Зная, Христос невесть
Вся ведый Господь премногих не знает,
егда бо притчу усты Си вещает,
Весть, яко нищий Лазарь речей бяше,
богата паки имене не знаше.
И иным многим имать благодати:
Невем вас, егда приидет Суд дати.
Како вся Ведый невесть и не знает?
Отречение тако изъявляет,
Еже есть, яко отринет от неба
грешници, ни даст псом животна хлеба.
Невесть во славу онех воводити,
знает же во огнь вечный осудити.
Зрение
Добро есть свою совесть, не чуждую знати,
свою душу от грехов, не инех чищати.
Бервно из очесе си да ся изъимает,
сучец в чуждем очеси зрим да не бывает.
Уне бо токмо себе единаго зрети,
нежели всех живущих грехи разумети.
Аще же око твое не может терпети,
но оплазиво хощет иная смотрети,
Да зрит убо на небо и да созерцает,
кую мзду зрящым себе Бог уготовляет.
Да зрит и во геенну вся муки познати,
в ня же презревших себе имать Бог сказати.
Зри онем и вспять тебе, да грехи узриши
и за ня сердечныя слезы да точиши.
Смотри и пред тобою, да бы ти не впасти
в неисходную яму вечныя пропасти.
Вижд одесную тебе образы святыя,
от мужей преподобных в ползу поданныя.
Вижд на шуйце злых казни и злобы хранися,
да бы в их не приити жребий, соблюдися.
Тако око умное тщися соблюдати,
аще хощеши за не муки не страдати.
Зрение Божие
Зрит Бог на люди, деющыя злая,
и иже творят делеса благая,
Но на оныя очима ярости,
на сия паки очесы милости.
Ты, чтый, избери сими видим быти,
буди благ, да бы милость ти влучити.
Зубы
Зубы вси купно пищу сожувают,
алчное тело угодно питают.
По едину же аще разделятся,
пакостят паче, неже впотребятся.
Тако иноци вси премного могут,
вкупе сущии, и многим помогут.
Разлучени же, ничто содевают,
себе губяще, инех соблазняют.
2
Зубы грешником Господь сокрушает,
егда силныя онех погубляет,
Или зло слово зле глаголющыя,
невинне славу растерзающыя.
Врагом Давида зубы сокрушенны,
Ахитофель бысть егда повешенны,
И ини врази елма погибоша,
иже зловослово на него рекоша.
3
Мысленно тело, Церковь Христа Бога,
имать различных удобь действа многа.
Глава Христос Бог Сам Ся нарицает,
яко все тело живит, управляет.
Архиереи суть очеса мысленни,
еже вся зрети, в Церкви устроении.
Уши суть, иже слова послушают
и велению покорни бывают.
Презвитери же уста мощно звати,
славу бо Богу тщатся возсылати
И беседуют о людех ко Богу,
ползу творяще тако миру многу.
Гортани певцы леть уподобляти,
яко их дело — песни воспевати.
Зубом же кого леть уподобити?
Разсуждение нужда положити.
Проповедником аз уподобляю,
ибо в действе их подобе знаю.
Зубом свойственно есть вся пищи жвати,
мягки сотворше, в стомах посылати.
Проповедницы егда поучают,
пищу духовну тогда преживают
И дают людем, да не гладни будут,
но насыщени душами пребудут.
Зубы суть тверды, твердая скрушают,
проповедницы претверди бывают,
Егда трудятся в слове мужественно,
трудных толк дают невеждам явственно.
Зубы во устех поелику белы,
толико здравы бывают и целы.
Проповедницы, чисто живущии,
суть здравы, здраву пищу дающии.
Аще же черны зубы ся являют,
недуг имеют и смрад испущают.
Проповедницы в то время чернеют,
егда закону противная деют.
Тогда нездрави они пребывают,
смрад делес скверных от себе пущают,
Досадный людем, неприятный зело,
осмражающии всея Церкве тело.
Зубы болныя нрав есть истерзати,
да бы ся здравым от их не вреждати.
Проповедницы, иже повреждении,
точне да будут скоро исторгнени,
Да подобных си ядом не вреждают,
иже внутрь себе смертно сокрывают.
Червие в зубах повнегда бывает,
телу живому люте досаждает.
Зла совесть червь есть, та аще вселится
в проповедницех, досада творится
Живому телу, даже истерзати
зуб вредный нужда, или червь изгнати.
Сие вы чтуще, им же есть врученно
проповедати слово божественно,
Тщитеся здравы, белы зубы быти,
яко достоит во Церкви служити,
Да честь сугубу можете имети
зде, и в небеси с честными седети
Во вечней славе у всещедра Бога,
у Него же вам мзда готова многа.