Врази три
Кийждо человек врага си имеет,
иже пакости в пути ему деет.
Мир, плоть и демон обычно стужают,
рай заключают.
Торжище кратко, в пути беда многа,
нуждна есть сладость Божия чертога.
Кто ж ту хищает? Нужду деяй себе
вселится в небе.
Вран Ноев
Вран, иже из ковчега Ноем испустися,
обрет трупы, не к тому в корабль возвратися,
Но от едина трупа на другий леташе,
донде же утонути, теми ся питаше.
Точне богатитися хотяй содевает,
аки из трупа на труп лакомо летает,
Егда из торга на торг, с греха в грех приходит,
из злобы в злобу, токмо да прибытки родит.
Не вращается в ковчег Христа благодати,
тако нужда бывает в бездне утопати.
Врата в небо
Святое Писание мощно врата звати,
яже учителие ведят отверзати
Ключами языков си. Сими вход бывает
к истинне веры живы, яже впровождает,
Яко же дверь творая ко Самому Христу,
Его же даде нам Бог за Дверь исту чисту,
Да очистшеся от грех, идем Им к чистому,
во нь же скверна не входит, граду небесному.
Аз есмь дверь, рече Христос, иже Мною идет,
вечну пажит обрящет, елма в небо внидет.
Сими дверми, братие, троими ходите,
Бога в Тройце едина онеми ищите.
Тройцею дверей Тройцу обрящем Святую,
пошли нам, Христе, милость на то действенную.
Врачь
Врачь аще сечет, палит, досаждает,
страдалец любит и мзду ему дает.
Душевна паче требе есть любити,
хотяща язвы смертныя целити.
Аще и жесток негли ся являет,
та бо жестота смерти избавляет.
2
Врачи ови найпаче блажими бывают,
иже не чрез рабы си болных посещают.
Но сами приходяще, касаются делу
и пособие деют уязвленну телу.
Низложше с плещу паллий, лентие приемлют,
тем препоясавшеся, от раны отъемлют
Платенца и своима персты отщущают
раны и в них смердящий оток очищают,
Не гнушающеся тем, но вся тощно деют,
яже хитростию си во ползу умеют.
Сицев Врачь Христос Господь показася быти,
ибо Сам с небесе к нам изволил приити
И отлож ризу славы, в плоть препоясася,
и за дело врачевства всеприлежно взяся.
Разреши связанныя, язвы ощущаше,
оток грехов чищая, всячески целяше.
И не преста делати, даже совершил есть,
недугующий род наш от язв устрабил есть.
И аще въпред случится нам язвенным быти,
благоволил врачевство в Церкви оставити:
Тайны божественныя, да теми целимся,
егда на душах наших паки уязвимся.
О всеблагий се Врачь есть, предобрый Целитель,
с небесе в мир пришедый Христос, наш Спаситель!
Ему же за ту милость что хощем воздати?
Аз от сущих во мире ничто могу знати.
Добр наших не требует, не мзда Ему за то
имения пространна, сребро же и злато.
Жертва хвалы точию приятна Оному,
яко всеми благими зело богатому.
Потщимся убо хвалу Ему возсылати,
благодарство за милость выну воздаяти.
Врачь Христос
Недужный аще врача изгоняет,
врачь во болезни его оставляет.
Он же, не зная себе врачевати,
приходит в нужду, еже исчезати.
Мы вси немощни тяжкими грехами
и целитися не умеем сами.
Прииде убо Христос ны целити.
Иже и мертвых силен есть живити.
Врачь пренебесный, всемирный Целитель,
от смерти рода земна Свободитель.
Но мы, увы нам. Того отгоняем,
егда пластыри Его отвергаем
Здравотворныя, то же часто зело.
Сие Онаго понуждает дело
Оставляти ны в недузе лежати,
потом душами вечно погибати.
Престаним убо Того мы гневити,
да не приложим злобами грешити;
А Он готов есть нас уврачевати,
в болезни место здравие подати;
То же безмездно, токмо покоримся,
заповедь Его творити потщимся.
Врачевание
Немощствуя, к Богу прежде обратися,
та же врачевствы плоти от врачев целися,
Да Бог даст и врачю ум недуг твой познати
и во врачевствах силу благодействовати.
Без Божия помощи врачь не помогает,
и врачевство вящшую язву содевает.
Врачевство на грехи
Приде мних некий ко врачевней газе,
взискуя целбы греховной проказе.
Рече ко врачю в смирении слова:
Повеждь ми ради имене Христова,
Аще имаши былие лечебно,
на грехов болезнь скорбящым потребно?
Врачь даде ответ, всем полезный зело,
им же духовно грехми страждет тело:
Аще хощеши болезнь исцелити,
подобает ти совет мой хранити,
Иже ти буди сицевый от мене:
Послушания поищи корене,
Терпения же листвие приими
и расплоди плод чистоты со всими
Добродетелей превонными цветы,
яже смешь купно, потщися сотрете
Во беззлобия котле, и в сосуде
всесмирения съсыпано то буди.
Раствори посем слезными водами,
а милостыни пореж щедротами.
Возгнети под ним огнь любве ко Богу,
им же теплоту елма примет многу,
Братолюбием тщися прохладите,
да возможеши от него вкусите
Покаяния лжицею святаго,
а помощию Всемилостиваго
Стяжеши целбу, здравие влучиши,
аще сей совет верно сохраниши.
Аз бо истинно тебе совещаю,
тебе, як себе, здравия желаю.