Проказа
Прокаженныя люди древле изгоняху
ис полков Израилских и вне их вселяху.
Донде же очищенным от проказы быти.
тогда бо волно бяше в полк ся возвратити.
Прокаженни суть, иже в злобе пребывают
и иныя злобою своею вреждают.
Сицевы из общества требе изгоняти,
еже бы прочым от них вреда не прияти.
Удалени от благих, да ся исправляют,
аще во общение приити желают.
2
Трегуба проказа в Иудеи бяше:
плоти, домов и риз. та бо оскверняше.
Точне духовная трегуба бывает,
яже многи люди сквернит, умерщвляет.
Плоти есть проказа блудодеяние.
всех вид нечистоты неотбегание.
Проказа есть дому, елма злыми нравы
дом некий растлится с пороком неславы,
Яко блудилища или корчемницы.
в них же злая деют злии пияницы
Проказа ризная тыя оскверняет,
излишествовати яже враг прелщает,
В множестве риз светлых. и изобретати
образы новыя, како сострояти
Паче обычая, цены не щадяще,
имению тщету многу наносяще.
Проклятие
Апостоли святии яже проклинаху.
в измождение плоти демоном даяху.
Попущением Бога тии зле страдаша,
абие бо демони оны похищаша
И тяжкими муками тело их дручиша.
донде же прощение слезми получиша.
Амвросий святый о сем мирови вещает,
ему же Феодорит согласен бывает.
Промысл Божий
Дивне Господь о людех Своих промышляет
и в последних потребах помощник бывает.
Случися иерею некогда ходити
чрез горы Алпииския и в лес заблудити
Во время зимы; к тому, в ров великий пасти
и не мощи из тоя излести пропасти.
Чрез дни некия тамо хлад и глад страдаше,
подлез под камень висящь, смерти ожидаше.
В нощи луна возсия, и се змии мнози
пресмыкаются мимо лежащаго нозе.
Ползут ко некоему каменю, языки
лижут чрез неко время той камень великий
И по часе в ямины своя ся вращают,
сие же чрез три нощи рядом сотворяют.
Бедный иерей нача в себе помышляти,
яко не всуе ходят каменя лизати.
Востав, прииде к нему, такожде лизаше,
абие в себе крепость от того познаше.
Без пищи насыщен бысть. и возвеселися.
благодаря Бога, тем каменем живися
До месяца априля, во нь же наидоша
случаем людие. и его извлекоша.
О Господи всещедрый! коль милосерд еси.
из зуб смертных бедныя исхищати веси.
Проповедник
Егда проповедник грехи обхуждает,
любо грешащу нож в язву въдружает.
2
Кто от недостойнаго честно отлучает,
той муж яко же уста Божия бывает.
Но то проповедници слова содевают.
егда от злоб к благости люди обращают
Увещанием своим; того ради звати
леть я уста Божия и честь воздаяти.
Слушати словес онех конечно есть требе,
яко же изходящих из уст Суща в небе.
Ибо и Христос рече: Иже вас слушает,
о апостоли. Моя словеса внушает.
3
Проповедници слова како имут жити
и какови учимым людем должни быти?
Божественный Василий оны наставляет,
елма добронравия им правило дает.
В первых, яко пастыри овцам да бывают,
в нужде да своя за ня душы полагают.
Паки, яко врачеве должни оным быти,
всеснисходно болезни душевны целити
По завету Господню, да в устрабление
приведут душы онех и во терпение,
Яко силнии слабых немощи носяше
и за любовь Христову досады терпяще.
Еще родителскую любовь проявляти
должни и, яко чадом своим, угождати,
Словом благовестия сладко питающе,
и живот свой за онех живот отдающе.
К сим. яко споспешници Богу имут быти,
в обращении людей тощно ся трудити,
Работни творящеся за Церковь Божию.
да делесы благими разширяют сию.
При сем насадители древес да бывают
словесных в саде Церкве. ли да прицепляют
Рождие к Христу Спасу, Древу благу сущу:
Аз Лоза, вы рождие, яве глаголющу.
Вредныя да от древа ветвы отсецают
и плодотворящыя вся да отребляют.
Наконец, зодчым точни они да бывают.
Церковь Божию в славу Его назидают
На камени, иже есть Христос божественный.
в основании Богом Отцем положенный.
Сей долг — проповедников, о нем же помните,
иже ся учители в Церкви быти мните.
Пророк
Род Израилск Божия гласа не терпяше,
да Моисий к ним глаголет, не Сам Бог, прошаше.
Бог же обещался есть им пророка дати.
точна Моисию. и тем к оным глаголати.
То же обещание делом исполнися.
егда во Вифлееме Христос Бог родися:
Подобен Моисиеви приятием тела,
Иже паче Моисия творил чудна дела.
Бог бо есть по существу, обаче смирися,
не на горе, но в худе пещере явися.
Не в величестве славы, но во смирении,
промышляя о нашем от грех спасении.
Не на горе горящей огнем показася.
но в скотских лежяй яслех, пелены связася.
Не во гласе труб страшных, но яко младенец,
молчяй или рыдаяй. Левыя первенец.
Не в молниих и громех, но егда молчаху
всяческая, во среде нощи тиха бяху.
О смирения многа Бога превелика!
Нам бысть точен плотию Царь всех и Владыка.
Смиряйтеся убо вси. Христа подражайте.
Бога паче И, неже пророка вси знайте.