Избранных мало
Много Бог изволил земли сотворите,
из нея же мощно скуделы строите.
Мало паки тоя, что златом бывает,
егда ю художник умно престрояет.
Тако мнози люди в мире суть создании,
но мало тех, иже в небо суть избрании.
2
Капли число избранных Ездра подобляет,
волнам — погибающых, и правду вещает.
3
По собрании гроздов мало их остает,
тако избранных число немного бывает,
Или класом по жниве точно остающым;
причти ны, Христе Боже, путем Ти грядущым.
4
Лот в Содоме сам четверт без порока бяше,
весь же град Господь за грех огневи предаше.
Тако есть во вселенней немного избранных,
а много во погибель адску сготованных.
5
Многи тмы из Египта людей изъидоша,
но в землю обещанну токмо два внидоша
От изшедших оттуду до Сионска града,
вси во пути помроша, внидоша их чада.
Тако из мира в небо немнози вхождают,
вси на пути сем ползком грехом умирают.
6
Яко болши плевел есть, менше же пшеницы,
тако многши грешници, неже праведници.
7
Скуделных сосуд много, мало в дому златых,
тако грешных есть много в мире, мало святых.
Извинение
Адам и Евва листвие сошиша,
тем нагость плоти своея покрыта.
О коль нетленный покров оным бяше,
ибо недолго пребыти можаше!
Листвие и днесь тии сошивают,
иже вину си лжею покрывают,
Невинны себе быти глаголюще,
или на ины вину си кладуще.
Но тленен кров сей, вомале изтлится,
а нагость вины пред всеми явится.
Излишество
Часть святотатства той муж содевает,
иже излишних нищым не раздает,
Вся бо лишняя ко нищых потребе
благоволил есть Бог вручити тебе,
Да, расточая, мзду ти заслужиши,
нищыя к молбам теплым возбудиши.
Тако ты нищим, нищии же тобою
спасется, Бог же венчатель обою.
Измена
Во Тарсе Киликийстем муж некий живяше
именем Вавила, сей волхв и блудник бяше.
Име две жене блудне и вся зла творил есть,
да сокращенне реку, демону служил есть.
Во едино же время въшед в храм, помолися,
Еваггелию чтому умом приложися.
Услышав же ов святый глас увещания:
Сотворите достойный плод покаяния,
И еже покайтеся, царство приближися!
Со сокрушенным сердцем в дом свой возвратися
И, призвав блуднице си, нача глаголати:
Не к тому имам с вами аз безчиновати.
Доволно жих демону, к Богу обращуся,
о спасении души уже попеку ся.
Слышах, к покаянию Господь призывает,
никого кающася небесе лишает.
Се имения моя вама оставляю,
сам в нищете и слезах жити избираю,
Да возмогу вся грехи онеми омыти
и милость у всещедра Бога получити.
Блуднице, услышавши глас сокрушения,
отвещасте оному глас умиления:
О честный господине, с тобою жихоме
и лукаво пред богом купно творихоме.
Днесь, тебе ся обращшу, сообращаеме
и всех согрешениих уже ся каеме.
Вся убо на нищыя богатства раздаша,
сами пути спасенна прилежно ся яша.
Прочее века чисто и свято пожиша,
благонадеждно, яко небо получиша.
О колико действенно есть Господне слово!
Тем всяко ухо буди слушати готово,
Яко бо искра, на прах егда нападает,
абие й во пламень велий обращает,
Тако, иде же слово Божие родится,
грешник во божественна мужа преложится.