Слава и ныне, предпразднству или Богородичен По 2-м стихословии седален, глас 5-й:
Божественною силою укрепляем, победил еси невидимых врагов искушения и к свету невечернему приближился еси. Уврачуй и душ наших страсти и светом твоим облистай ны, яко врач и утешитель всем от Бога дан еси, Иоанне отче наш.
Слава и ныне, предпразднству или Богородичен
Седален по полиелеи, глас 8-й:
Слова Божия пламенный служителю, Иоанне Богодухновенне, ты вместилище веры Христовой был еси, сего ради Господь, якоже новаго Авраама, отца многих постави тя. Моли убо, отче святый, всем нам чадом Божиим быти и душам нашим спастися.
Слава и ныне, предпразднству или Богородичен
По 50-м псалме — самогласен, глас 6-й:
Преподобие отче Иоанне, во всю землю изыде вещание исправлений твоих: тем на Небесех обрел еси мзду трудов твоих, демонские погубил еси полки и ангельския достигл еси чины, ихже житию без порока и поревновал еси, дерзновение имея ко Христу Богу, мир испроси душам нашим.
КАНОН Святаго — по Уставу, его же краестрочие:
МОЯ ЖИЗНЬ ВО ХРИСТЕ, ЕМУ ЖЕ ПОЮ ВО ВСЯ ВЕКИ
Глас 4-й
Песнь 1-я
Ирмос: Моря Чермнаго пучину немокренными стопами, древле шествовав Израиль, крестообразно Моисвоеыма рукама Амаликову силу в пустыни победил есть.
М Моя чувствования в Тебе утверди, Спасителю мой, да возмогу достойне воспети молитвы и подвиги Тя возлюбльшаго и Тобою возлюбленнаго служителя Твоего, отца нашего Иоанна.
О От юности Первозванному апостолу последуя и его светосиянным Крестом озарився, неведения мглы избегл еси, Христу хвалебную песнь воспева блаженне.
Я Якоже Илия колесницею огненною, тако и ты колесницею добродетелей на Небо взошел еси. Отнюду же ниспослати и нам жития исправление Господа умоли.
Богородичен:
Ж Жезл прорасте, Дево, от корене Иессвоеа, цветоносяй всеблаженный Плод спасения верою воспеващим Тя.
Песнь 3-я
Ирмос: Веселится о Тебе Церковь Твоя, Христе, зовущи, Ты ми крепость, Господи, и прибежище, и утверждение.
И И нравом причастник, и житием подражатель апостолом быв, Богодухновенне, слово истины до конца исправил еси.
З Зрительно Царства Небеснаго душевное око твое, яко чисто, имея жизнь твою святе управил еси, отче предивный, сего ради о Бозе тя прославляем.
Ныне трудящийся да не яст, сию апостольскую истину всей братии твоей вещал еси, и Дом Трудолюбия нищим и болящим воздвигл еси, да ся питают трудами рук своих, аще и немощни суть.
Богородичен:
В Вся свет еси, Владычице, вся святыня, вся благость, вся — премудрость, вся можеши, яко Мати Всемогущаго, Едина и Та же Всесовершенная, яко Мати Всесовершеннаго Царя славы.
Песнь 4-я
Ирмос: Воздвижена Тя видевши Церковь на Кресте, Солнце праведное, ста в чину своем, достойно взывающи: слава силе Твоей, Господи.
О Основание твердо — Христа имея, вторый Авраам был еси, приемля от всех стран приходящия к тебе, и тех ко Господу приводил еси, и теми угодная Богу творил еси.
Х Храм Богу сердце твое хотяй устроити, в дому Божием непрестанно служити возжелел еси и тамо небесныя доброты зрел еси.
Р Росою подвигов твоих вся страсти телесныя угасив, возжегл еси просвещение безстрастия и сын вечнаго дне был еси, отче блаженне.
И И нам подаждь, Владычице, чистоту сердечную, сыновнюю доверчивость и любовь, яже к Тебе, — всегда, и ныне и присно и во веки.
Песнь 5-я
Ирмос: Ты, Господи, ми свет, в мир пришел еси, Свет Святый, обращаяй из мрачна неведения верою воспевающия Тя.
С Сподобился еси вышних дарований, отче, Господу твоему непрестанно служа и апостольские труды присно подражая.
Т Тленныя твоея плоти сладострастие умертвив, душу нетленную благочестием оживил еси, и сию дом Духа Божественна сотворил еси.
Е Евангелие Христово всем усердно проповедуя, Трапезы Господней причастник повседневный был еси, сам себе и паству твою, яко жертву живу и святу Богови устрояя.
Богородичен:
Е Едина от Троицы родила еси Пречистая, милосердия ради на земли Явльшагося во двою естеству, Егоже непрестанно моли спасти души наша.