Мудростию украшен и разумом просвещен, смирением сердца лепотствуя, высотою жития сияя, к мысленным прешел еси двором, идеже нас поминаеши, почитающих тя, Всеволоде.
День празднественный и пользы ходатайственный честный твой совершаем от земли преставления: ты бо Господень угодник и Того заповедей делатель явился еси непостыден, досточудне Всеволоде.
Богородичен: Света приятелище утроба Твоя бысть, просвещшаго мир, Богорадованная. Темже молю Тя, окаянный: светлу зарю подаждь ми, Богоневесто, мольбами Всеволода Богомудраго.
Божественною благодатию просветився, и по смерти показал еси светлость жития твоего: источаеши мирови благодать, притекающим к раке мощей твоих, всеблаженне Гаврииле, и моли спастися чтущим тя.
Канон второй святому благоверному князю Всеволоду
глас 4
Ирмос: Несть Тебе подобен препрославленный Господи: рукою бо крепкою избавил еси люди, яже стяжал еси, Человеколюбче.
Припев (при келейном чтении): Святый благоверный княже Всеволоде, моли Бога о нас.
Несмь подобен, како воспети от части Небесному Воеводе тезоименитаго великаго князя Всеволода, возсиявша в словянех насельшихся, идеже первозванный во апостолех жезл водрузи.
В лета великаго князя Владимира царскою диадимою от Мономаха честно почтен, возсияв, первому же великому Владимиру подражав, яко от корене их честна ветвь израсл еси.
Царя Небеснаго, славима в Троице, из млада явился еси сосуд чист и непорочен. Емуже ныне предстоя дерзновенно, о нас помолися, блаженне княже Гаврииле.
Богородичен: Чистую Тя и непорочную Архангел Гавриил яко узре, радуйся, Тебе, Владычице, светло возопи, Неискусобрачная, человеком спасение, князем и царем похвала и честнословие.
Ирмос: Не мудростию, и силою, и богатством хвалимся, но Тобою, Отчею Ипостасною мудростию, Христе: несть бо свят, паче Тебе, Человеколюбче.
Славнаго страстотерпца Георгия храм и обитель пречестну со блаженным Кириаком воздвигл еси, и в ней множество инок о тебе, Богомудре, хвалятся и мольбу Богови приносят.
Бориса, целомудраго прародителя своего, поревновав, законное сочетание, якоже великий Моисей и Исаия иместа, Боговидения сподобистася, терпением до конца блаженство и Божие благословение получиша.
Всея России великая княгиня Богомудрая Ольга виде трисолнечныя лучи, сияюща на усть Плесковы, назнаменуя град и храм Пресвятыя Троицы, в нем бо и ты, досточудне, чудеса содея, с неюже о нас молися.
Богородичен: Сказуя еже древле сокровенное таинство, Отроковице, Тебе иногда Гавриил, взывая: радуйся, Божия палато, в тоже вселився, вся человеки обожил есть, яко Милосерд.
Имущи Дух истинный, премудре, иже в тебе пожил есть, сосуд и жилище Пресвятей Троице содела, строити и соблюдати церквам благолепие и утверждение. Сего ради и мы, сошедшеся в память твою, Богомудре Гаврииле, молим тя: Христови молися даровати нам велию милость.
Ирмос: Неизследный Божий совет, еже от Девы воплощения Тебе, Вышняго, пророк Аввакум усмотряя, зовяше: слава силе Твоей, Господи.
По благословению архиерея со отцем своим, Богомудре, подвигшеся, мног труд показаша, великий Новград многомудренно соделаста на утверждение верою зовущим: слава силе Твоей, Господи.
Епископа великаго Новаграда священием церковь многочудну великому Иоанну Предтечи в память сыну твоему, премудре Гаврииле, воздвигл еси, с нимже поя: слава силе Твоей, Господи.
Геннадия Патриарха Богословию последовал еси, Богомудре Гаврииле, Триипостаснаго Существа в собствех, Отца, и Сына, и Святаго Духа, во Едином Божестве покланяема быти, веровав, Емуже с ним поя: слава силе Твоей, Господи.
Богородичен: Всю Тя, Духом Гавриил очиствованну, Всенепорочная, разумев, вопиет Ти явственно: о, радуйся, клятвы избавление и праотцев воззвание!
Ирмос: Ныне востану, пророчески рече Бог, ныне прославлюся, ныне вознесуся, падшаго прием от Девы, и к свету умному возносяй Моего Божества.
Пскова града и ладожане, избраннии людие, призвани новогородскими мужи, умыслившими на изгнание твое, святе, совет их развергоша, возвратиша тя, радостию мир подающа.
Рукою твоею честною написав, премудре Гаврииле, твоего строения великаго Иоанна Крестителя церкви, пребогатое твоего праведнаго даяния законоположение вечно, мир всем даруя.