Псалом 99.
Воскликните Богови вся земля; работайте Господеви в веселiи, внидите пред ним в радости. Уведите, яко Господь той eсть Бог наш; той сотвори нас, а не мы; мы же людiе eго и oвцы пажити eго. Внидите во врата eго во исповеданiи, во дворы eго в пенiих; исповедайтеся eму, хвалите имя eго. Яко благ Господь, в век милость eго, и даже до рода и рода истина eго.
Псалом 100.
Милость и суд воспою тебе, Господи; пою и разумею в пути непорочне; когда прiидеши ко мне? прехождах в незлобiи сердца моего посреде дому моего. Не предлагах пред oчима моима вещь законопреступную; творящыя преступленiе возненавидех. не прильпе мне сердце строптиво; уклоняющагося от менe лукаваго не познах. Оклеветающаго тай искренняго своего, сего изгонях; гордым oком и несытым сердцем, с сим не ядях. Oчи мои на верныя земли, посаждати я со мною; ходяй по пути непорочну, сей ми служаше. Не живяше посреде дому моего творяй гордыню; глаголяй неправeдная не исправляше пред oчима моима. Воутрiя избивах вся грешныя земли, eже потребити от града Господня вся делающыя беззаконiе.