Или сице
Зде Епифаний муж, исполнь мудрости,
иеромонах, спрята своя кости.
По честней жизни свято преставися,
ты, читателю, о нем помолися.
Или сице
В гробе сем кости Епифаний честный
положил своя, учитель известный,
Иеромонах, ты за нь помолися,
а сам в путь той же присно готовися.
Или сице
Грядый человече, возри зде и стани,
иде же положен отец Епифаний,
Иерей в монасех, кроткий, мудрый, честный.
Рцы, да водворит й Господь в рай небесный.
Или сице
Зде лежит честный отец Епифаний,
изследник правый Священных Писаний,
В многих языцех мнози его труди,
за что вечная память ему буди.
Епитафион
Преосвященному Павлу митрополиту Сарскому и Полонскому
Павел митрополит Сарский и Подонский,
отходя с Египта мира в град Сионский,
В сем гробе остави честное си тело,
души подаждь Боже, место всевесело.
Или сице
Павел митрополит зде преосвященный,
многотрудным те л ом в гробе положенный,
Пастырь и учитель, страннолюбец велий,
душею да вселится во стране веселий.
Или сице
Павлу митрополиту Сарску и Подонску
дажде, Христе, со аггелы песнь пети Сионску,
В сем гробе многотрудны мощи положившу,
Богу, Церкви и царству весь век свой изжившу.
Или сице
Зде лежит сирых отец и нищих питатель,
странных, книжных, церковных в дом свой призыватель.
Зде Павел митрополит положи си кости,
Ты, Христе, всели душу в вечныя радости.
Или сице
Многотрудный зде Павел телом почивает,
митрополит бе саном, востания чает,
Странных, нищих, церковных и книжных чредитель,
за что да подаст ему пир в небе Спаситель.
Епитафион
Благородному Георгию Пласковицкому
Зри, како благородный в землю обращенный
Георгий Пласковицкий, в пути убиенный,
Зде плоть лежит, а душа к небеси желает,
рцы вечна ему память, тебе упрашает.
Или сице
Грядый, помоли о мне милостива Бога,
да ми беззакония оставит премнога.
Георгий Пласковицкий зде опочиваю,
ты чай гроба, аз уже востания чаю.
Или сице
Зде Пласковицкий Георгий ждет неба,
твоея молбы душы его треба.
Убит разбоем, тебе увещает:
Живи опасно, татски смерть хищает.
Или сице
Георгий Пласковицкий зде опочивает,
от разбойник убиен, от Тебе желает
Молитвы, читателю, Кирие елейсон
рцы, а веждь, яко и тя смертный не минет сон.
Ересь
Проказа есть ересь, тою поврежденный
воистинну душею есть муж прокаженный.
Таковаго блюстися верным подобает,
общество бо с сицевым смертно повреждает.
2
Авва Агафон зело смирен бяше,
грешнейша себе от всех нарицаше.
Егда кто ему задаяше злобы,
не воспалися гневом си утробы.
Но елма некто его клеветаше
еретичеством, тогда не молчаше,
Не исповеда греха в себе того,
яко излише Богови мерзскаго.
Не буди тако, глагола, в словеси
вашем, да аз есмь виновен ереси.
Лютшее то зло от многих злоб иных,
за немощь от нас преступно творимых.
Оны бо яко за немощь творятся,
удобь от Бога щедраго простятся.
Еще, верою Бога съединенна
душы оставят не все отрешенна.
Ересь же, яко от злобы бывает
и от упора, весма отрешает
От душы Бога, без Него же быти,
яко без душы телу, несть леть жити.
3
Иоанн Богословец в баню пришел бяше,
в ней же еретик Херынт себе обмываше.
Того узрев, апостол скоро воспятися,
никако внити в баню ону увестися.
Вопрошающым вины не ину даяше,
точию яко в бани враг Божий седяше,
С ним же и мало время бояшеся быти,
да бы ся верху бани на ня не свалити.
Отсюду подобает нам ся научати,
еже со еретики общества не знати.
Ересеначалници
Иже ереси в Церкви начинают,
местию Бога люте исчезают,
Да видит народ мерзки Богу быти,
иже неправо дерзают учити.
Симон волхв егда чрез воздух летал есть
демоним деиством, и люди прелщал есть,
Паде на землю, ноги сокрушил есть,
о то бо святый Петр Бога молил есть.
И тако, иже лестно вокрилися,
праве дне ногу своею лишися,
Терпя же болезнь лютую, скончася,
душа мерзкая от демона взяся.
Манес проклятый, Манихей ся звавый,
аки из облак манну изсыпавый,
От царя Перска страшне искожися,
яко врачь сыну его сотворися,
Обещаяся недуг исцелити,
но лстец возможе живота лишити.
Монтан нечистый силом удавися
с пророкинями, с ними же прелстися.
Донатистове, иже ся ругаху
Евхаристии и псом ю метаху,
Сами от тех псов люте растерзани,
достойней казни от Бога предани.
Арий блядивый, во нь же день хотяше
храм Божий взяти, и к нему идяше
Торжищем гордо, восхоте отьити
в тайная места чрево изпразднити.
Амо же отшед, с гноем излиял есть
чрево, и душу демоном отдал есть.
Иулиан враг, отступивый Бога
и злая верным сотворивый многа,
Егда на Персы силно ратоваше,
христианом же смертию прещаше,
От невидима воина убися,
свыше копие в перси водрузися.
Несторий хулник от Бога казненны,
червием язык ему расточенны.
Валент, Ария зла поборник бывый,
Христа Господа тварь быти учивый,
Воюя Готты, побежден бежаше,
скрився в хизине, огнем конец взяше.
И мнози ини Богом истреблении
от мира сего, и неба лишении
За своя хулы. Ты, брате, блюдися
ересей всяких, Церкви же держися.