Мира любление
Сияет небо, яко чисто злато,
каляет мир сей, яко скверно блато.
Обаче небо глупо презираем.
мир, яко блато — вепри, улюбляем.
Мира непостоянство
Плавающий морем в тишине велице
молитвы возсылают к небесе Владыце,
Да хранит я и вопред от хотящих быти
обуреваний лютых, могущих топити.
В тишины время страхом держими бывают,
непостоянство моря присно помышляют.
Тако нам, во мире сем живущым, есть требе
о хотящих приити помышляти себе,
Никогда же безбедства тверда обещати,
мир бо, яко же море, невесть постояти.
Аще возвеселяет на время малое,
обыче наводити печалей и втрое.
Аще богатит кого, может обнажити,
с Лазарем на гноищи нищим положити.
Возносит он высоко, но и низвергает,
поругание деет и во притчу дает.
Во дни убо блаженства зри, что хощет быти,
и не престани Бога о милость просити.
Да тя от злых случаев выну соблюдает
и Сам житие твое на путь наставляет.
Без Него никому же леть спасенну быти,
с Ним сущаго и весь ад не может глотити.
Михаил
Михаил — кто яко Бог — толком знаменает,
тем словом ста при Бозе, тем ся нарицает.
Младость
От рождества младенца мати повивает,
нозе, руце, да прямо растут исправляет.
Много паче от девства нравы исправляти
требе юных, да бы им в благость возрастати.
Многоглаголание
Муж многоглаголивый лжю часто сплетает,
едва бо правда уста его присещает.
2
Муж многоглаголивый елма разширится
словом, яко на море ковчег отрешится,
Сущий кормила кроме, иже приплавает,
амо же ветр принудит, не где подобает.
Тако бо, иже уст си не тщится держати,
нужду имать зла бедства в словесех страдати,
В них же сюду и сюду зле носим бывает,
донде же во погибель главу си вревает.
3
Глаголяй много знамение дает,
яко полезных вещати не знает.
4
В многом глаголании выну грех бывает,
ибо язык вещает, их же ум не знает.
5
Лучше есть язык от словес держати,
нежели много онем глаголати,
Молчание бо мало повреждает,
а глагол многий многих погубляет.
6
Многоглаголание со грехом бывает,
ибо то обычно лжю в себе заключает.
Множицею же вражды обыче раждати
и древняя дружества неправо терзати.
Буйства же глаголющих есть обличение
и таимых во сердце мыслей явление.
Свойственно есть безумным, тии бо готово
в конце языка имут всяческое слово.
Никоими мерами могут умолчати,
яко же стрелы в язве не могут держати,
А яко же стрелою иныя пронзают,
множицею на славе ближних убивают,
Частократно и себе в погибель вревают,
вина, яко языка не обуздавают.
Уне убо есть мало словес изпущати,
и та первее умом благо разсуждати,
Да полезна нам самым и людем бывают,
никогда же да блазнят, вся да созидают.
Мнози суть звании
Многих ради человек сей век сотворися,
будущий же немногих Богом уставися,
Зане, яко вещь скудел земля многу дает,
мало же, из нея же злато ся делает.
Тако малочисленны в мире между нами
блещащиися, яко злато, добротами.
Мнози же, яко глина, ли яко скуделы
сокрушеннии, зрятся, лукавыми делы.
Тем же и Господь рече: Мнози суть призвании,
но от того множества мали суть избрании.
2
В ратующую Церковь премнози приходят,
но в торжествующую зело мали входят.
Едва не вси на брани с врагом погибают,
о треблаженни, иже того побеждают.
Молитва
Моляйся о себе нужду исполняет,
моляйся о ближних любовь изъявляет.
2
Аще хощеши Бога умолити,
сия в молитве тщися сохраните:
Буди во стане Его благодати
и не престани в Бозе уповати.
Да приложиши к тому смирение
и сохраниши долготерпение.
Внемли прилежно, да благо просиши,
сия храня вся, Бога умолиши.