Лет отъятие
Аще сын имение худо расточает,
даяния си отец онаго лишает.
Равне, аще век юный зле ким проводится,
от Бога век старости тому не вручится.
2
Бог на покаяние сто двадесять дал есть
лет людем пред потопом, слез их ожидал есть.
Видя же их безслезность, век той сократил есть,
двадесять отьем, потоп страшный напустил есть.
И днесь не кающымся лета умаляет,
во вящшее приити злобы не пущает.
Любве изводства
Несть доволно языком Господа любити,
изводства любве требе в делесех явити.
Первое же есть выну о Бозе мыслити,
все желание к Нему прямо обратити.
Второе — благочестно о Нем глаголати,
имене Его из уст си не испущати.
Третее — тайны сердца извещати Ему,
аще всеведущему и вся видящему.
Четвертое — охотно с Оным пребывати,
молитися и слова Божия слушати.
Пятое — заповеди Его вся хранити,
и яже Ему годе, та токмо творити.
Шестое — дел лукавых всяческих гонзати
и ближния от онех нрава отвождати.
Седмое — славу Его разширяти тощно,
по ней поборствовати, поелику мощно.
Осмое — на вся бедства готовость имети,
приключающаяся радостно терпети.
Девятое — без страха правду глаголати
и ненаказанныя благоувещати.
Десятое — не токмо любити Самаго,
но и вся, яже Его, найпаче ближняго.
Сия творяй изводства по себе являет,
яко правую к Богу любовь соблюдает.
Любовь
Его же солнце лучми велми согревает,
той абие из себе ризы отвергает.
Точне, его же любы Божия согреет,
абие вся мирская из сердца си реет.
2
Любы крепка, яко смерть, ибо побеждает
вся люди, яко же смерть, и страха не знает.
И паче смерти силна, смею глаголати,
ибо и самую смерть весть та презерати.
Любы Христа ко смерти за мир понудила,
Его смертию нашу смерть есть умертвила.
Любы христианская за Бога терпети
мученики понуди, и плотми умрети.
Любовь граждан к отчеству нудит воевати
противу супостатом и смерть подъимати.
Любовь чад в человецех смерть пренебрегает,
ибо за ня умрети всяк готов бывает.
И во зверех матери чада защищают
и множицею за ня самы умирают.
3
Егда аггел люди мечем убиваше,
Давид ко Господу слезно вопияше:
Аз есмь согрешивый, аз деях неправо,
сии овцы суть, что деяша лукаво?
На мя мечь изволи острый обратите
и дом мой казните, люди же простите.
За сие Давида царя смирение
царю Бог и людем даде прощение.
4
Благо добродетели всякия стяжати,
теми, яко бисери, душу украшати,
В них же да имать первство любы истинная,
во основание им всем положенная.
Вся бо добродетели мертвы суть без нея,
не могут оживити душы ничиея,
Ибо, яко ризами труп сущ покровенный,
не греется, ни может быти оживленный,
Яко во внутренних си теплоты лишися,
и тоя лишением нежив сотворися,
Подобне добротами душа покровенна
извне, аще во внутрних любве есть лишенна,
Праздна теплоты ея, жива не бывает,
та бо душу, яко плоть — душа, оживляет.
5
Любовь ко Богу и ко ближним тебе
да есть в крил место, и будеши в небе.
6
Глава Церкве — Христос, мы вси Его уди,
яко в удех тела, и в нас любы буди.
Уди себе взаим ведят сострадати
и о чести друга соликовствовати.
Тако нам достоит с слезными ридати,
с радующимися радость восприймати.
7
В ногах любы верная, ибо помогает
едина другой, егда та ся поползает.
8
Вера с добрыми делы душу оживляет,
егда любовь правая ону украшает.
Душа, яко лампада, яко елей — дела,
любы да есть, яко огнь, и будет весела
Во сиянии своем. Инако суетна,
яко лампада кроме елея, отметна.
И с тым же огня кроме не может светити,
тако без любве душе несть подобно жити.
9
Вера без любве мертва, никого спасает,
с нею паки есть жива, нас бо оживляет.
Тем, аще бы кто горы возмогл преставляти
верою, а не хотел любве изъявляти,
Ничто во спасение успел бы душевно,
но был бы низриновен в езеро огненно.
Тем же, возлюбленнии, и веру храните,
и любовь присно к Богу и ближним блюдите.
Она же, благих делес сущи плодна мати,
пособствуема Богом, имать я раждати
Во славу Господеви, вам во спасение,
за та будет в небеси вам водворение.