Внушение
Многих Бог не внушает по их хотению,
да внушит глас их о том, что есть к спасению.
Тогда же не гнев им Свой, но милость являет,
ибо, добра им хотя, злых не попущает.
Гнев паче изъявил бы, аще то подал бы,
его же на зло свое некто возжелал бы.
Тако врачь в фебре сущым воды не подает,
зная вредну ту быти, а он благ желает.
Возвращение чуждых
От праведных имений милостыня честна,
та приходит во руце Господа небесна.
Та грехи чистит, душу смерти избавляет
и в царствие небесно по смерти вселяет.
А еже неправедне сребро соберется,
обижденным конечно то да воздается.
А тым несущым, сродству то отдано буди,
разве аще ближнии изведутся люди.
Тогда Церкви и нищым мощно раздаяти,
от маммоны неправды други си стяжати.
Иначе милостыня неприятна Богу
и пути не устроит к небесну чертогу.
В первых убо, аще что кому похищенно,
обижденному буди весма возвращенно.
Паки, еже лихвою богатство собранно,
обижденным да будет и сие отданно.
Еще, что от подданных неправо вземлется
нуждею владеющих, им да воздается.
К сим, святопроданием что будет стяжано,
святокупцем да будет некосно отдано.
Да ся оба каета за грех той лукавый,
и купивый святая, и та же продавый.
Наконец, краденая вещ да возвратится,
могущым бо отдати грех не оставится.
Сицева имения и точная многа
не взятна в милостыню от праведна Бога,
Разве аще никако мощно возвратити,
или возвращением беда имать быти.
Тогда духовна мужа совет восприяти
полезно и по тому сребро расточати.
Не о сребре же токмо сие знати требе,
о всех злых стяжаниих всяк да мыслит себе.
Ризы, скоты и села нужда возвращати,
и все ино, что чюждо может ся назвати.
Иначе неподобно есть спасенну быти,
аще кто не воздает, могий возвратити.
Воздаяние
Кто-либо в дом свой Христа Господа прияше,
комуждо возмездие благое творяше.
На браце в Галилейстей Кане егда был есть
в скудости вина, воду в вино претворил есть.
Симоном фарисеем елма учредися,
тогда грешница от грех многих свободися.
Егда в дому Закхея мытаря виташе,
спасение домови его всему даше.
Паки у фарисея в дому возлежал есть,
водный труд имевшему здравие подал есть.
Матфей же Христа Бога брашны учредил есть,
а Господь апостола его сотворил есть.
У Марфы и Марии Христос Бог витал есть,
брату их умершему живот даровал есть.
В дом Петров елма вниде, тещу уздравил есть,
весма везде благая людем Он творил есть.
Тако и нам достоит благая деяти,
во воздаянии благ Христа подражати.
2
Христианско есть дело досады страдати,
а злобы никако же за зло воздаяти,
Но паче побеждати благостию злое,
дело то воистинну есть божественное.
Зло паки воздаяти за дела благая,
воистинну есть сия злоба демонская.
Егда же кто за добро добра содевает,
человеческо дело тогда совершает,
А егда кто зло за зло тщится сотворити,
лютосверепу зверю хощет точен быти.
Ты, человече, хоти лучшее избрати,
еже за зло благое людем воздаяти,
Да будеши подобен Богу всещедрому,
не людем, ни демону, ни зверю лютому.
Воздаяние злое
Василий святый, хотя честь воздати
Иулиану, умысли послати
Хлебы ячменны три, яже имяше
и сам во пищу плоти приимаше.
Посла усердно, чая благодати,
но злый отступник зле тщася воздати,
Посла бо за то Василию сена,
рек: Се за ячмень буди ти премена.
Скотску ты пищу ячмень дал нам еси,
скотску и от нас сено в мзду отнеси.
Святый же отец сице отвещаше:
Что сами ямы, то бысть тебе наше
Приношение; ты же воздаеши
весма снедь скотску, из нас ся смееши.
Подобне мир сей обыче творити,
за дары честны худыми дарити.
Кто ему службу и дружбу являет,
многажды вражду во мзду познавает.
Или тленныя вещи, точны сену,
миролюбивым дает во замену.
Не тако Господь Бог нам содевает,
за дары худы благия воздает;
За временныя — вечныя на небе,
убо даяти дары Ему требе.
Не хощет Он их, но нам есть полезно,
сице бо стяжем царствие небесно.
Не хощет даров Бог, но воли благи,
та с чистым сердцем дар Ему предрагий.
Тем же две цате нищыя вдовицы
Христос приял есть над многи златницы.
Усердство ея изволил прияти,
паче богатых ей похвалу дати.