На́ дар, со ту пхурёс: ту бияндлы́,
Коли́ сыс гожыпна́скри хась мулы́.
Сонэто 105
Кама́м ла на сыр дэвэлня́ савья́,
Ико́на на кэра́ва мрэ камля́тыр,
Мэк мрэ, ґалёв, сарэ́ бага́н гиля́ –
Ваш ла́кэ, ла, пал ла́тэ, ла́са, ла́тыр.
Лачи́ ададывэ́с, сыр атася́,
Дро кучипэ́н учё на парудёла,
Паладава́ мири́ гилы́ — уса́
екхэ́са камлыпна́са сыкадёла.
Шука́р, лачи́, жужы́ — уса́ бага́ва,
Жужы́, шука́р, лачи́ — ваврэ́ лавэ́нца;
Трин мо́лы на тринэ́н — екха́ кхара́ва,
Фэды́р мэ на латхьём сарэ́ зорьенца.
Лачи́, Жужы́, Шука́р — бут да́савьен,
Екха́ мирья́ сыр «трин дро екх» кхарэ́н.
Сонэто 106
Коли́ прэ пуранэ́ лыла́ дыкха́ва
Годявирэ́ лава́ пал одова́,
Савэ́ ґара́ сыс гожыпэ́н и сла́ва,
Таґа́рья, шукарня́… — кана́ тхува́.
Пхурэ джиндлэ́, кай тэ латхэ́н э зор,
Васт, муй, якх, вушт — про лыл соб тэ дживэ́н;
Сыс лэ́ндэ да ракирибны́тко пор,
Соб тро шукарипэ́н тэ сыкавэ́н.
Ёнэ́ пхэндлэ́, со ту явэ́са, сыр
Шука́р суно́. — Кана́ сан паш амэ́ндэ,
Нэ на дыкхэ́нас тут, сави́ шуки́р,
Соб тэ збага́н зорья́са, со сыс лэ́ндэ.
Сан акана́ ту, сыр пхурэ́ дыкхнэ́,
Нэ дрэ чиба́ амэ́ндэ зор нанэ́.
Сонэто 107
Мри дар, сыр о Барэ Свэто́скро ди́,
Дыкхи́ хор дро бэрша́, сывэ́ явэ́на,
Дро кан на пхэ́нла ма́нгэ англэды́р,
Коли́ мро камлыпэ́н бэрша́ чёрэ́на.
Бут мо́лы чён хасёлас прэ якха́,
Тэ дылынэ́ раша́ ивья́ ровэ́нас,
Нэ зэлэнёна санорэ́ рукха́,
Соб дурэды́р сарэ́ дужакирэ́нас.
Бэрша́ тэрнякирэ́на камлыпэ́н,
О мэрибэ́н дро васт мэ тасава́ва:
Мэ ачядём ман дро багаибэ́н, –
О билылэ́нгрэ нашавэ́на сла́ва.
Хасёла таґари́тко барипэ́н,
Гилы́ ж ячела дро рипирибэ́н.
Сонэто 108
Со мри годы́ илэ́скэ роспхэнэ́ла,
Коли́ тут на джинэ́ла, сыр ило́?
Мро камлыпэ́н нэвэ́с посыкавэ́ла,
Или тыро́ ило́ патывало́?
Ничи́, мро гудлыпэ́н. Мэ со дывэ́с
Сыр бы моли́тва тукэ бичява́в:
«Мэ сом тыро́, ту сан мири́», — нэвэ́с,
Сыр пэ́рво мо́ло ушундём тро лав.
Коли́ о камлыпэ́н нэвэ́с явья́,
О пра́хо про ґэра́ на притырдэ́лас,
О штэ́то вашэ бры́нды на дэя́,
О пхурипэ́н робо́са рикирэ́лас.
Сыр бияндя́пэ камлыпэ́н — барьёла,
Кай бэрш тэрдо́, кай о ило́ дыксёла.
Сонэто 109
Ман на́ кхар николи́ «банго́ ило́»,
Мэк бимиро́ адя́кэ сыкадёла;
Нашты́, соб ма́ндыр тэ джива́в нашло́,
Э дёстыр, со дро тро колы́н пасёла.
Тыро́ колы́н мрэ дёскэ — кхэр ячья́,
Сарэ дромэ́ндыр рисёва́в палэ́;
На парудёмпэ (бэрш парудыя́),
Сыр на́бут, — ваш доша́ мрэ мэлалэ́
Паны́ яндём. На сом «банго́ ило́»,
Мэк сарэ грэ́хи дро мро рат латхьём,
На сом адя́кэ напатывало́,
Соб ваш ничи́ саро́ мэ чюрдэём.
Ничи́ ваш ма́нгэ — свэ́то да баро́,
Ра́кх пэс, мри ро́за, кай саро́ миро́.
Сонэто 110
Чячё, чячё! Ада́й-одо́й псирдём,
Дылнякирдём ваврэ́н дылынэ́ мо́са.
Мри куч годы́ мэ на́куч бикиндём,
Камьём: пхурья́ — ґэра́са, нэвя́ — дёса.
Буты́р чячё! Дыкха́вас чячипэ́н
Бангэ́ якхэ́нца: нэ фэды́р сарэ́ндыр,
Со налатхьём вави́р мро тэрныпэ́н:
Тыро́ ило́ — машки́р бутэ́ ваврэ́ндэ.
Саро́ скэрдо́! Прэ ачядэ́ бэрша́
Мри бокх на ла́ва тэ росхачкира́в,
Тут на чюрда́ва ваш нэвэ́ доша́,
Мри дэ́вэлны, мэ тукэ пэс отда́в.
Прилэ́ ман, кай сы болыбэ́н миро́,
Дава́ сы: прэ шука́р колы́н тыро́.
Сонэто 111
Ту сан мирэ́ Судьба́са прэ чюрья́!
Дрэ мрэ доша́ — да дэвэлны́ банги́,
Ёй на фэды́р дром ма́нгэ сыкадя́,
Сыр свэ́то, со дыя́ зуми́ нанги́.
Нэ попэём: мро лав сы про чека́т.
Со тэ кэра́в? Бутя́кэ мэ подда́впэ,
Сыр о котля́ри: лэс выдэ́ла гад.
Пожа́линэ ту ман — нэвякира́впэ.
Сыр пацыенто, ла́ва тэ пия́в
Драба́, соб мро насвалыпэ́н традэ́нас,
Со киркипэ́н — кирко́, на сыкава́в,
Буты́р дукх дэ́на, соб мишто́ кэрэ́нас.
Пожа́линэ ту ман, мэ совлаха́ва:
Тырэ́ илэ́са высастякира́ва.
Сонэто 112
Тро камлыпэ́н э дукх ковлэ́с злыя́,
Сави́ о свэ́то задыя́ ладжя́са;
На ха́ла ман, со ёв патя́ндыя,
Коли́ ту ман про лачё дром лыджя́са.