Благотворение
Благо творя недругу, в друга преложиши,
из жестокаго Савла Павла сотвориши.
2
Ничто во человецех есть божественнее,
яко же бедным людем благотворение.
3
Тит кесарь римский благотворив бяше,
никто от него без блага хождаше.
В един же вечер дела разсуждая,
себе внимая,
Помяну, яко в день той не содея
никому благо. Абие жалея,
рече: О, друзи, благо не створил есмь,
день погубил есмь.
О, добродетель право христианска
от человека изьиде поганска!
Нам бы то сице достойно творити,
вся дни судити.
Еда что в кий день благо сотворихом,
алчнаго, нища еда насытихом,
или что ино, яко подобает,
кто закон знает.
Аще же узрим, яко работахом
чреву, а ничто благо содеяхом,
рцем: Оле, ничто добро сотворихом,
день погубихом!
Но негли вся дни тако изживаем,
ничто же благо ближним содеваем,
наши ковчеги наполняти тщимся,
на то трудимся,
Забывше, яко, что кто засевает,
во время жатвы ту вещь пожинает,
и мало сеяй малы рукояти
имать прияти.
Кто же обилно семена метает,
обилны плоды в гумне сопрятает
в препитание и себе самому,
и всему дому.
Подобне, аще кто творит премногим
благо ближним си, найпаче убогим,
воздаяния приимет от Бога
в небеси многа.
Творяй же мало и мзды не толики,
яко же щедрый, примет от Владыки,
а ничто сотворшь, ничто же на небе
спрятнул есть себе.
Не имать почто той ити до неба,
не вкусить вечно животворна хлеба,
с несотворшими милости часть тому
в огненном дому.
С козлы, не с овцы оному стояти,
егда по делом имать воздаяти
Судия правый и осудит его,
врага Своего.
Идете, речет, во огнь проклятии,
милости ближним си не сотворшии,
с демоны купно в огнь вечный идите,
муки терпите.
Сие ведуще, вы благо творите,
не чреву тучну, но ближним живите.
Вся Бог всещедрый вам за человеки
воздаст во-веки.
4
Бисер под ноги вепром посыпает,
неблагодарным кто благо творяет.
Благотворение Божие
Великая благодать великаго Бога
великая нам творит, а та зело многа.
Многогрешным нам велит отцем Себе звати
и благоволил ны есть во сыны прияти.
Попечение о нас отческое деет,
к болшым нуждам скорее с помощию спеет.
Множицею же нужды наша предваряет
благодатми Своими, в путь благ устрояет.
Частократ же обыче множае даяти,
нежели мы дерзаем от Него желати.
Дает же благим и злым, да не одолеет
Его благости наша злоба. Бог то деет.
Его же благость и нам должно подражати,
неодоленным злобы дружными бывати.
2
Благотворения зело суть премнога,
яже вси приемлют людие от Бога.
Он из ничесого плоть нашу создал есть
и дух оживляющь во ону влиял есть,
Его же образом Своим украсил есть
и вся животная ему покорил есть.
Мир и вся, яже в нем, кому подчиняет?
Человеком, яже держит, соблюдает,
О всех промысл деет, живит и питает
и венец в небеси славы соплетает.
Сия суть общая от трилична Бога,
суть же и чрез Христа иная премнога.
Первое чрез него добротворение
преестественное есть воплощение.
Яко благоволил плоть нашу прияти.
по человеческу нас деля страдати.
Второе есть, яко Сам люди учаше,
на путь спасения в правде наставляше.
Не яко языки светом естественным,
или чрез твари Си законом присенным,
Ни яко Исраилск древле род учаше,
аггелы, пророки егда посылаше.
Не в сенех, в образах нам тайны явил есть,
но Сам Христос Господь правде научил есть.
Да знаем Господа в Троицы единаго.
Отца купно с Сыном и Духа Святаго.
Третее суть образы, яже подаяше,
вся добродетели егда проявляше:
Смирение, кротость, милость, любление,
пост, молитву, труды верным в спасение.
Четвертое есть нам добротворение,
от греха и смерти нас изволение,
Еже страстию Си изволи свершити
и смертию плоти, да бы вечно жити.
Пятое есть, яко не токмо остави
грех и казнь, но к тому сыны нас постави
Отцу небесному, еже наследите
царствие небесно и в нем вечно жити.
Шестое добро есть грехов прощение
Его заслуг ради, за сокрушение,
Ибо, елижды кто во грехи впадает,
токмо бы жаль имел, Бог тыя прощает.
Седмое есть благотворение Его,
яко сотвори ны общники Своего
Тела пречистаго и крове святыя,
кающихся душам живот дающия.
Оле благодатей, оле щедрот Бога!
Паче песка морска та нам суть премнога.
Что имамы Тебе, Боже наш, воздати?
Должни имя Твое выну прославляти.