Быстроў паволі абышоў свой танк, пагладзіў рукою па шурпатай крутой лабавой брані, сказаў, усміхаючыся, як звычайна, ні то іранічна, ні то кпліва:
— Ну, бывай, дружышча! Не крыўдуй, так сказаць, служба, абавязак! Загадалі, — нічога не зробіш, прыходзіцца расстацца.
Ён са здзіўленнем заўважыў, што на сэрцы стала сумна, як пры развітанні з таварышам. Танк стаяў вялікі, маўклівы, хаваючы канец доўгага хобата-ствала ў галлі старой паўзасохлай вішні. Сонцаў, пачуўшы ў словах Быстрова ноткі засмучонасці, адазваўся шчыра:
— A шкада ўсё-ткі, праўда?
Быстроў ускінуў на плечы мяшок, іранічна з-пад шырокага ілба глянуў на таварыша:
— Шкада, шкада! Сам ледзь не загубіў яго, а таксама шкада. I што гэта з табой? Усе праехалі, i хоць бы што, а ты не здолеў нават па гатовай сцежцы. Зганьбіў сябе дарэшты! Табе б не шкадаваць, а радавацца, што ганьбу сваю жывую пакідаеш тут. Зноў жа без машыны табе спакайней, цяпер не трэба баяцца, што правалішся на мосце... пасажырам будзеш... Пасля таго сораму нават грузавік табе, безумоўна, ніхто не даверыць.
— Хопіць крыўляцца... Я ад душы гавару.
— I я таксама. Але, даволі! Бяры мяшок, вунь нас чакаюць.
— Ну, Саша, пацалуемся на развітанне, — сказаў Быстроў маленькаму, хмурнаму зараджаючаму, што стаяў поруч i нявесела слухаў яго жарты. — Не крыўдуй, што пакідаю. Каб быў я камбрыгам, забраў бы з сабой абавязкова.
Абняўся так, што ў хлопца косці затрашчалі. Развітаўшыся з другімі, Быстроў накіраваўся да грузавіка. Ён падаў таварышам мяшок і, паставіўшы нагу на шыну, лёгка ўзняў на дужых руках сваё моцнае цела. З кузава ён перагнуўся i падаў руку Сонцаву:
— Дай руку, хлапчына, падмагу.
Танкісты, што засталіся ў ранейшай брыгадзе,— большасцю афіцэры, — усеўшыся ў кузаве, перагаворваліся з сержантамі i старшынамі, якія пераходзілі ў новую часць. Апошнія былі незадаволены.
Эх, як не хацелася развітвацца са сваімі таварышамі, камандзірамі, але, што ты зробіш — загад! На лёс, аднак, ніхто не скардзіўся — смутак развітання i крыўду хавалі за жартаўлівымі, таварыскімі воклічамі:
— Быстроў, дружок, пішы лісты! Не забывай.
— Сярожка! Прывітанне гераічнаму тылу.
— Прывітанне франтавікам!
— Глядзі, каб удовы не крыўдзіліся!
— Сонца, не раз'ядайся на тылавых харчах, цябе i так разнесла — глядзець страшна.
— Давай закурым на развітанне, у апошні раз з табою.
— Чаму апошні? Убачымся хутка.
— Калі? У шэсць гадзін вечара пасля вайны?
Жартавалі, як звычайна, а на душы было нявесела.
Аляксей абышоў машыны, у якіх размясцілася рота, нібы правяраючы, ці ўсё гатова да выезду. Правяраць, праўда, не было чаго, але такая ўжо ў яго ўкаранілася звычка — прайсціся па роце перад маршам. Цяпер, калі танкісты размясціліся ў грузавіках, больш чым калі-небудзь кідалася ў вочы, як ix мала. Без танкаў яны здаваліся вельмі мірнымі.
«I з гэтай жменькай мы рабілі столькі страху ворагу! — акінуўшы ix з нейкай новай, асаблівай пашанай, падумаў мімаволі Аляксей. — Тут кожны пяцярых варты».
Ён падышоў да машыны, дзе сядзела некалькі сержантаў.
— Выгляд ваш не падабаецца мне, хлопцы, — сказаў ён. — У кузаве драўляным, з мяшочкамі, як шафёры. Гвардыя мы ці не гвардыя? — запытаў Аляксей усміхаючыся. Гэта былі любімыя словы камандзіра брыгады, якія часта паўтаралі салдаты. Словы гэтыя сталі брыгаднай прымаўкай.
Сонцаў, не задумваючыся, шчыра адказаў:
— Гвардыя, таварыш старшы лейтэнант!
— Пасажыры бясплатныя, — з іроніяй адгукнуўся Быстроў.
— Ну, гэта часова. Ездзіць пасажырамі нам, Быстроў, відаць, не дадуць, — адказаў Аляксей.
Ён не скончыў. Пярэднія машыны батальёна крануліся. Старшы лейтэнант спяшаючыся развітаўся з экіпажамі, што заставаліся тут, пайшоў да свайго грузавіка i сеў у кабіну.
— Бывайце, таварышы! Шчасліва ваяваць! — крыкнуў ён напаследак, махаючы рукою.
Грузавік крануўся. Ветравое шкло з боку Аляксея было прабіта куляю; ад маленькага кружка ва ўсе бакі на паўшыбы веерам разбягаліся праменні. Машыны хутка мінулі хаты маўклівай вёскі i выехалі ў поле. У Аляксея на душы было сумна i неяк пуста пасля расставання. «Без машын i без салдат... Так зжыліся, i вось прышлося разысціся!»