Злоплодие и безплодие
Неплодная древеса секома бывают
и, огню пища бывше, в пепел согарают.
Колми паче злоплодным лепо то творити,
и еже посекати, и огнем палити?
Тако и человеком, плода не творящым,
сечь и казнь имать быти в огни всепалящем.
Колми же лютшая тым вправду имать быти,
иже в богомерзкая дела плодовита?
Лучше сих — безплодие. Тем зле не творите,
а в безплодстве дел благих никако живите,
Их бо кроме в жизнь вечну никого пущают,
но во пламень геенский лютый вовергают.
Злословник
Иже из пса язвенна стрелу извлекает,
того он зубами си острыми язвляет.
Сице от злословника нещадно язвится,
им же от злословия он мужем целится.
Злосовестный
Главострупливый гребеня гонзает,
яко той ему, чешя, досаждает.
Злосовестный же слов полезных бежит,
аки досадных, а во злобе лежит.
Злый от добрых и с добрыми
Не место человека честное спасает,
ни рода изящество, ни сан ублажает,
Но своя добродетель комуждо полезна
и во жилище въводит царствия небесна.
Аще кто от неблагих родитель родися,
не вредит ему, аще сам благ сотворися.
И вопреки, от благих родитель рожденный,
аще зол, спасения бывает лишенный.
И от места высока мнози низпадают
и по сане пречестном в низости бывают.
От родителей благих злии происходят,
и собори честный недобрых изводят.
Что лучше небесе есть? А с него свалися
денница с воинством си, егда разгордися.
Кий сад красней есть рая? А в нем согрешиста
Адам с Еввою и вне изверженна быста.
Потом има на земли первородный был есть
Каин, а он Авеля брата си убил есть.
Ное в корабли своем самоосмый бяше,
и тамо Хам лукавый посреде живяше.
Авраамль благочестив дом Богом судися,
и ту Агарь со сыном неправа явися.
Исаак из Ревеки два сына родил есть,
Бог перваго отверже, втора возлюбил есть.
Иаков дванадесять сынов имеяше,
из них Рувим на ложи отчи скверно спаше.
Со архиерейскаго престола падеся
в Ветсе Завете, иже Илий наречеся.
Из царска седалища Савл риновен есть
и, ратуя со враги, мечем прободен есть.
Давид царь бе и пророк, сын сестру растлил есть,
ин отче сквернил ложе, самаго гонил есть.
Наконец, апостоли со Христом хождаху,
а в среде продателя Иуду имяху.
Не дивно убо, аще злый ся обретает,
иде же благочестных собор обитает.
Точию злыя требе из среды гонити,
аще в исправлении не прилежат быти,
Яко крастову овцу пастырь извергает,
да здравых сущых вредом скверным не вреждает.
Не дивитеся убо, егда вам случится
видети, яко зол муж благим примесится,
И от добрых родитель рожденная чада,
иже нечесть суть рода и погибель града.
Множицею и в древних то вецех бываше,
Господь же злыя казнил, добрыя спасаше.
И ныне койждо свое имать нести бремя,
и елма всемирное окончится время.
Зле просите
Зле той просит от Бога, кто пренебрегает
заповеди творити, а горних протает.
Паки, иже, пренебрег горняя благая,
молится, да приимет суетства земная,
Аще же и та хощет от Бога прияти,
еже бы на сластная плоти отбращати;
Излише прошение его есть худое,
не будет Богом дано то оному в злое.
Змий
В некоей стране змий превелий бяше,
близ моста лежя, вред лютый творяше.
Кони и волы, и всяк скот хищал есть
и путь творшыя люди поглощал есть.
Тем путем святый епископ пустися
Донат, а змий на нь гладный устремися.
Разверз челюсти. Святый наплеваше
в гортань и знамя крестно содеяше.
Того не терпя, змий той умертвися,
о нем же страна вся возвеселися.
Осмь супруг волов зла гада везоша
на поле, тамо огнем й сожгоша.
Змий ругаемый
Кит есть, иже змий пророком реченный,
в поругание Богом сотворенный,
сей бо плотию есть великий зело,
и вся ясть смело.
В морстей пучине престрашен плавает,
что ся прилучит, то все поглощает;
рыбы всякия бывают во пищу
его сирищу.
Тем же, видяще его, утекают
ко земну брегу, а его прелщают,
ибо он егда на ня разъярится,
к брегу стремится.
Тамо на песце за мелкость остает
и от рыварей убиен бывает,
тако ся ему рыбицы ругают,
себе спасают.