
Проки́мен, глас 3, песнь Богоро́дицы: Вели́чит душа́ Моя́ Го́спода, / и возра́довася дух Мой о Бо́зе, Спа́се Мое́м.
Стих: Я́ко призре́ на смире́ние Рабы́ Своея́, се бо отны́не ублажа́т Мя вси ро́ди.
Апо́стол к Филипписи́ем, зача́ло 240 (Флп 2:5–11).
Бра́тие, сие́ да му́дрствуется в вас, е́же и во Христе́ Иису́се. И́же во о́бразе Бо́жии сы́й, не восхище́нием непщева́ бы́ти ра́вен Бо́гу. Но Себе́ ума́лил, зрак раба́ прии́м, в подо́бии челове́честем быв, и о́бразом обре́теся я́коже челове́к. Смири́л Себе́, послушли́в быв да́же до сме́рти, сме́рти же кре́стныя. Те́мже и Бог Его́ превознесе́, и дарова́ Ему́ и́мя, е́же па́че вся́каго и́мене. Да о и́мени Иису́сове вся́ко коле́но поклони́тся Небе́сных, и земны́х, и преиспо́дних. И всяк язы́к испове́сть, я́ко Госпо́дь Иису́с Христо́с, в сла́ву Бо́га Отца́.