Напáстей Ты прило́ги отгоня́еши и страсте́й нахо́ды, Де́во: / те́мже Тя пое́м во вся ве́ки.
Ин. Ирмо́с: Ужасни́ся, боя́йся, Не́бо, / и да подви́жатся основа́ния земли́: / се бо в мертвеце́х вменя́ется в Вы́шних Живы́й / и во Гроб мал странноприе́млется. / Его́же, о́троцы, благослови́те, / свяще́нницы, воспо́йте, / лю́дие, превозноси́те во вся ве́ки.
Припе́в: Святи́и ца́рственнии страстоте́рпцы, моли́те Бо́га о нас.
Егда́ уго́дницы Бо́жии предреко́ша вам путь му́ченический, я́коже Па́влу проро́к Ага́в, / вы, ца́рственнии страстоте́рпцы, не уклони́стеся ни одесну́ю, ни ошу́юю, / но му́жественне проидо́сте его́, / взира́юще на Соверши́теля ве́ры Иису́са Христа́.
Во страда́ниих ва́ших, страстоте́рпцы святи́и, / не отверго́стеся Пути́, И́стины и Живота́, Христа́ Бо́га на́шего, / не устраши́стеся богобо́рцев, / но в терпе́нии ше́ствовасте ца́рским путе́м в жизнь ве́чную.
Благослови́м Отца́ и Сы́на и Свята́го Ду́ха, Го́спода.
Увы́ нам, оте́ческия заве́ты попра́вшим, / от обе́та ве́рности ца́рскому ро́ду, Це́рковию Свято́ю благослове́нному, отсту́пльшим / и та́ко от пути́ Бо́жия отлучи́вшимся. / Прости́ нас, Го́споди, за вся сия́ соде́янная / и поми́луй моли́твами святы́х страстоте́рпец.
И ныне, Богоро́дичен: Засту́пницу на́шу Тя ве́мы, Богоро́дице, / непреста́нно бо о нас мо́лишися, / во е́же пока́ятися и испра́витися нам, упова́ние и прибе́жище душ на́ших.
Хва́лим, благослови́м, покланя́емся Го́сподеви,/ пою́ще и превознося́ще во вся ве́ки.
Катава́сия: О́троки благочести́выя в пещи́ / Рождество́ Богоро́дичо спасло́ есть, / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте дела́ / и превозноси́те Его́ во вся ве́ки.
Песнь 9
Ирмо́с: Вои́стинну Богоро́дицу / Тя испове́дуем, / спасе́ннии Тобо́ю, Де́во чи́стая, / с безпло́тными ли́ки Тя величáюще.
Припе́в: Пресвята́я Богоро́дице, спаси́ нас.
То́ка слез мои́х не отврати́ся, / Я́же от вся́каго лица́ вся́ку сле́зу отъе́мшаго, / Де́во, Христа́ ро́ждшая.
Ра́дости мое́ се́рдце испо́лни, Де́во, / Я́же ра́дости прие́мшая исполне́ние, / грехо́вную печа́ль потребля́ющи.
Пристáнище и предстáтельство к Тебе́ прибегáющих / бу́ди, Де́во, и стена́ неруши́мая, / прибе́жище же и покро́в и весе́лие.
Све́та Твоего́ заря́ми просвети́, Де́во, / мрак неве́дения отгоня́ющи, / благове́рно Богоро́дицу Тя испове́дающих.
На ме́сте озлобле́ния не́мощи смири́вшагося, Де́во, исцели́, / из нездрáвия во здрáвие претворя́ющи.
Ин. Ирмо́с: Не рыда́й Мене́, Ма́ти, / зря́щи во Гро́бе, / Его́же во чре́ве без се́мене зачала́ еси́ Сы́на: / воста́ну бо, и просла́влюся, / и вознесу́ со сла́вою непреста́нно, я́ко Бог, / ве́рою и любо́вию Тя велича́ющия.
Припе́в: Святи́и ца́рственнии страстоте́рпцы, моли́те Бо́га о нас.
Да воскре́снет Русь Свята́я моли́твами ца́рственных страстоте́рпец и новому́ченик Твои́х, Го́споди, / и да расточа́тся вси врази́ ея́ вско́ре, / и от лица́ ея́ да бежа́т вси ненави́дящии ю́ от ны́не и до ве́ка.
Все упова́ние на Го́спода возложи́ держа́вный царь наш. / Та́кожде и мы со упова́нием Го́споду помо́лимся, / да укрепи́т Он моли́твами Богоро́дицы и ца́рственнаго страстоте́рпца страну́ на́шу в Правосла́вии / и спасе́т ду́ши на́ша.
Слава: Я́ко досто́йное пе́ние приими́те, святи́и страстоте́рпцы, ма́лое моле́ние сие́ / и, я́коже Христо́с прия́т вдови́цы две ле́пте, / не возгнуша́йтеся нас, окая́нных, / страстьми́ обурева́емых, убо́гих чти́телей и служи́телей ва́ших.
И ныне, Богоро́дичен: Держа́вным Твои́м покро́вом, Чи́стая, / рабы́ Твоя́ сохрани́ вся невреди́мы: / Тя бо еди́ну и́мамы прибе́жище в ну́ждах, утеше́ние в ско́рбех и побе́ду во бране́х на́ших.
Катава́сия: Всяк земноро́дный / да взыгра́ется, Ду́хом просвеща́емь, / да торжеству́ет же Безпло́тных умо́в естество́, / почита́ющее свяще́нное торжество́ Богома́тере, / и да вопие́т: / ра́дуйся, Всеблаже́нная, / Богоро́дице Чи́стая Присноде́во.
Свети́лен: Невече́рнему Све́ту предстоя́ще, / страстоте́рпцы святи́и ца́рственнии, с му́ченическими ли́ки, / во испыта́ниих не оставля́йте ны моли́твами ва́шими.
Сла́ва, и ны́не, Богоро́дичен: Ро́ждшая Свет Незаходи́мый, / просвеща́ющий седя́щих во тьме неве́дения и пре́лести, / озари́ и нас, гре́шных, све́том Сы́на Твоего́.