Вертоград многоцветный

Белыя овцы к нему обращенны,
яко чрез него мир есть убеленны
Водами бани чистыми святыя.
Сам он омыся, теми же омы тыя.
Краснии цвети то нам извещают.
яко доброты красоту раждают.
Человек цвет есть, его же красота
есть всяческая душевна доброта.
Зриши древеса, в плоды гобзовита,
та знаменуют всяка нарочита
Мужа и Богу, и людем угодна,
в добродетели различныя плодна.
Таковых древес никто посецает,
и добрых людей Бог не истребляет.
Тщися ты убо добродеяй быти,
аще хощеши зде и в небе жити.
Тебе самому плоди плод сотворят,
егда тя в горнем Сионе водворят.
Другая страна что ны научает.
яко иерарх руце простирает
К Христову кресту, им же мир спасеся,
из плена адска к Богу привлечеся?
Молит Господа силу креста дати
ему на враги, да бы я прогнати
От стада овец, оному врученных,
жезлу крестному выну приученных.
Черныя овцы к нему прибегают,
убелитися чрез его желают.
Ведят, что имать власть я убелити,
егда изволит от грех разрешити.
Он убо руце горе воздезает,
силою креста дело совершает.
Зриши и птицы, парящи высоко.
Тыя аще зрит хитра стрелца око,
Не может онех парящых язвити,
ждет, даже сядут на древе почити.
И демон сущих в трудех не стреляет,
того он ловит, кто рад почивает.
И воды чисты всегда пребывают,
в течении си яже не устают.
Плод их суть рыбы зело нарочиты.
Трудися выну, таков будеш и ты,
Плоды духовны полно принесеши,
в чистоте плоти и духа будеши.
Леность всему есть велий корень злому,
всяк неключим есть ленивец никому.
Что писание сие. брате, зриши,
ума очеса зде да приложиши.
Тогда ти полза душевная будет,
ея же память твоя не забудет.
Царь се Волтасар Перский написася,
иже в покойство плоти древле вдася.
Ктому, пианству вина приучися
и женам красным крепко прилепися.
Свинию держит, яже знаменает,
яко сицевый в скерне пребывает.
Аще бел саном, или светла рода,
но кал и блато, свинская порода,
Каляет белость си нечистотою,
гнусными нравы, всякою злобою.
Аще в нос колце даси вепрю злато,
обаче риет кал и смрадно блато.
Иде же жабы, ехидны легают,
тамо свинии ради почивают.
Тако ленивец честь си погубляет,
в блате греховном рад ся обращает.
Кто же свинию гладит ублатненну,
иже одежду носит узлащенну?
Всяк ю отгонит от себе далече,
тако ты мерзок, скверный человече
Аггелом святым и всем честным людем,
убо потщимся, да нескверни будем.
Праздность отринем, яко корень злобы,
дабы гонзнути адския утробы.
Архиерейство аще сан великий,
возносяй люди в аггелския лики.
Обаче бодрость то в нем содевает,
а не одежда, юже облачает.
Ленивый пастырь овцы погубляет,
гладом я морит, волка насыщает.
Сам или волку хищну подобится,
или сквернами вепрю приложится.
Таков бе Удон в Майдебурском граде,
иже всеблудно живяше в прохладе.
Того зде ради с свинми написася,
яко в греховном блате рад валяся.
И яко люди таковы любляше.
им же нрав свинский ему точний бяше.
Змии, чрепахи, жабы знаменают,
что его дела оным ся равняют.
И всяк ленивец есть древо неплодно,
посечению и огневи годно.
Птица спящая его жь знаменает,
юже удобно стрелец убивает.
Егда кто празден седит и без дела,
той на ся врага сотворяет смела.
Тогда он сети втайне заставляет
и грехов смертных стрелми состреляет.
Хищает душу в сквернолюты руки,
во ад низносит на вечныя муки.
Иде же горе, горе, горе, горе,
бездна мучений, огненное море.