В путь узкий хождшии прискорбный, вси в житии крест яко ярем вземшии, и Мне последовавши верою, приидите, насладитеся, ихже уготовах вам почестей и венцев небесных. Благословен еси…
Образ есмь неизреченныя Твоея славы, аще и язвы ношу прегрешений: ущедри Твое создание, Владыко, и очисти Твоим благоутробием, и вожделенное отечество подаждь ми, рая паки жителя мя сотворяя. Благословен еси…
Древле убо от не сущих создавый мя, и образом Твоим Божественным почтый, преступлением же заповеди паки мя возвративый в землю, от нея же взят бых, на еже по подобию возведи, древнею добротою возобразитися. Благословен еси…
Упокой, Боже, раба Твоего (или: рабу Твою; или: раб Твоих) и учини его (или: ея, или: их) в рай, идеже лицы святых, Господи, и праведницы сияют, яко светила, усопшаго раба Твоего (или: рабу Твою, или: раб Твоих) упокой: презирая его (или: ея, или: их) вся согрешения.
Слава: Трисиятельное единаго Божества благочестно поем вопиюще: свят еси, Отче Безначальный, Собезначальный Сыне и Божественный Душе: просвети нас верою Тебе служащих, и вечнаго огня исхити.
И ныне: Радуйся, Чистая, Бога плотию рождшая во спасение всех. Еюже род человеческий обрете спасение, Тобою да обрящем рай, Богородице чистая, благословенная. Аллилуиа (трижды).
Посем ектения: Паки и паки…
Еще молимся о упокоении души усопшаго раба Божия (или: усопшия рабы Божия, или: усопших рабов Божиих) (имярек), и о еже проститися ему (ей, им) всякому прегрешению вольному же и невольному.
Яко да Господь Бог учинит душу его (ея или их), идеже праведнии упокояются.
Милости Божия, Царства небеснаго, и оставления грехов его (ея, их), у Христа бессмертнаго Царя и Бога нашего просим.
Молитва
Боже духов и всякия плоти, смерть поправый и диавола упразднивый, и живот миру Твоему даровавый; сам, Господи, упокой душуусопшаго раба Твоего (усопшия рабы Твоея, или усопших раб Твоих) (имярек) в месте светле, в месте злачне, в месте покойне, отнюдуже отбеже болезнь, печаль и воздыхание. Всякое согрешение, содеянное им (ею, или: ими), словом, или делом, или помышлением, яко благ и человеколюбец Бог прости. Яко несть человек, иже жив будет и не согрешит. Ты бо един кроме греха, правда Твоя, правда во веки, и слово Твое истина.
Возглас: Яко Ты еси воскресение и живот и покой усопших раб Твоих…
Посем седален, гл. 5
Покой, Спасе наш с праведными рабы Твоя, и сия всели во дворы Твоя, якоже есть писано, презирая яко Благ, прегрешения их вольная и невольная, и вся яже в ведении и не в ведении, Человеколюбче.
Слава, и ныне: От Девы возсиявый миру, Христе Боже, сыны света Тою показавый, помилуй нас.
И песни канона с припевами: Упокой, Господи, души усопших раб Твоих (усопшаго раба Твоего, или усопшия рабы Твоея).
Песнь З-Я: Несть свят, якоже Ты, Господи Боже мой, вознесый рог верных Твоих, Блаже, и утвердивый нас на камени исповедания Твоего.
Пли: Небеснаго круга Верхотворче, Господи, и Церкве Зиждителю, Ты мене утверди в любви Твоей, желаний краю, верных утверждение, едине Человеколюбче.
Песнь 6-я: Житейское море, воздвизаемое зря напастей бурею, к тихому пристанищу Твоему притек, вопию Ти: возведи от тли живот мой, Многомилостиво.
Пли: Молитву пролию ко Господу, и Тому возвещу печали моя, яко зол душа моя исполнися, и живот мой аду приближися, и молюся яко Иона: от тли, Боже, возведи мя.
Кондак, гл. 8: Со святыми упокой, Христе, душу раба Твоего (душу рабы Твоея / души раб Твоих), идеже несть болезнь, ни печаль, ни воздыхание, но жизнь бесконечная.
Икос: Сам Един еси бессмертный, сотворивый и создавый человека: земнии убо от земли создахомся, и в землю туюжде пойдем, якоже повелел еси, создавый мя и рекий ми: яко земля еси и в землю отъидеши, таможе вся человецы пойдем, надгробное рыдание творяще песнь: аллилуиа.
Песнь 9-я: Бога человеком невозможно видети, на Него же не смеют чини Ангельстии взирати: Тобою бо Всечистая явися человеком Слово воплощенно, Егоже величающе, с небесными вой, Тя ублажаем.
Пли: Ужасеся о сем небо, и земли удивишася концы, яко Бог явися человеком плотски, и чрево Твое бысть пространнейше небес. Тем Тя Богородицу Ангелов и человек чиноначалия величают.