Друг
Хощеши друга истиннаго знати,
послушай мало, имам ти сказати:
Друг есть, иже тя в гресех обличает
и злонравие твое обхуждает.
Друг есть, заочно тебе ублажаяй,
а в лице правду выну ти вещаяй.
Друг, иже в нужде тебе помогает,
во день печали тщиво утешает.
Друг, иже за тя готов изтрошати,
яже изволил Господь ему дати.
Друг, иже к благим делом увещает,
а в злых нимало помощник бывает.
Друг, кто о благих твоих веселится,
о злых случаех купно печалится.
Друг, иже в скорби время не оставит,
и неизменну любовь си проявит.
Сицева друга требе есть искати,
паче сокровищ богатых стяжати.
Стяжаннаго же истинно любити,
и взаим добро оному творити.
2
Егда краснотеплыя весны дни сияют,
в то время ластовицы с нами пребывают.
Гнезда лепят на домех, сладко воспевают,
зиме же приближшейся от нас отлетают.
Точне деют лжедрузи, ибо есть доколе
благо кому щастие, дружатся дотоле.
Блажат, служат, а егда щастие менится,
тогда лжедругов любы к иным отвратится.
3
Кто друг трапезы, тому ся въверяти,
есть то на трости себе утвержати.
4
Нескоро права леть друга познати,
надолзе требе правость усмотряти.
Мнози бо себе други притворяют,
словесы токмо дружество являют.
5
Егда хощеши друга полезно избрати,
три в нем добродетели нужда усмотряти:
Да есть благоразумен, знаяй разсудити,
сицевый бо друг имать в ползу тебе быти.
Противным же образом, аще избереши
безумна друга, беды многи понесеши.
Паки, да благ муж будет, ибо удобрится,
кто-либо с мужем благим истинно дружится.
С лукавым же дружество лукавству научит,
за что Бог огнем вечным во аде умучит.
Третье, подобает в друзе усмотряти,
да бы на горда мужа в дружество избрати.
Ибо гордый не может право ся дружити,
яко смиренну равен он не хощет быти,
Но. аки господин сый, почести желает,
смиренномудра мужа удобь презирает.
Друг друга снедает.
Имеяй желание сын наследник быти
купно желает отцу кратко время жити,
И хотяй от друга си прибыток прияти
понуждается тщеты оному желати.
Желаяй малоценно купли покупити
рад бы с продающаго тщетою набыти.
Всяко друг друга в мире лукавом прелщает,
не вещи токмо, но и самаго снедает.
Но яко в мори рыба, поглощши иную,
и сама снедается часто чрез другую,
Тако зде, болей менша елма поглощает,
во мале от инаго сам снеден бывает.
Дуга
По всемирном потопе дуга положися
на облацех во знамя, яко Бог смирися
С человеческим родом, ни имать казнити
к тому толь люте, аще и будет грешити.
Та дуга вообрази Христа воплощенна,
в знамя мира со Богом в мире положенна.
Ибо яко же дуга в облаце родится,
егда на нь сияние солнца изводится.
Тако есть сияние славы божественны
Христос, в человечестей плоти проявленны.
И яко дуга в себе два содержит рога,
подобне два естества суть у Христа Бога.
Во дузе три суть цвети: багряный, зеленый,
третий им примесися видом си червленый.
В Христе три суть образы жития святаго:
земнаго, небеснаго и болезненнаго.
Небесно, веселое, значится в зеленом,
болезненное паки во цвете червленом.
Иже по человеку земное — в багряном,
проявленное в ползу верным христианом.
2
Яже на облаце дуга утвердися,
образ лука имать, к Богу обратися.
Учит стрелы любве ко Богу пущати.
царствие небесно нуждею стяжати.
3
Красная во облаце дуга знаменает,
яко на ны скотныя иго возлагает
Свое Господь, да мы в нем любезно трудимся,
на упокоение в небе заслужимся.
Трисветла та дуга есть, учит Троицу знати,
веру, надежду, любовь к Ней всегда вращати.
Красотою своею то нам изъявляет,
яко красная за труд мзда ны ожидает.
От триипостаснаго Бога положися.
Всяк убо игу Бога щедра покорися.
Дух Святый
Егда Дух Святый в сердце Ся вселяет.
три благодати действом исполняет:
Ум наставляет, что есть благо знати.
волю же движет благаго желати,
А память будит, еже совершити
дело благое, да бы ползе быти.
2
В голуба виде Дух Святый явися,
егда во водах Иисус крестися.
В огненных паки языцех низшел есть
на апостолы и на главах сел есть.
То знаменуя, яко, кто крестится,
в голуба цела той да претворится.
Хотяй же в мире апостолствовати.
ревность по Бозе должен есть стяжати.