Земля будем
Человек перстный Адам яко согрешил есть,
да в персть паки вратится, Господь й казнил есть,
Да, иже начала си перстна не помняше,
егда кичиво, яко Бог, быти желаше,
Той на персть последнюю выну поминает,
сердце си от гордости тако обуздает.
Еще и того деля в землю ся вращаем,
да злобу греха люту оттуду познаем,
Яко, иже имехом без тля пребывати,
ныне за грех должнствуем в землю ся вращати.
Наконец, да, помняще в землю вращение,
земных пристрастей мертвим во нас стремление
И ко покаянию сердца обращаем,
да в небо пресел имея из тли, яко чаем.
Зерцало
Зерцало лицем к солнцу егда обратится,
светлость и образ солнца в нем изобразится.
Тако, егда человек сердцем к Богу будет,
благодать в нем Божия и слава пребудет.
Злато
Краль Галлийский Бреун деву возлюбил есть
и, яко с женою, с нею нечто жил есть.
Она же неправо онаго любяше,
но точию злато лестию взимаше.
Позна лицемерство краль хитрыя жены,
уразуме, яко бе ею прелщенны.
Умысли ю златом довле насытити
и лесть не без казни должныя пустити.
Повеле воинству злато ей метати,
ей же, седшей, от них оно приимати.
Метающе убо, купу сотвориша
толь велику, даже жену завалиша,
Яже, не стерпевши тяготы от нея,
и злата лишенна, и жизни своея.
Златый гроб стяжала любившая злато,
но горе бяше ей тогда зрети на то.
2
Содержяй злато может царство наследити,
златом же муж держимый не может в не внити,
Ибо злато тяжкое низу влечет его,
аки оковы взложши на раба своего.
3
Не зло есть злато, благо создание,
но зло есть злое того стяжание,
И зла есть скупость в того держании,
тако ж безмерность во расточании.
4
Аще кто болезнуяй вознеможет спати,
несть требе тому злата при себе держати,
Сиречь, перстеней, манист и яже подобна,
ибо всяка вещь злата сну есть неугодна.
Бдение бо, а не сон злато содевает,
яко же Авиценна врачь хитрый вещает.
Злато и сребро
Драго есть сребро, паче того драго злато,
мало обретаемо, убо ценно за то,
А ничто же есть ино, токмо часть земленна,
ова белым, си желтым цветом украшенна.
Людие честь велику оным наложиша
и сердца несмысленно к оным прилепиша.
А кая в них есть полза? Ни ясти, ни пити
мощно их, ни же древо леть едно срубити.
Сама красота цену оным сотворила,
а безчисленны люди во ад погрузила.
Многополезнее есть железо твердое,
обаче у человек несть тако честное,
Яко много есть везде, и неукрашенно,
цены в людех достойны за то есть лишенно.
Кроме злата и сребра леть комуждо быти,
без железа ни един дом может пребыти.
Всяко дело железом делано бывает,
само злато и сребро им ся устрояет
На всякия потребы, обаче неценно,
красотою их наше естество прелщенно.
Вси лакомо желают оная имети,
мужие, жены, старцы и малый дети.
О проклятаго глада и неутоленна,
им же томится люте весма вся вселенна!
2
Младенци съсущии по земли ползают,
ногами и руки в ню ся опирают.
Совершеннии же ей ся не касают
руки, токмо ноги ону попирают.
Земля — злато, сребро, та должен есть прати
хотяй совершенна себе показати,
А иже рукама има ся касает,
взимая, младенец стар ся появляет.
Горе паки мужем, зле младенствующым,
в совершенном веце детский ум имущым.
Златом напоенный
Еразии воевода Римских полков бяше,
иже град Вавилонский крепко обстояше.
Вавилоняне к нему послы си послаху,
да не разорит града, прилежно моляху,
Обещающе ему богатства отдати,
токмо да хощет мирно она, вшед в град, взяти.
Воевода лакомый мало воев взяше,
хотя сам богат быти, во град той идяше.
Граждане егда силу малу созерцаху,
вой с воеводою, яко враги, яху
И, растопивше злато, во уста влияша
воеводе лакому, и та глаголаша:
Пий злато, окаянне, его же хотяше
во торжество имети, пленив гнездо наше.
И тако конец прият златом напоенны,
иже преострым мечем не бе побежденны.