Низость и высота
Шествуяй низу безбеден бывает,
ходяй по версех зданий низпадает.
Тако смиренный чином не боится
беды, ею же высокий томится.
Нищ
Имеяй муж много ничто же имеет,
аще ему злато свое не довлеет.
2
Бог пребогатый нищеты не знаше,
яко в небеси всебогат Он бяше.
Восхотев убо нищету познати,
изволи наше естество прияти.
Познавше, яко та нелегка бяше,
царствие нищым Свое дароваше
За терпение, тем же суть блаженни,
иже нищии духом обретенни.
3
Вениамин десницы Сын истолковася,
Венони — Сын болезни о том же сказася.
Нищии зде Венони воправду зовутся,
но Вениаминове вечно нарекутся,
Яко зде во болезнех выну пребывают,
в небеси же во десных жити ожидают.
4
Иосиф егда брата малейша видяше,
представша себе, сердцем возмущся, плакаше.
Христос Господь братию нарекл малейшую
нищыя за любовь Си к оным теплейшую.
Ту братию егда мы в бедах созерцаем,
достойно и праведно да ся умиляем
И, поелику сила, им да помогаем,
то бо любезно быти Господеви знаем.
Нищета
Честное человеком мерзость есть у Бога,
ни во что суть у Него богатства премнога.
Ненавистная людем нищета почтенна
от Него, во царствии небесном вселенна,
Блаженни бо нищии, Христос глаголаше,
яко царство небесно им Бог Отец даше.
2
Бог всяческих Владыка и Творец всех веков,
человек быв, обнища ради человеков.
Но кая вина сего богатств презрения?
Може с ними строитель быти спасения.
Богословцы две вине того обретают,
яже нам в писаниих своих оставляют.
Первая того вина — яко подобаше
от земных отвратити благих сердце наше
И наставити благих небесных искати.
Нужда убо Самому бяше обнищати,
Хотевшему богатства словом обхудити,
а нищету скорбную людем ублажити,
Да в Себе подаст образ искания горних
чрез пренебрежения тленных богатств долних,
Яже препинание люто содевают
тым, иже благ небесных искати желают.
Вторая вина того — да не причитает
мир богатству и славе, еже содевает
Божества сила, мудрость и милость велика
в обращении к Богу грешна человека.
За то и апостолы нищыя избраше,
и не книжны бывшыя, яже посылаше,
Да богатыя мира и мудрыя славно
обличат о их буйстве пред народы явно,
Да Божию в немощных силу созерцают,
от прелести идолски к Богу притекают.
3
Блаженни суть нищии, но требе есть знати,
коим блаженство вправду лепо приписати.
Нищета трегуба есть: первая — скудости,
втора именуется нищета честности,
Третяя — суетствия, яже разсудите
подобает, да знаем, кую благо чтите.
Первая окаянна, ибо досаждает,
яко противна воли нищих та бывает.
Ради бы они злато и сребро держати,
но того не умеют, ни могут стяжати.
Тем же ю нелюбезно обыкли терпети,
но ропщут много, яко не могут имети.
Неправо строение Богу причитают,
ближния скупостию присно обвиняют,
А себе нещастие злое прилагают
и без разсуждения злобы умножают.
Обычай имут красти, со клятвами лгати
и всякими образы чуждая хищати.
Злая их суть делеса, обаче деяти
милостыню им благо, да бы им престати
От тех злых начинаний и благотворите,
за творящыя милость Господа молите.
Блажен муж, иже нища знает и убога,
от богатаго Бога мзда есть тому многа,
Ни же от милостыни то да отражает,
яко грешником сущым милость ся являет,
Ибо милуяй нища не грех ублажает,
но лице человека беднаго питает,
И щедряй нища не грех хощет ущедрити,
но соестественнику милость сотворите.
Тем не грехи, но праву природу питает,
кто человеку милость, не злобам являет.
Вторая нищета есть похвалная зело,
яко волею взята бывает весело,
Егда кто Христа ради мир сей оставляет
и богатства имети сердцем не желает.
Зде трегубо блаженство мощно усмотряти
и блаженны нищыя сицевыя звати.
Первое их блаженство — яко Христу Богу
подобници деются чрез нищету многу,
Ибо, яко волею Христос убог бяше
в рождении, в животе, нищь и умираше,
Тако они волею убози бывают,
Учителя своего верно подражают.
Сих убо есть царствие, еже в светлом небе,
к нему же воздыхати комуждо есть требе.
Второе их блаженство — во искушении,
ибо неудобь могут быти плененнии;
Яко бо нага мужа неудобно яти,
зане не имать, за что рукою й взяти.
Тако нищий неудобь уловлен бывает,
яко за что й взяти, враг не обретает.
Глаголют же неции, яко не язвляет
змий нага человека, но того гонзает.
Облеченнаго паки дерзает язвити
и смерть ядом оному своим наносити.
Аще то истинна есть, аз не извещаю,
но сию неложную правду быти знаю,
Яко змий ветхий демон от нищих бегает,
зане теми удобно побежден бывает.
На богатыя паки смело нападает
и часто смертоносно тыя уязвляет.
Третее их блажеснтво — во воздаянии,
ибо во честном зело суть обещании.
Царствие небесное им есть обещанно,
веселие вечное им уготованно.
Апостоли нищетни во мире сем бяху,
но суждения миру обет восприяху,
Что, колико есть честно, мощно разсудити
и оттоле нищыя любити и чтити.
Третяя нищета есть — суетства лукава,
яже ни полезна есть, и зла ея слава.
Сию тии людие в мире соблюдают,
иже имения си тщетно оставляют,
Тогда славу мирскую у людей ловяще,
а не за любовь Христа нищету храняще.
Сицеви философи в древных вецех бяху,
иже богатства своя в мори потопляху.
Инии камение честное крушиша
в знамя, яко мирская во ничто вмениша.
Сие вы различие нищеты судите,
а яже есть праведна, тую ублажите.