Прилог к преподобной матери Евфросинии
Ты паки, мати, о Евфросиние,
жителей града всех удобрение,
Яже потщася икону святую
внести из далны в страну Полотскую
Из Царяграда, камо из Ефесе
царь благоверный всечестно принесе.
Твоего ради многа прошения,
Российских деля стран украшения,
Припади к стопам небеснаго Царя,
да не лишит нас толикаго дара.
Умоли паки возвращенней быти
иконе святей, Полотск украсити
Отчинный град твой, в нем же ты трудися,
Христу жениху си уневестися,
Ибо толико град наш украшает
Девыя образ, и везде вславляет,
Елико солнцем небо украшенно,
светлыми звезды дивне упещренно.
Полотску граду бе утвержение,
столп, стена, помощь и ограждение.
Ныне без него како нам пребыти?
Аки без солнца, неудобно жити.
Убо, о мати, припади за нами
к Господу Богу твоими рабами,
Да возвратит нам икону святую,
просветит землю Белороссийскую.
Моли прилежно и Деву Марию,
да проявит нам милость свою сию.
Да не небрежет отчинна ти града
и не оставит правоверна стада.
Удобно тебе мощно умолити,
изволи токмо ходатийца быти,
Моли за нами, о святая мати,
храни ны в твоей выну благодати.
Ея же аще ты ны не лишиши,
вся на похвалу твою обратиши.
По вся дни тебе будем величати,
венец похвалы песней соплетати.
Молитвы образ кадило
Олтарь кадилный в храме ветсе бяше,
на нем фимиам иерарх паляше.
Еда Бог воню сладку обоняет
и Своя чювства тою услаждает?
Не буди тако верным непщевати;
чювств тленных чюжд Бог, невесть обоняти,
Но яко образ молитвы кадило,
самое знамя за вещь Богу мило.
Молитвы ко святым
Егда молитвы к святым Божиим бывают,
како, далече суще, слышат или знают?
По естеству не могут слышати и знати,
найпаче мыслей наших несть леть усмотряти.
Их же един есть Господь совершенный Знатель,
яко Сый Сердцевиден, тех же и Создатель.
Паче естества убо святии то знают,
о чесом людие к ним молбы возсылают.
Се же егда Господа Бога созерцают,
в Нем же, яко в зерцале, вся зрима бывают,
Тогда молитвы нашя и вся, яже требе,
и самыя помыслы видят они в небе,
Иже во их похвалу и во честь бывают,
да нам ползу во нуждах наших содевают.
Молитися присно
Молитися Господу присно подобает,
но како сие дело от кого бывает,
Поне же ина многа нужда есть творити
и неподобно выну в молитве пребыти?
О сем ведателно есть, яко требе знати,
како выну в молитве нужда пребывати.
Не то завещается, да весь день молимся,
но присно сердце к Богу имети да тщимся,
Желание и любовь к Нему возносяще,
тою, аки молбами, потребных просяще.
Сия же безпрестанно может в сердце быти
и внегда нам иная делеса творити.
2
Непрестанно молится, иже соблюдает
всяко время молитвы, а не унывает,
И еже, аще деет, то во славу Бога;
сицеву мужу в небе мзда готова многа.
Молчание
Велегласный пророк древле вопияше:
Горе ми есть, яко язык мой молчаше,
Сиречь, грехи людей своих обличати,
Озию о жертве кадилней смиряти.
Многим и днесь горе прилично вещати,
яко не хотят слов во ползу даяти.
Горе, иже грех си не исповедают,
и братии в гресех их не обличают.
Горе и совета здрава не дающым,
удобне той бедным даяти могущым.
Горе не тщящымся правды защищати
и истинны словом правым утвержати.
Горе благо дарства Богу не поющым
и добротворцем си того не деющым.
2
Совершенныя любве благостяжание,
языка от слов многих твердо держание,
Тожде покой истинный людем соблюдает
и к сожитию благу други умножает.
Тожде добродетелей есть совершение
и во страну вечныя жизни вселение.