В делех намерение имеяй доброе
око имать простое, дел тело светлое.
Зло же намерение — око лукавое,
имать тело делес си всячески темное.
Зла милостиня, яже на блуд намеряет,
злое намерение дело помрачает.
Орел
Хищныя птицы менших восхищают,
терзают ногты мясо и снедают.
Егда же орел силнший прилетает,
все их множество далече гонзает.
Хищныя птицы диаволи бяху,
род человеческ люте похищаху
Прежде рождества воплощенна Бога,
и мучения деяху премнога,
Всех людей душы во ад низвождаху
и во заклепех его заключаху.
Но егда Орел небесный явися,
страшный и силный в вертепе родися
Христос Бог крепкий, тогда птицы тыя
вся утекоша, пред благим худыя.
Ни к тому яве хищати дерзают,
разве точию лестми украдают.
Всяк убо от них страж да будет себе
бояйся ада, хотяй быти в небе.
Оружие
Егда на Голиафа Давид исхождаше,
жезл в руце и пять камень пращеметных взяше.
Ты жезл креста и пращу молитвы святыя
возми, и пять слов умных на враги лютыя,
Сиречь, не многословне, но часто молися,
мало да глаголеши, много же слезися.
2
Бог и естество зверем оружие дает,
много бо от животных с онем ся раждает.
Неким бо рози дани, да ся защищают
и противники своя теми побеждают.
Иным ногты острыя изводи Бог дати,
ко еже наветники своя им терзати.
Иным сила во зубах естеством дается,
да от хотящих бити теми спасается.
Неции во копытах звери сидни зело,
ими же поражают противныя смело.
Птицы в пазногтех, в носе силу свою знают,
и крилами вся обще от беды гонзают.
Ежу шерсть оружие, иным люто жало,
иным яд прирожденный естество есть дало.
Человек ничто же сих в оружие взял есть,
да бы не на брань себе созданна познал есть,
Но еже во покой безпрестанно жити,
единодушно Творца своего хвалити.
Но увы нам, немирно в мире пребываем,
чесо Бог нам не даде, то мы сотворяем.
Смертная оружия тщимся устрояти,
теми ближния нашы на смерть убивати.
О аще бы на враги токмо я вращали,
иже противны Богу себе содеяли,
Извинение неко могло бы служити,
не ожидали быхом осуждении быти.
Но то люте, не благо, яко и на други
и на Божия мечь остр обращаем слуги,
За что милость не может быти нам от Бога,
но Суд лютый и в вечном огни мука многа,
От ея же свободу стяжати потщимся,
со ближними нашими всеми примиримся.
Отец Бог
Сын Божий нас Своему Отцу всыновляет,
Отцем нам нарицати Его завещает.
Иже есть премногими Отец нам винами,
яже аз полагаю вократце пред вами.
Во-первых, Отец нам Он, яко сотворил есть
и душы нашя Своим образом почтил есть.
Вторая вина — яко изволил питати,
яко кокошь птенцы си, от враг защищати.
Третия — яко благим делом научает
и отчески грешащым язвы налагает.
Четвертая — яко Им есмы умножени
всяческими благими, аки Им рождени.
Пятое — яко хощет наследство нам дати,
окрест трапезы в небе Своея саждати.
Толика убо Отца грешнии имуще,
тщимся сынами быти, пресвято живуще.
Святаго Отца чадом требе святым быти,
божественне Божиим нужда сыном жити,
И любовь сынолепну достоит стяжати,
воеже бы ся въправду сынми Его звати.
2
Ветхий Закон Господа Отцем не прозваше,
зане яко царь людем и судия бяше,
Ибо и они рабски Оному служаху,
плотски живуще, за страх Бога почитаху.
Мы днесь Его дерзаем Отца нарицати
за любовь, волю Его хощем исполняти.
От Христа Света суще тому научени,
чаем и в наследие быти воведени.
Новии мы людие, нову титлу даем
Ветху деньми, за любовь Отца нарицаем.
3
Бог всемогущий, Создатель всех веков,
вправду зовется Отец человеков,
Не естественне, несть бо рождением
Отец нам плотским, но сотворением.
Он созда тело, душу сотворил есть,
и во тлю падших Он нас возстроил есть.
Еще Отец Он нам есть, любовию
искупивый ны Сына Си кровию.
О любве дивны! Изволил предати
Единородна за ны пострадати,
Да мы от страсти тако свободимся,
чрез Сына Его Ему всыновимся.
Еще Ся Он нам Отец нарицает,
яко отчески о нас промышляет,
Да во всех нуждных не оскудеваем,
но во доволстве онех обитаем.
Наконец, яко во пресветлом небе
наследники ны устрояет Себе.
Точию требе нам есть тако жити,
еже бы волю Егову творити.
За то бо хощет небо нам отдати
и венцем славы улепотствовати.
Кто убо, сия зная, не потщится,
да воли Его весма покорится?
Аз волю мою, Боже, вдаю Тебе,
да устроиши, яко же Ти требе.
Волю неволник и раб Тебе быти,
неже по моей воли злой ходити.
Развратна воля моя зде бывает,
донеле в моих руках пребывает,
А в Твоих руках она исправится,
по Твоей воли благо утвердится.
Тем же Ти, Боже, аз ону отдаю,
душу и тело, весь ся Ти вручаю.