Исповемыся тебе, Боже, исповемыся тебе и призовем имя твое; повем вся чудеса твоя. Егда прiиму время, аз правоты возсужду. Растаяся земля и вси живущiи на ней, аз утвердих столпы eя. Рех беззаконнующым, не беззаконнуйте; и согрешающым, не возносите рога. Не воздвизайте на высоту рога вашего и не глаголите на Бога неправду; яко ниже от исход, ниже и запад, ниже от пустых гор. Яко Бог судiя eсть; сего смиряет, и сего возносит. Яко чаша в руце Господни, вiна нерастворена исполнь растворенiя, и уклони от сея в сiю; oбаче дрождiе eго не истощися, испiют вси грешнiи земли. Аз же возрадуюся в век, воспою Богу iаковлю; и вся роги грешных сломлю, и вознесется рог праведнаго.
Псалом 75.
Ведом во iудеи Бог; во Израили велiе имя eго. И бысть в мире место eго, и жилище eго в Сiоне. Тамо сокруши крепости луков, oружiе и мечь и брань. Просвещаеши ты дивно от гор вечных. Смятошася вси неразумнiи сердцем; уснуша сном своим, и ничтоже обретоша вси мужiе богатства в руках своих. От запрещенiя твоего, Боже iаковль, воздремаша вседшiи на кони. Ты страшен eси, и кто противостанет тебе? оттоле гнев твой. С небесе слышан сотворил eси суд; земля убояся и умолча, внегда востати на суд Богу, спасти вся кроткiя земли. Яко помышленiе человеческое исповестся тебе, и останок помышленiя празднует ти. Помолитеся и воздадите Господеви Богу нашему; вси, иже окрест eго, принесут дары страшному и отемлющему духи князей, страшному паче царей земных.