Вертоград многоцветный

2

Егда неверием Фома удалися
от Христа Господа, в осмый день явися
Христос его ради, язвы показал есть
и, уверив его, образ нам подал есть,
Еже падших во грех не пренебрегати,
но всяким образом недуг исцеляти,
Не, яко о брате Каин глаголаше:
Еда в стражи моей Авель брат мой бяше?
Ни же яко жрецы Иуде рекоша
и в отчаяние паче приведоша,
Егда кающуся реша неистово:
Что к нам? Ты узриши, неутешно слово.
Ведети всем должно, и печаль имети,
еже ближних падших Господу снабдети.
Найпаче началным, им же суть вручени,
прилежателно есть, да будут спасени.

3

Иулий кесарь образ Александров зряше,
младоизображенный, тяжко воздыхаше,
Глаголя: О коль много юн он благ содея!
Аз ничто содеях в дни юности моея.
Тако нам на образы святых подобает
зрети, да блага дела их ум разсуждает
И подобных им тщится скор творитель быти,
да бы с ними в царствии горнем вечно жити.

4

Франтиск именем первый краль Францийский бяше,
сей, яко писание и мудрость любяше
(Ея же родители его не любяху,
но подобием варвар в простоте живяху),
Абие честных дети писаний взискаша,
кралевску люблению тако угождаша,
И бысть в мале времени мудрость разширенна,
образом краля по всей земли умноженна.
Обычай бо есть в людех царя подражати,
еже ему любезно, всем то возлюбляти.
Благо убо есть царству, егда благи нравы
царствуяй восприемлет ради всех неправы.

5

Не толь магнит железо к себе привлекает,
коль благий образ люди к Богу наставляет.

6

Жестоковидно бяше писана икона
честнаго в философех мужа Палемона,
Пред нею же случися увещанней быти
жене блудодейце, еже соблудити.
Она, готова сущи на скверное дело.
неистову блуднику дати свое тело,
Узре образ он страшный, люте ужасеся,
в смешение блудному мужу не дадеся,
Страхом лютым объята, казни убояся,
образом мужа честна злая страсть прогнася.
Колми паче нам верным страх должно имети,
повнегда на иконы святыя воззрети,
На распятие Христа мира Спасителя,
и чистоты плотския и душ любителя,
На Пречистыя Девы икону святую,
или на кую-либо иную честную?
Пред всеми ими страх нам в сердцех да бывает,
от делес нечистоты да преустрашает.
Паче же и самый в нас образ положенный
Божий, по нему же всяк из нас сотворенный,
Боязнь во сердцех наших весма да раждает,
егда похоть на злое дело возжигает.
Действеннейшая сила буди в христианех
образов святых, неже мирских во поганех,
Инако осудит ны блудница оная,
токмо мудра Еллина образ почетшая.
Аще мы божественных чтити не потщимся,
где суть оны, деяти блуд не убоимся.

7

Александр Макидонский Тир град обстояше,
ров велий, бывш пред градом, засыпать хотяше.
Видя же воев леность, в первых, насыпал есть
сам кошь землею и в ров пред всеми всыпал есть.
То видяще, ратници царя подражаху,
в яму ону носяще землю, засыпаху,
И тако приход к граду себе содеяша,
и по мале времени град силою взяша.
Сице царие делом своим возбуждают
на дело вой, елма образ им являют.