Вертоград многоцветный

2

Гавриил божественный Деве глаголаше:
Господь с тобою, егда ону целоваше.
Како же бе Бог с нею, того не явил есть
светлым словом, да ищем, нам труд оставил есть.
Различным же образом того дела сущым,
како сопребывает Господь Себе чтущым,
Да узрим, како Господь пребывание с нею,
от нея же родися плотию Своею.
В-первых, со человеки Господь пребывает,
егда что силою Си оным содевает,
Чесого естественне не могут творити,
ту Он естества паче не коснит прибыти.
Сим образом бе Господь с Девою Святою,
ибо удиви на ней чюдну силу Свою.
Устрой ю достойну приятия быти
Бога Слова и плотски Онаго родити,
То же семене кроме, браку непричастно,
без истления девства, всячески безстрастно.
Пречюдно со матерством девство сочетал есть,
нов плодоношения образ показал есть,
Каков прежде не бяше в мире, ни же будет,
донде же в течении си солнце пребудет.
Въторым образом Господь с людми пребывает
правително, повнегда кого управляет
Изряднейшим тщанием во всех делех его,
да никако погрешит от конца своего.
Бяше и сице Господь с Благословенною
Девою Мариею, от век избранною,
Ибо изрядней ея житие правляше,
во всяких деяниих тайно наставляше,
Еже бы ей нимало правды отступити,
но выну греха кроме всякаго век жити.
Яко кормчий корабль свой, ону управляше,
от всяка волнения и бури спасаше.
Тем безбедно к тихому пристанищу приде,
во Сиона горняго покой вечный вниде.
Третий покровителства образ обретаю,
им же со человеки Бога быти знаю.
С Мариею и сице Господь выну бяше,
ибо от бед всяческих ону защищаше.
Яко орел гнездо си выну наблюдает,
аще на время того мало отлетает,
Тако Девицу Господь сохраняше выну,
яко гнездо бывшую едину Си Сыну.
Он ю от гонителя Ирода хранил есть
и во Египте страж ей неусыпный был есть.
Он завистныя люди в гневе укрощаше,
яко никто ей словом тяжким досаждаше.
Егда Сынови ея хулы глаголаху,
на ню же загражденна уста содержалу.
И в год страстей Христовых она бе едина,
со Иоанном зрящи кончину си Сына,
Ему же ругахуся, яко же можаху,
а на Матерь Святую уст не разверзаху.
Покровителством сия Божиим вся быша,
яко никогда врази на ню наступиша.
Четвертый есть промысла образ всеизвестный,
им же со человеки живет Царь небесный.
Бе сице с Мариею Господь твари всея,
ибо выну о нуждных промышляше ея,
Да, истиннаго Бога сущи Сына Мати,
богодостойне может Того воспитати.
Он в Вифлиеме сущей волхвы устроил есть
и злато во потребу нести наставил есть.
Он во Египте жившу с Сыном препиташе,
варварская к ней сердца в милость претворяше;
И по страстех Христовых даде Иоанна,
да тем будет до конца жизни си питанна.
Пятый есть присущия образ божественна,
во печалех сущаго деет утешенна.
Бяше и сим образом Господь с Мариею,
ибо благодатию тешил ю Своею
Во всяческих печалех, наипаче творяше
утеху, егда она при кресте стояше,
Плачющи смерти Сына, ни могла бы жити,
аще не бы изволил Господь ю крепити.
Шестый есть присутствия образ всем Владыки,
елма сослагает Си волю с человеки.
Сице бяше с Девою Господь Пресвятою,
ибо Христос слагаше ея воли Свою.
Сниде с нею в Назарет и послушлив бяше,
еже виде потребно, некосно творяше.
И в Кане Галилейстей тем Матерь почтил есть,
на ея слово воду в вино преложил есть.
Наконец, преимущством даров благодати
и лично Бог Сын с нею изволи витати,
Егда во чреве ея изволи плоть быти
и паче всея твари облагодатити.
Тогда она превзыде светлы херувимы,
превознесеся над вся страшны серафимы.
Нижше Бога точию в чести сотворися,
потом и в небе выше всех лик водворися.
Един Бог болей ея, равнаго не знает,
вся, яко солнце звезды, чины превыжшает.
И мы ю паче всея твари почитаем,
сущу Богородицу песнми величаем.