Вертоград многоцветный

Мудрость имеяй аще утаяет,
чистое злато во землю копает.

8

Что раздаянием в скудость не приходит,
но умножение даятелю родит?
Мудрость, елма бо та иным ся общает,
в уме учителя множенна бывает.

9

Мудрость есть дар Господень, им же просвещает
умы наши на благо и в жизнь устрояет.
Сия ны поучает небесных желати
и в небеси мыслию сердец обитати.
Есть же и ина мудрость, но та не от Бога,
яко учит коварства устрояти многа,
Еже земныя вещы злохитро ловити,
суеты мира сего из лиха любити.
А та земная может быти нареченна,
яко сущая земным вещем припряженна.
Есть и плотская мудрость, яже наставляет
плотских сластей искати, теми ся слаждает,
Учит чреву служити, скотом точны деет,
в блудницех и пияных та место имеет.
Есть мудрость и демонска, яже наставляет
гордитися демонски, и зависть вселяет,
Демон бо, позавидев Богу, разгордися,
точен быти Оному в небеси стремися,
Но елико лукавый умом вознесеся,
толико в мрачный тартар глубоко падеся,
Во нь же подражатели своя низвлекает,
яже злохитрием си в гордость устрояет.
Три убо си мудрости буйства да вмениши,
первую, яже свыше, токмо да любиши.
Тройца сих злых мудростей от Троицы благия
далече влечет душы человеческия.
Едина же горняя к Богу единому
приближает, во Святей Троице живущему.

10

Есть мудрость истинная, есть же и неправа,
ова свыше и блага, си снизу, лукава.
Горняя выну и мирна, нижня любоприва,
ова кротка, чинна, та безчинна, кичива.
Горняя уветлива, нижняя вопреки
неуветливо идет с всеми человеки.
Горняя согласие с добрыми имеет,
нижняя свар, противство и зависть умеет.
Вышняя милостивна всем людем бывает,
нижняя миловати никого же знает.
Вышняя делес благих плоды производит,
нижняя токмо злая деяния родит.
Овая никого же обыче судити,
сия о человецех всех суд весть творити.
Горняя во истинне всегда пребывает,
долная благость себе выну притворяет.
Вы, иже горе в небе желаете быти,
горнюю потщитеся мудрость возлюбити,
Та бо вы на путь правый наставити может
и во шествии трудном удобно поможет.
Та о вас пред Господем имать глаголати,
да благоволит венцем славы вас венчати.
Вознелюбите паки мудрость сего века,
та бо в буйство вечное вводит человека
И с буими девами чертога лишает
небеснаго, во ад же огненный вревает.
Буйствуйте миру сему, а мудри бывайте
Богу, Ему служите, мир же обругайте.
За то с мудрыми девы во светлость чертога
вопущени будете от всещедра Бога.

11

Яже свыше премудрость, есть та феодора,
ея же противница есть демонодора.
Вышняя бо от Бога Самаго исходит,
нижнюю демон лстивый из главы си родит.
Вышняя в отчество си небесное вводит,
нижняя в преисподний ад люди низводит.
Мы горния породы сынове речени,
горнею мудростию да будем правлени.
Тако на гору взьидем превечнаго Бога,
иде же живот вечный и радость всемнога.

12

Паче бисерей честных премудрость ценится,
и ничто ей ценою во вещех равнится.

13

Буйством обдержимии премудрость хухнают,
слепи суще, светлости оныя не знают.