[6]
Царь славы Христос, от аггел хвалимый,
от всех сил вышних непрестанно чтимый,
в худе вертепе плотию вместися,
вместо престола в яслях положися.
Посреде двою животных бывает,
иже воинством горним обладает.
Его же держит весь мир сей десница,
того рукама пестует девица.
Иже облаки небо повивает,
той пеленами повиван бывает.
Бог велий крепкий зело умалися,
яко же юно детище смирися:
хотя из мира гордость истребити,
смирению же верных научити.
Господь бо гордым сопротиву стает,
смиренныя же он благословляет.
Смиренным небо от него готово,
на смиренныя взирает Бог-Слово.
Взирает на тя, светлый царский сыне,
за смирение Христос-Господь ныне.
Желает в сердце твоем пребывати,
от яслей к нему имать привитати.
Но и у тебе сердце есть готово,
да в нем вселится превечное слово.
Отселе Христос имать в тебе жити,
жизни твоея век благословити.
Иже подаст ти возраст совершенный,
стопы направит в путь душеспасенный.
Даст лета многа, вручит ти державу
и венцем честным увенчает главу.
По летех многих и небо дарует:
того ти душа моя усердствует.
Сам аз под нозе твои припадаю,
на твою службу весь мой век вручаю.
К ГОСУДАРЫНЯМ ЦАРЕВНАМ
[1]
Бог наш превелий в мире днесь явися,
иже прежде век от Отца родися,
матере кроме и превечно бяше,
времене себе начала незнаше.
Днесь начинает в подсолнечной жити,
изволи кроме Отца рожден быти
от чисты Девы, чистоты любитель,
всякия скверны щедрый очиститель.
Величие си излише смирил есть,
егда ся в худый вертеп водворил есть.
Се же, дабы нам светлый рай стяжати
и величество древнее прияти,
еже Адамом первым погубихом,
егда во чреслех его в рай быхом.
О сем ликует церковь мати наша,
ей да сликует и пресветлость ваша.
Благородныя царя славна дщери
Христос отверзает райские двери:
еже в светлости тамо вечней быти,
во венцех славы безконечно жити.
Но впредь да даст вам в мире многа лета
благоденственно жити без навета
от врачь душевных, купно и телесных
таже сподобит всех вы благ небесных.
Того светлости аз вашей желаю,
празднеством днешним верно поздравляю
и молю, милость мне вашу являйте,
ко присной службе тою поощряйте.
Аз же готов есмь выну вам служити,
елико даст Бог в мире тленном жити.
Верности знамя сие содеваю,
смиренно главу до стоп преклоняю.
[2]
Сын Бога жива, Бог, создавый веки,
ныне странствует между человеки:
иже от Отца прежде век рожденный,
внутрьнее Слово, умом изведенный —
матере кроме и без нетления,
нашего ради ныне спасения
на землю сошед, во Деву вселися,
без отца плотски всечисто родися.
Сохранив матерь Деву неврежденну,
яко бе лепо сыну божественну,
иже чистоты теплый есть любитель
и ту хранящих прещедрый хранитель.
Сей днесь во яслях худых почивает,
Девою брегом, а внити желает
во сердца ваша в чистая пречистый
ко царским дщерем и сам царь и Бог истый.
Хощет своея светом благодати
драгия душы ваша облистати,
и во вас жити. Благо с ним вам будет,
к светлости вашей его свет прибудет.
В нем же живуще, дщери дня и света,
можете жити в мире многа лета.
Здраво, спасенно, потом получити
светлое небо и в нем вечно жити.
Тех благ светлости аз вашей желаю,
под стопы ваша главу преклоняю.
За милость к отцу являему вами,
яко благодать есть ваша над нами.
За милость милость буди вам от Бога
и наследие Христова чертога.
Той наследити верно вам желаю,
сам ся милости вашей поручаю.