Плоть и кровь Христова
Дивна трапеза, плоть и кровь Христова,
лежит нам в храмех Господних готова,
Ея же аще ясти не потщимся,
душевней смерти Богом предадимся.
Аще же снемы, недостойни суще,
суд в жизни место приимем, ядуще.
Что же содеем? В сердцах умилимся,
в недостоинстве сами осудимся.
Яко же сотник древле сотворил есть
и Христа Бога в милость преклонил есть,
Тако бо и нам милосерд явится,
не Судия, но Отец поставится.
Плоти укрощение
Хотяй коня в потребу свою изучити,
донеле же конь юн есть, нужда укротити;
Егда бо состареет, некротим бывает,
во жестоте природней свереп погибает.
Тако хотяй плоть свою благим обучити
долженствует в юности ону укротити;
Аще бо в страстех ону к старости пустиши,
погибель, не исправу оныя узриши,
Но ея со твоею погибель случится,
яко конь со всадником в ров купно валится.
Плотское смешение
Смешение плотско мало услаждает,
велику же мерзость послежде раждает.
Аммон, сын Давидов, с сестрою смесися,
но колико сердцем потом возмутися:
В болшей ненависти ону имеяше
по гресе, нежели первее любляше.
Побор
Во Епире на суше источник явися
зело хладный и здравый, всем же возлюбися.
Яша болнии мнози тамо притекати
и, пиюще ту воду, здравие приимати.
Князь страны от советник на то понуждены,
да побор на пиющих будет уставлены.
Егда убо от воды побор уставися,
абие той источник в землю возвратися.
И тако чрез лакомство воду погубиша,
ею же немощь туне людие целиша.
Погибель
От главы начинает рыба истлевати,
от началных обычай градом погибати,
Какови бо в начале сущии бывают.
тако прочий жити весма подражают.
2
Корабль иногда извне от волн погибает,
иногда от бремене внутрня потопает.
Мы иногда от лукавств врага изчезаем,
иногда же от наших внутрних погибаем
Погребение
Симонид рифмотворец по мори плаваше,
егда у пристанища некоего сташе,
Обрете тело наго, земли не отдано.
Взем е, сотвори быти в яме закопано.
Обноществовав тамо, виде погребенна
человека собою, во сне си явленна,
Глаголюща то к себе: Се тя увещаю,
утро да не плывеши, милость ти воздаю.
Возбнув, Симонид начат сон той разсуждати,
веру поем, не хоте от брега отстати.
Инии, смеющеся, от брега отплыша
и, возвеявшей бури, потоплени быша,
Видящу Симониду. Тако возплатися
соблюдением милость, яже сотворися.
Он же в горнице нецей вечерю ядяше,
от предстоящих людей сие слово взяше:
Се у врат два юноша надолзе толцают,
да изыдеши скоро, тебе призывают.
Он, не ведый, кто бяше, изшед, соглядаше
и се ни единаго мужа обреташе,
А в то время горница она повалися
и кто-либо в ней бяше, до смерти убися.
О чюдо! Егда кого Вышний соблюдает,
необычными средствы от смерти спасает.