Я́ко вели́ка су́щи Цари́ца и Ма́ти / на Небеси́ превысо́ких сил Царя́, / пречи́стыя Твоя́ ру́ки просте́рши, / моле́бно за ны предстои́ши, / и на земли́ я́ко держа́вная Помо́щница / Боже́ственною Твое́ю ико́ною / и ду́хом с Твои́ми рабы́ пребыва́еши / и ве́село спаса́еши, / и избавля́еши от вся́кия напа́сти / благоче́стно Богоро́дицу Тя испове́дающия.
Я́ко златоза́рный рай, / и ме́сто прекра́сное и богопросвеще́нное, / и дре́во свято́е, Ду́хом Святы́м осене́нное, / вмести́лище Све́та невече́рняго, / Тебе́ ве́дущим я́сно немерца́ющися Боже́ственною луче́ю, / Младе́нцем Твои́м све́тиши всей тва́ри. / Его́же моля́щи, Цари́це Богоро́дице, / спаси́ оте́чество и лю́ди, / к Тебе́ прибега́ющия, от всех бед.
Я́ко порфи́рою ца́рскою и ви́ссом, / ико́ною Твое́ю и Твоего́ Сы́на, Богоро́дице, / Це́рковь Бо́жия просвети́вшися, красу́ется чудесы́, / днесь явле́нием вся созыва́ет пра́здновати, / па́че сия́ния со́лнечнаго / благода́тию Свята́го Ду́ха блиста́ющися, / на боля́щих и неду́жных исцеле́ния исто́чники источа́ющи / и всем да́рующи бога́тую ми́лость.
И́ны стихи́ры, глас 8:
Высо́кий Царю́ непостижи́мый, / со Отце́м седя́й на престо́ле и Боже́ственным Ду́хом, / благоволи́вый роди́тися на земли́ / от Де́вы Неискусобра́чныя, Иису́се, / ущедря́я Твое́ созда́ние, / челове́ческое естество́ неизрече́нными добро́тами, / приими́ Твоея́ Ма́тере приноси́мыя Тебе́ за ны моли́твы / и не помяни́ беззако́ний на́ших, / но поми́луй и спаси́ ду́ши на́ша, я́ко Милосе́рд. Дважды.
Преклони́в Небеса́, Царь сла́вы / сни́де обнови́ти Ада́ма, / преступле́нием всего́ истле́вшаго, / всели́ся в Тя, Чи́стая Де́во, и роди́ся, / ключе́й де́вство не руши́в, / и на рука́х Твои́х смире́н Младе́нец, / И́же Арха́нгелов Царь, ноша́шеся. / И ны́не Твою́ моли́тву прие́млет / и проше́ние Твое́ во всем исполня́ет, Богоро́дице, / я́ко Твой Сын и Бог, / Ему́же усе́рдно моли́ся, / да спасе́т ду́ши на́ша, я́ко Милосе́рд.
Па́че ски́нии Моисе́евы, / по о́бразу Небе́сному сотворе́нныя, / всю Тя Бог освяти́, Богоро́дице, Ду́хом Святы́м, / весь всели́вся в Тя, всего́ челове́ка оживи́. / Тем и Твоя́ ико́на, па́че Ааро́ня киво́та, / напо́лнися благода́ти Бо́жия / и источа́ет освяще́ние душа́м и телесе́м, / е́йже любе́зно покланя́ющеся, / про́сим от Тебе́ вели́кия ми́лости, / да спасе́ши ду́ши на́ша, благослове́нная Помо́щнице.
Сла́ва, глас 8: Прииди́те, возра́дуемся держа́вней Засту́пнице ро́да на́шего, / Цари́це Богоро́дице. / Прииди́те, к ти́хому Ея́ чу́дному, почита́емому А́нгелы, / честно́му поклони́мся о́бразу: / да́рует бо Богоро́дица ве́рным оби́льныя да́ры целе́бныя, / от неистощи́маго исто́чника святы́я ико́ны / неоску́дную благода́ть источа́ющи, / тьмы избавля́ет нас искуше́ний, и бед, и вся́каго греха́, / благоче́стно и богоприя́тно прославля́ющих / и чту́щих све́тлую и чу́дную Богома́тере святу́ю ико́ну. / Тем, воспева́юще, воззове́м Первообра́зней: / ра́дуйся, любе́зная мíру по́моще, / во спасе́ние душ на́ших.
И ны́не, догма́тик, гла́са.
Вход. Проки́мен дне и чте́ния.
Бытия́ чте́ние (глава́ 28):
Изы́де Иа́ков от студенца́ кля́твеннаго и и́де в Харра́нь. И обре́те ме́сто, и спа та́мо, за́йде бо со́лнце, и взят от ка́мения ме́ста того́, и положи́ возгла́вие себе́, и спа на ме́сте о́ном, и сон ви́де. И се ле́ствица, утвержде́на на земли́, ея́же глава́ досяза́ше до Небе́с, и А́нгели Бо́жии восхожда́ху и низхожда́ху по ней. Госпо́дь же утвержда́шеся на ней и рече́: Аз Бог Авраа́мов, отца́ твоего́, и Бог Исаа́ков, не бо́йся. Земля́, иде́же ты спи́ши на ней, тебе́ дам ю и се́мени твоему́. И бу́дет се́мя твое́, я́ко песо́к земны́й, и распространи́тся на мо́ре, и ли́ву, и се́вер, и на восто́ки, и возблагословя́тся о тебе́ вся коле́на земна́я и о се́мени твое́м. И се Аз с тобо́ю, сохраня́яй тя на вся́ком пути́, а́може а́ще по́йдеши, и возвращу́ тя в зе́млю сию́, я́ко не и́мам тебе́ оста́вити, до́ндеже сотвори́ти Ми вся, ели́ка глаго́лах тебе́. И воста́ Иа́ков от сна своего́, и рече́: я́ко есть Госпо́дь на ме́сте сем, аз же не ве́дех. И убоя́ся, и рече́: я́ко стра́шно ме́сто сие́, несть сие́, но дом Бо́жий, и сия́ врата́ Небе́сная.