11
Вражия стрела — похоть, лук — пресыщение;
отьими сытость, мало будет стремление.
12
Жупел огня есть пища, а вино — похоти;
лиши вино, не бойся оныя во плоти.
13
Адам аще бы не ял плода возбраненна,
не вредила бы Евва, аще и прелщенна.
Ни Адаму, ни чадом, сама бы страдала,
яко змия лукава гласа послушала.
Тако, аще в нас похоть от сласти вкушает,
не вредит, аще воля ей ся не слагает.
Повнегда же похоти воля приложится,
в то время грех ся родит и душа вредится.
14
Похоть всех злоб корень, злы ветви пущает,
брань бо со плотию духови раждает.
Препятие душе к благим делом деет,
аки бо связанна сущи, в тех не спеет.
Печаль присну родит, люте разжигает,
ко греху скверному волю прилуждает.
Уму мрак наводит, бесным точно творит,
совесть истребляет, и вконец позорит.
15
Адама Евва яблоком прелстила,
сладостей райских онаго лишила.
И похоть сластми плоти нас прелщает,
радости рая горняго лишает.
16
Инок благоговейный в келии живяше
и прилежно Господу выну работаше.
Тому враг позавидев, нача возбуждати
похоти в плоти его, к блуду искушати.
Он терпе долго время, даже увидяше,
яко не к тому стати противу можаше.
Пришед ко Распятаго образу святому
и нача глаголати, аки ко самому:
Молю Тя, Христе Боже, чрез раны святыя,
изволи утолити страсти ми лютыя,
Уже бо не могу их аз к тому терпети,
виждуся во пламени жестоце седети.
Страсть мя одолевает, помози ми, Боже,
уже бо в том подвизе дух мой изнеможе.
Аще не изволиши скоро пособити,
иночества одежды имам низложити.
В образе мирянина во мир возвращуся,
донде же сластми плоти довле насыщу ся.
По изречении сих, елма нощеваше,
искушение люто излиха страдаше,
Обаче претерпел есть пособием Бога,
дающаго терпящым возмездия многа.
Утру же бывшу, нача ризы низлагати
и к образу распята Христа глаголати
Со многими слезами: О всещедрый Боже,
се от бремене страстей раб Твой изнеможе.
Не к тому их сверепству могу преко стати;
се иночества ризы, изволи прияти.
Аз в печали сердечной в мир ся возвращаю
насытити плоть сластми. да свободу знаю.
Тогда Распятый рече: Брате, что твориши?
Тако страстей телесе ти не угасиши.
Облецы ризы паки, Аз тя не оставлю,
скорое пособие в брани тебе явлю.
Да веси же то, яко паче распят быти
хотел бых паки за тя, да бы искупити,
Аще бы нужда была, неже тя пустити
от иночества во мир, еже бы блудити.
То слышав, инок в слезы многи разлияся,
о нестерпении си излиха каяся
И рече к Распятому: О Боже всеблагий.
Искупителю душы моея предрагий,
Поне же Ты хощеши помощь мне даяти,
еже противу кознем демонским стояти,
Аз паче имам душу мою положити,
неже противу Тебе волею грешити.
До конца жизни раб Твой хощу пребывати,
токмо изволи помощь мне Твою даяти.
По сей сладцей беседе инок ползовася,
пособствован от Христа Господа познася,
Ибо толиких к тому страстей не страдаше,
но во удобь стерпимых до конца живяше.