Время
Всяческое дело время устрояет,
безвремение же оно истребляет.
Добро есть во ино время глаголати,
во ино же лучше слово удержати.
2
Преступство, егда требе есть слова, молчати
и в молчания время слово разширяти.
3
Воин в потребно время мечь свой извлекает,
в таково же язык твой слово да вещает.
4
Муж некто преподобный Господу молися,
и се душа плачюща оному явися.
Вопросившу ответа: Аз есмь осужденна
на муки вечныя и во огнь воверженна
За множество грех моих. Но то люто бремя
стражду, яко благое погубих аз время,
В не же мощно ми бяше Богу угодити,
не во аде, но в небе безконечно жити.
О тщеты великия время си губящих,
и пагубна делеса во оном творящих!
5
Летит время си часами
во дни, в нощи, як крилами.
6
Быстрая река бреги подмывает,
время жизнь нашу выну сокращает.
7
В кое время исправа жизни не творится,
то яко погибшее тебе да вменится.
8
Злато погубленное может ся нажити,
времене же претекша несть леть возвратити,
Обаче мы о злате печални бываем.
а время во суетах мира иждиваем.
Не зрим, яко все царство хотел бы царь дати
за един час, слез ради, внегда умирати.
9
Время чювственная вся и чювства свершает,
тоже послежде силу действа раздрушает.
Время златое
Златое время въправду леть есть нарицати,
отнеле же дал Христос закон благодати.
Ибо ныне возможно небо всем купити
и нетленным богатством пребогатым быти.
Не ценою же злата, но за добродетель
царствие небесное продает Спаситель.
Имей добродетели, небо будет твое
и за саму нищету пристяжеши тое.
Сам Христос царство нищих поведает быти,
кто убо не потщится онаго купити?
Тем же благодарствие за то благодати
должни мы есмы Богу щедру возсылати,
И блаженство велие причитати себе,
яко Господь угоди нас грешных потребе.
Прежде нас пожившии окаянни бяху,
толики бо милости Богом не прияху.
Во тме неведения век свой проводиша,
демоны въместо Бога истиннаго чтиша.
Сотворша всяческая Бога не познаша,
царствия небеснаго никако стяжаша.
Кроме света истинны мира отьидоша,
в тму непросветимую адскую впадоша.
Оле окаянства их! Мы же преблаженни
Христовым пришествием есмы сотворении.
Он бо, Солнце истинны, свет нам даровал есть,
идолослужителства тму смертну прогнал есть,
И свободу от ада изволи дарствити,
и небостяжанию добре научити.
Аще убо премудрый Сократ тем хвалися,
яко в граде Афинстем родися, учися,
И аще Македонский Филипп весел бяше,
яко Бог Александра ему дароваше
Во Аристотелева учения лета,
да общник его будет премудрости света,
Много паче нам должно радость восприяти
и хвалитися о том, яко в благодати
Время рождени есмы, можем бо набыти
небесныя мудрости и во веки жити.
За вся же сия славу возсылаем Тебе,
Боже в Тройце единый, живущий на небе
Ведение
Благо есть человеку веждество имети,
но како держателно, нужда есть умети.
Суть бо, иже ведети, да ведят, желают,
сии оплазивости порок набывают.
Суть, хотяще вежества, да ведени будут,
сии тщетна суетства неудобь избудут.
Суть, и иже ведети усердно желают,
да на скверны прибытки дар той обращают.
То же мытоимство есть, пред Богом скаредно
и душам продающих вежество си вредно.
Но и еще инии желают ведети,
да бы назидание духовно имети.
Сие же есть разума похвална у Бога,
сицевым благодать есть готова премнога.
Напоследок, неции тщатся много знати,
да бы иныя люди благо назидати.
Сие дара любве есть и угодно Богу,
заслугующее мзду и вечну, и многу.
Два токмо последняя веждества суть честна,
прочая неполезна, яко суть прелестна.
Зрите убо, веждество хотящий взяти,
како в ползу душевну то употребляти.
Иначе, полезнее без вежества жити,
нежели то стяжавшым в казни вящшей быти.