Ту — свэ́тыцо миро́, напарудэ́
Чяче лава́ шуна́в тырэ́ чибатыр,
Сарэ́ ваврэ́ ваш ма́нгэ — на джидэ́,
Мэ закэрдём миро́ колы́н дукха́тыр.
Свэто́стыр сы ракхнэ́ мирэ́ кана́:
Кошэ́на ль ман, шарэ́на ль — на шуна́ва
Ваврэ́нгирэ глоса́ мэ акана́.
Ды́кх, со, прэ ладж дыкхи́, мэ выкэда́ва:
Ту акадя́кэ ма́ндэ дро ило́,
Со саро свэ́то сыр бы сы муло́.
Сонэто 113
Сыр битыро́, якха́ — дро мро ило́,
На одолэ́, со дром, хай, сыкавэ́на,
На кэ́рна одолэ́, со припхэндло́,
Дыкхи́, пиро́ чячё — и на дыкхэ́на.
Ёнэ́ родэ́н илэ́стыр три патри́н,
Кай чирикло́, кай цвэ́то — на полэ́на:
Илэ́скэ лэ́ндыр — саво про́ко сын?
Ничи́, со сы дыкхно́ на ухтылэ́на:
Со на́шукар, со сы шука́р чячес,
Со сы дрэва́н кирно́, со го́жо сын:
Мэк о паны́, мэк бэ́рга, рат-дывэ́с –
Саекх дыкхэ́на три гудлы́ патри́н.
Нашты́ буты́р: ило́ пирда́л дукха́
Сунэ́нца хохавэ́ла мрэ якха́.
Сонэто 114
Тэлэ́ коро́на камлыпна́скири
Чёрдэ́ ли мри годы́ шарибэна́?
Мишто́ дыкхэ́ла ка́жно якх мири́,
Нэ уджиндя́ драбакирибэна́?
Трэ камлыпна́стыр ёй лачякирэ́ла
Пфуй джидыпэ́н, сыр а́нгело шука́р,
Со на́лачё — жужо́ ёй сыкавэ́ла,
Сыр попэрэ́ла дрэ вэсны́тко бар.
Мири́ годы адя́кэ матькирэ́на,
Нэ бахтало́ сом дро матвалыпэ́н,
Мирэ́ якха́ годя́кэ служынэ́на:
Хохаибэ́н ваш лэ́нгэ кэравэ́н.
Ада драба́ ячена гудлэды́р,
Сыр мрэ якха́ лэн пьена англэды́р.
Сонэто 115
Мэ хохадём тут дрэ мирэ гиля́,
Со тут буты́р, сыр мэ камьём, нашты́,
На сыс пхэрдэ́ сарэ мрэ совэля́,
Кана́ буты́р хачки́рла яг таты́.
Бэрша́ саро́ про свэ́то парувэ́на,
Пхаги́рна совэля́ и таґарьен,
Шукарипэ́н, йо лав чячё чёрэ́на,
Годы про дром бандякирдо́ чюрдэ́н.
Дари́ ада зорья́тыр, акана́
Пхэна́ва, со кама́м кана́ буты́р,
Патя́ва екх дро паруибэна́,
Ада дывэ́с буты́р сы, сыр вави́р.
Сыс камлыпэ́н миро́, сыр о тыкно́,
Кана́ сарэ́са куч выбарино́.
Сонэто 116
Нашты́ тэ пхагира́в о бья́в тыро́
ваврэ́са. Камлыпэ́н на парудёла,
Паруибэ́н лэс на мэкэ́л псиро́,
Нашля́са на нашэ́ла, отджидёла.
Нат! Камлыпэ́н сы ракхибны́тко яг,
Лыджя́ла пирэ вьюги и ракхэ́ла.
Сыр э черґэ́н, о болыбны́тко якх,
Чячё дром пиро мо́рё сыкавэ́ла.
О камлыпэ́н нанэ́ бэрша, — ёнэ́
Чёрэ́на ро́зы тэрнорэ́ муендыр;
Нанэ́ ратя́ матэ́ совнакунэ́,
Коли́ ж дживэ́ла буты́р шэлбэршэ́ндыр.
Сыр мри гилы́ на пхэ́нла чячипэ́н,
Нанэ́ гилы́, нанэ́ о камлыпэ́н.
Сонэто 117
Ко́ш ман адя́кэ: саро́ нашадём,
Ничи́-ничи́ на плэскирдём палэ́;
Ко камлыпэ́н о дром забистырдём,
Мэк туса дывэса́ лаче спхандлэ́;
Мэ нашава́вас о бэрша́ ваврэ́нца,
Тырэ́ куч дывэса́-ратя́ чёрдём;
Мэ лыджиёмпэ сарэ́ балваленца,
Собы аври́ якхэ́ндыр хасиём.
Ги́н пирэ ангушта́ мирэ́ доша́,
Ги́н процэнтэ́нца, ги́н сарэ́ дукха́са,
Соб мэ, камлы́, ман туса тэ коша́в, –
Нэ на́ дыкх адалэ́ киркэ́ холя́са.
Коли́ и сыр кошэ́са, ґалёва́ва,
Со ман камэ́с, со тукэ мэ патя́ва.
Сонэто 118
Сыр бы э бокх фэды́р росхачкира́сас,
Тало́й хачки́рла сано́ киркипэ́н;
Сыр бы насвалыпэ́н криг протрада́сас,
Коли́ киркэ драба састякирэ́н.
Пхэрдо́ мэ сомас тырэ́ гудлыпна́са,
Мрэ киркэ думы чяляки́рнас ман;
Ман, насвалэ́с тырэ́ барвалыпна́са,
Придуминдлэ́ дукха́ лынэ́ тэ хан.
О камлыпэ́н насвалыпэ́н нанэ́:
Ада́савэ састэ «насвалыпна́стыр»
Ивья́ киркэ драба тэ пьен лынэ́, –
Нашты́ ило́ тэ традэ́л э хула́стыр.
Мэ ґалыём: вашэ миро́ ило́
Драба — ничи́, сом тутыр насвало́.
Сонэто 119
Савэ́ драба́ пиём? Киркэ́ ясва́,
Со ачядэ́ Сирены? На джино́м.
Дужакира́в, дара́в, сыр дро тхува́:
Со дорэстём — екха́тыр нашадём.
Бут грэ́хи ли скэрдя́ миро́ ило́,
Коли́ ман бахт и зор пхэрдякирэ́нас? –
Со мэ пэём адя́кэ насвало́,
Дукха́тыр мрэ якха́ аври́ ухтэ́нас.
Шара́в холы́! Джино́м, со ёй куч мо́л:
Со сы фэды́р, бида́тыр выбарьёлас,
О камлыпэ́н гэя́, соб тэ рисёл
Бут гожэды́р, сыр англэды́р дыксёлас.
Миро́ насвалыпэ́н мэ на костём:
Со нашадём, трин мо́лы дорэстём.