Жертва неправая
Иже чюждая в жертву Богу посвящает,
аки сына в очесех отчих закалает.
Жестосердие
Сердце без благодати Божия жестеет,
яко блато без воды, густея, твердеет.
2
Наковално, млатами биемо, твердится,
злобно сердце ранами паче ожестится.
Образ есть в Фараоне, иже, быв казненны,
не умягчися, даже в понте погруженны
3
Терпение Божие, не крепкая сила
Фараоново сердце в злобе ожестила,
Ибо, яко легчае Бог его казнил есть,
он, не умягчаяся, сердце ожестил есть.
Аще же был бы тяжше от Бога казненны,
негли абие был бы сердцем умягченны.
Чесо же ради Господь сие сотворил есть,
судбы Си праведныя от нас утаил есть?
Яве, яко достоин исчезнути бяше,
иже род Исраилский излиха томяше.
Живописание
Бе живописец добре изученный
в Роде, именем Протоген реченный.
Сей рябку тако живо написаше,
даже к ней живых множество леташе.
Инде змий тако живописан бяше,
яко же в птенцех пение держаше,
Иже Лепиду не даяху спати,
змий за то страхом не дал им пискати.
На Клавдиеве феатре прелщаху
род вранов окна, яже от вап бяху,
Непщующе бо праведная быти,
тщахуся теми на ветр излетети.
Апеллес коня тако написаше,
яко же кони живыя прелщаше,
Мняще бо того коня жива быти,
не престаяху рзание творити.
Им же некая лица ся писаху,
яже знамена и черты являху
Живых, яко же бе возможно знати
физиогномом, что о них вещати.
Живот
Иов живот наш кораблю равняет,
иже во морских пучинах бегает
Излише скоро, а егда случится
стретити другий, то людем видится,
В корабли сущым, другий пребегати,
а свой на месте недвижно стояти,
Или мало что ветром гоним быти,
зело медленно к пристанищу плыти.
А в самом деле равно он другому
течет по водам ко брегу земному.
Тако живот наш видится стояти,
а инех скоро к гробу притекати.
Но лстимся сице, ибо в самом деле,
яко в корабли, течем в нашем теле
Подобне прочим скорым течением.
равными ветры, точным стремлением.
Аще трудимся или почиваем,
выну ся к гробну брегу приближаем.
Убо достоит то нам выну знати,
добре ко гробу себе устрояти,
Да бы непраздным к оному приплыти,
но благих плодов исполненным быти,
О них бы вечно в небе пребывати,
душевна глада во век не страдати.
2
Живот человеческий сугуб ся считает:
временный сей и вечный, всяк верный то знает.
Сугубо и рождество того познаваем:
в мир сей и в век грядущий, его же вси чаем.
Зде из чрева материя обще ся родити,
онамо всем из гроба обще исходите,
Во нь же труп, яко семя, вложенный бывает,
да, яко клас, послежде в вечность ся раждает.
Из земленны матере всяк в мир сей родится,
от земля и всяк мертвец Богом возродится.
Яве убо, яко вси земли есмы чада,
но создани в жителство небеснаго града,
Во нь же имамы Богом водворени быти,
аще тщимся небесно зде, не земно, жити,
К чесому нас апостол Павел увещает,
горняя мудрствовати егда завещает.
Тщимся убо, братие, божественно жити,
да бы в небо ко Богу в живот вечный внити.
3
Живот временный аще вечну уравниши,
смерть паче, неже живот быти и узриши,
Ибо повседневное телесе тление
что ино, токмо смерти есть продолжение?
4
Живот человеческий скоро претекает,
ибо, яко цвет селный, тако отцветает.
Здрав кто утро и весел, надеется жити
с Мафусайлом долго, силен, славен быти,
И се навечер коса смерти посекает,
прекрасный цвет юности во тлю обращает.
Веселится кто ныне, славно торжествует,
а смерть невидимая косу на нь готует,
И се солнцу западшу, и он тожде деет,
падает в гроб, утро же смердит, ибо тлеет.
Оле непостоянства жития нашего!
Никто же есть известен бытия своего.
Несть блаженство под солнцем, то бо токмо в небе,
хотяй жити блаженно, то заслужи тебе.
Тамо жизнь безсконечна и вечно блаженна,
тамо здравие присно, радость божественна.
Тамо мир есть без бедства, безбедство мирное
и вечность блаженная, блаженство вечное.
Любы совершенная тамо обитает,
совершенство любимо вечно пребывает.
Тамо страху несть место и печаль не будет,
ликование, радость во веки пребудет.
Нощи тамо не знают, день выну сияет,
а никому никогда варом досаждает.
Вси же единодушно в Бозе пребывают,
Его зрением умы своя услаждают.
Тамо здравие вечно, болезнь ни едина,
океан веселия, радости пучина.
Тамо правда царствует, никто же прелщает
и сам ни от кого же прелщаем бывает.
Оттуду блаженнии никогда гонятся,
окаяннии тамо никогда впустятся.
Тамо ум без поблуды имать вечно быти,
память паки ничто же возможет забыти.
Воля ввеки Богу будет подчиненна,
любы непритворная, сладость неизменна.
Чювства без вреждения имут пребывати,
никто печално имать тамо воздыхати,
Ибо отвеюду радость всего человека
изъвне и внутрь обидет без кончины века.
Живот тамо без смерти, без горести — сладость,
о Бозе, в Бозе, с Богом вечно будет радость.
О всеблаженная жизнь живущих на небе!
Кто тамо вечновати не желает себе?
Желайте, любимицы, вседушно желайте,
на всяко время и час в небо воздыхайте,
А зде тако живите, да бы угодити
делы Богу, и за ня восприятым быти
Во страну вечны жизни, ибо не вхождает
тамо, кто жизнь во злобах свою провождает.
Благодатию убо Господь ны спасает,
но и добрых деяний от нас Он желает,
Да содействуем Его святей благодати,
тако удостоимся жизнь вечну прията,
Ея же аз всем верным усердно желаю,
и сам ко Богу щедру о том воздыхаю,
Да, простив моя грехи по Своей милости,
общника мя сотворит вечныя радости.