Вертоград многоцветный

8

Адам с Еввою прежде, неже согрешиста,
нага, кроме одежды всяческия, быста;
Обаче никоего срама взаим знаста,
яко страстми своими силно обладаста.
Егда же плод древесе возбраненна взяста,
срам о наготе своей абие прияста.
Крыстася друг от друга, тогда Господь има
дал есть кожу в одежду рукама Своима.
Одежда убо грех наш выну обличает
паче, неже красоту плоти содевает.
Тем несть лепо ризами почести искати,
паче на ня возревшым должно есть рыдати
О тщете невинности, юже погубихом,
елма еще семенно во Адаме жихом.

9

В преступлении много Адам согрешил есть,
многия во едином гресе сотворил есть,
Ибо гордость от него тогда в деле бяше,
егда, яко Бог быти, сердцем си желаше.
Святотатсва грех паки тогда исполнил есть,
елма Господу себе умом исхитил есть.
Убийство скаредное онем совершися,
егда с племенем смерти должен сотворися.
И блуд духовный бысть им в той час сотворенны,
елма в целости ума змием бысть растленны.
Татбы преступление злое содеяся,
егда плод запрещенный в снедь от него взяся.
Лакомства же пороком тогда осквернися,
елма паче доволства имети стремися.
О греха злоплоднаго! един умножися,
им же весь сонм нашего рода умертвися.

10

Адамово блаженство превелико бяше,
сам един во всем мире область содержаше.
Но недолгое время онем веселися,
ибо во малех часех блаженства лишися.
Преслушания ради изгнася из рая,
стан невинности погубль, впаде во лютая,
Во труды и болезни, смертен сотворися,
преестественных даров обнажен явися.