Песнь 8
Ирмос: В пещь о́гненную ко отроко́м евре́йским снизше́дшаго / и пла́мень в ро́су прело́жшаго Бо́га / по́йте, дела́, я́ко Го́спода / и превозноси́те во вся ве́ки.
Припев: Святы́й великому́чениче и целе́бниче Пантелеи́моне, моли́ Бо́га о нас.
Благоприя́тное твоея́ хи́трости душе́вное ослепле́ние о́тчее исцеля́ет, / подаю́щее свет ве́рою, преблаже́нне, притека́ющим / и ко Спа́су Христу́ наставля́ющее.
За Христа́ закла́н быв, к ве́чней жи́зни премину́л еси́ / и Богозва́нен яви́лся еси́ именова́нием Бо́жиим, Богому́дре. / Тем почита́ем тя и превозно́сим Христа́ во ве́ки.
Вити́йское отложи́в лю́тое му́дрых глумле́ние, / Христо́вым призыва́нием боле́зненных страсте́й коре́ния посека́еши, / исцеля́я превознося́щия Христа́ во ве́ки.
Богородичен: Безсме́ртия зарю́ ве́мы исто́чника Тя, Богоро́дице, / я́ко ро́ждшую Сло́во Безсме́ртнаго Отца́, всех сме́рти избавля́ющего, / превознося́щих Его́ во ве́ки.
Ин. Ирмос: О́троки благочести́выя в пещи́ / Рождество́ Богоро́дично спасло́ есть, / тогда́ у́бо образу́емое, / ны́не же де́йствуемое, / вселе́нную всю воздвиза́ет пе́ти Тебе́: / Го́спода по́йте дела́ / и превозноси́те Его́ во вся ве́ки.
Припев: Святы́й великому́чениче и целе́бниче Пантелеи́моне, моли́ Бо́га о нас.
Тя́жкий ка́мень на твою́ вы́ю привяза́ша / и в мо́ре тя вверго́ша нечести́вии, / но ка́мень, а́ки лист, по вода́м пла́ваше, / руково́дством же стра́нным су́ше отдае́шися ты, всече́стне.
Звере́м кровожа́дным люте́йший звере́й вдаде́ тя, страстоте́рпче, / па́ки же к тебе́ Госпо́дь ди́вен яви́ся, / зве́ри бо укроти́ и сих состяза́тися сотвори́, / кто бы из них пе́рвый поклони́лся тебе́ / и твоя́ но́ги облобыза́л, прехва́льне.
Благослови́м Отца́ и Сы́на и Свята́го Ду́ха, Го́спода.
Мно́жества уве́ровавших ви́дя, царь возъяри́ся па́че / и вся зве́ри повеле́ уби́ти, / тебе́ же, великому́чениче, заключи́ти в темни́цу, Тро́ицу во Еди́нице пою́ща: / Го́спода по́йте, дела́, / и превозноси́те Его́ во вся ве́ки.
И ныне, Богородичен: Не премени́в естества́ Иису́с, / из Тебе́ бо во всего́ челове́ка облече́ся, Богороди́тельнице, / Его́же страсть Пантелеи́мон кре́пце изобрази́в, ра́дуяся, пое́т Тому́: / Го́спода по́йте, дела́, / и превозноси́те Его́ во вся ве́ки.
Хва́лим, благослови́м, покланя́емся Го́сподеви,/ пою́ще и превознося́ще во вся ве́ки.
На 9-й песни Честнейшую: не поем, но поем припевы праздника.
Припев: Велича́й, душе́ моя́, / Честне́йшую Го́рних во́инств, / Де́ву Пречи́стую Богоро́дицу.
Таже ирмос канона Пресвятыя Богородицы. Посем вторый лик поет тойже припев и ирмос. Тойже припев поем и к тропарем канона Богородицы.
Песнь 9
Велича́й, душе́ моя́, / Честне́йшую Го́рних во́инств, / Де́ву Пречи́стую Богоро́дицу.
Ирмос: Безнача́льна Роди́теля Сын, Бог и Госпо́дь, / вопло́щся от Де́вы, нам яви́ся, / омраче́нная просвети́ти, собра́ти расточе́нная. / Тем Всепе́тую Богоро́дицу велича́ем.
Велича́й, душе́ моя́, / в страстоте́рпцех пресве́тлаго свети́льника.
Преста́вился еси́, ра́дуяся, к жела́нию коне́чному, / иде́же всели́вcя, преблаже́нне, блаже́нный коне́ц прия́ти вои́стинну сподо́бился еси́, / сый со Влады́кою твои́м во ве́ки безконе́чныя.
Велича́й, душе́ моя́, / безере́бреников похвалу́ и украше́ние.
Жела́ние получи́л еси́ и любве́ твоея́ исполне́ние, / ка́плющей еще́ те́плей кро́ви, за Христа́ излия́вшейся, / от Него́же, ра́дуяся, прия́л еси́ венцы́ по́двигов твои́х.
Велича́й, душе́ моя́, / цели́теля неду́жных, по зва́нии всех ми́лующаго.
Львов уста́ и звере́й зия́ния, я́коже Дании́л дре́вле, ты обузда́л еси́, / весть бо стыде́тися, му́чениче, доброде́тели и безслове́сное естество́. / Те́мже тя, пресла́вне, соше́дшеся, ублажа́ем.
Велича́й, душе́ моя́, / цели́теля неду́жных, по зва́нии всех ми́лующаго.
Бога́тную бла́гость тебе́ Христо́с да́рует, / сокро́вище исцеле́ний нам да́руя / и всеми́лостива изволе́нием тя пода́в вся́кому скорбя́щему, / и приста́нище ти́хое, и предста́теля, и защи́тителя.
Велича́й, душе́ моя́, / Чи́стую Де́ву и Еди́ну Богоро́дицу.
Богородичен: Я́ко руно́, Всенепоро́чная, дождь Небе́сный во утро́бе заче́нши, / нам родила́ еси́ тишину́ Даю́щаго / я́ко Бо́га Того́ пою́щим / и Тя, Всепе́тую Богоро́дицу, пропове́дающим.