Сон
Сон брат есть смерти, тем же, егда спиши,
ничто знаеши и ничто же зриши.
Множицею же сон брату отдает,
яже на ложах сладце учреждает.
Егда Олоферн исполни вина спаше,
рукою жены обезглавен бяше.
Сном и Сисарра елма усладися,
в скрания колом от жены пробися.
И Гевостей спящь от недруг заклася,
бойся и кождо чрез сон смерти на ся.
Сампсон пресилный спящь власов лишися
чрез жену, от враг во плен похитися.
Тем же достоит Христокрасным людем,
готови на смерть да во всяк час будем.
2
Сон — образ смерти, пред сном дремание
являет плоти изнемогание.
По дремоте сон обычно бывает,
по немощи смерть в жупища вселяет.
А яко сон есть покой от работы
дневныя в мире всесуетном плоти,
Тако от трудов мира свобождает
смерть человека, егда преставляет.
Паки, яко спяй заслуги не деет,
тако умерший заслуг не имеет.
Еже из мира им есть принесенно,
по достоинству то будет цененно.
А в оном веце никто заслужится,
токмо что в мире заслужил, мездится.
Сосуд
Гордии человецы — полнии сосуди;
тщии суть паки, иже смиреннии люди.
Егда же Иелисей елей умножил есть,
праздныя тем сосуды туком исполнил есть.
Тако в праздныя злобы душы Бог вливает
милосердие, еже елей знаменает.
Извержим убо злобы, праздни тех явимся,
да милосерда Бога даров исполнимся.
Союз
Тирреос камень, цел сущь, верху вод плавает,
елма же раздробится, в онех потопает.
Град, союз храняй, выше всяких бедств носится,
тому же растерзанну сущу, испразднится.
Спаси Бог
Иерарх некто преподобен бяше,
по званию си вся дела творяше.
Тому некий муж яблок сосуд дал есть,
вящша от него дара ожидал есть.
Он же прием дар, ничто воздаяше,
токмо Спаси Бог ему провещаше.
Отьиде скорбен яблока принесый
и ят роптати хулными словесы
На мужа свята, иже, увешенный,
веле, да будет призван оскорбленный.
Тому пришедшу, сице глаголаше:
Да зриши, брате, яко слово наше
Спаси Бог имать вящшу силу в себе,
нежели дар твой, делом суди тебе.
На мале убо свитце написал есть
Спаси Бог, и в длань мерила приял есть.
На едной чаше свиток положил есть,
на другой — сосуд со плоды въместил есть.
Мерила подъят, слово тяжко бяше,
плоды с сосудом преодолеваше.
Раб Божий рече: Се суд божественный,
зри, како мною еси обижденный.
Роптавый, видя вину свою быти,
архиерея начал есть молити
О прощение. Он же дарова то,
и бысть прощенну честно, яко злато.
Иже наставлен, к тому не ропташе,
слово Спаси Бог всечестно держаше.
И ты, чтый, словом тем доволен буди,
егда за дары рекут тебе люди
Спаси Бог, ибо сам Господь воздает
небом, кто слово сие почитает.
Сребреник
Самарянин ов благий, иже уязвленна
от разбойник на пути мужа поверженна
Помиловав, прилежа, еже исцелити,
даде два сребреника, да бы й лечити.
Христос Самарянин есть, ибо страж есть правый,
уязвленный демоны род помиловавый.
Дал гостинником Церкве сребряны две цаты
во иждивение, да леть есть врачевати.
Два сребреника еста Ветхий Закон с Новым,
или Таинства Церкве со словом Христовым,
Или две заповеди о любви спасенней,
о хранителной ближним и о божественней.
Сих употребление язвы исцеляет,
здравие первобытно и в путь крепость дает.
Сребро
Сребро аще ся о вещь белу отирает,
черно знамя по себе на ней оставляет
В знамение, яко, кто сребру приложится,
аще чист есть от всех вин, сребром очернится,
Яко то мрак греховный имать выну в себе,
и злата, яко блата, хранитися требе.
Сребролюбец и злорасточитель
Мерзостен Богу есть сребролюбитель,
равне — безчинный того расточитель,
Ов бо несытно чуждая хищает,
сей себе и дом потребных лишает.