- Voki ba sekwi-she gavaher, - Rego shwo.
Sekwi-she gavaher es Dukina-ney kuker. Ta porti pepadan in handa, e Alisa gesi hu zai lai iven bifoo ke ela zin sala, por ke jenta bli dwar begin chihi oli pa same taim.
- Fai ba gavaha, - Rego shwo.
- Bu sal, - kuker shwo.
Rego ek-kan Blan Kunila nokalmem. Kunila shwo kyetem:
- Yur Mahantaa mus bekwesti sey gavaher kun osobe striktitaa.
- Wel, si me mus, dan me mus, - Rego shwo idyen tristem. Poy ta pligi brachas e gro-fruni an kuker, tanto ke suy okos hampi bu es viden.
- Aus kwo oni zwo kek? - ta shwo pa nise vos.
- Pepa, maistem, - kuker shwo.
- Melasa! - shwo koy somnishil vos baken ta.
- Kapti ba Somnimaus! - Regina en-skwili-krai - Dekapisi ba Somnimaus! Mah Somnimaus aus! Represi ta! Pinsi ta! Kati suy mustash!
Duran kelke minuta ol juda sta pa garbar: oli trai kapti Somnimaus e mah ta aus. Wen pa fin oli fa-kalme, kuker he desapari yo.
- Bu muhimi, - Rego shwo al aspekti gro-levifen. - Voki ba sekwi-she gavaher.
E poy ta adi-shwo a Regina, pyu kyetem: - Verem, kara, pa sekwi-she ves yu hi mus bekwesti koywan kun osobe striktitaa. May frenta ya tungi por se!
Alisa observi komo Blan Kunila zai myati-lekti lista, al fai gro-jigyas om sekwi-she gavaher.
- Hu ta ve bi? - ela shwo a swa. - Al nau li haishi bu he pai mucho gavaha.
Imajini ba, komo ela fa-surprisi al ke Blan Kunila skwili-krai pa ol mogsa:
- Alisa!
Alisa-ney gavaha
- Hir! - Alisa krai. Por surprisa ela ga fogeti, komo gro ela he fa-gran duran laste pluri minuta, e ek-en-stan tanto kway, ke bay jupa-borda ela renversi jurilok, e oli juriyuan lwo-lwo nich on kapas de publika, e dar li lagi al muvi brachas e gambas sinmahtem, mah-yen Alisa remembi om akwarium kun goldafish ke ela ouran mah-lwo un wik bak.
- Oo, me pregi om pardona! - ela exklami alarmi-nem e begin pren-lifti li zuy kway posible, por ke goldafish-aksidenta zai ye in elay kapa, e sembli a ela, ke oni mus jami li oli e pon inu jurilok tuy, otrekas li sal morti.
- Hakma bu mog fai for, - Rego shwo muy gravem, - til ke oli juriyuan es snova pa swa-ney plasa, oli hi! - ta repeti kun gran emfasa, kan-yen Alisa fixem.
Alisa kan jurilok e vidi ke, por hasta, ela he pon Lizarda al kapa nich, e povre syao wan zai mavi kauda tristem por ga bu mog muvi. Ela pren ta e pon bak pravem.
- Obwol me bu dumi ke se muhimi, - ela shwo a swa. - Al kapa nich o al kapa uupar, ta es ya sirke do same utilitaa fo juri.
Afte ke oli juriyuan defai shok por renversa, e ley kalam e tabula es finden e handen bak a li, li en-gun muy lagan-nem om noti-skribi historia de sey aksidenta, oli exepte Lizarda kel semblem sta tro impresi-ney fo zwo enisa, also ta sim zai sidi al ofnen muh e zai kan sala-ruf fixem.
- Kwo yu jan om sey dela? - Rego kwesti Alisa.
- Nixa, - Alisa jawabi.
- Ga nixa ku? - Rego insisti.
- Ga nixa, - Alisa shwo.
- Es muy muhim, - Rego shwo al turni swa a juri. Li begin noti-skribi se on tabula, ewalaa Blan Kunila interrupti:
- Nomuhim, yur Mahantaa sertem maini nomuhim hi, - ta shwo pa gro-respektaful ton bat al fruni e fai grimasa an ta.
- Nomuhim, sertem, me maini nomuhim, - Rego hasti shwo, e poy kontinu shwo a swa pyu kyetem: "muhim... nomuhim... muhim... nomuhim..." - kom si ta trai samaji, kwel-la suoni pyu hao.
Kelke juriyuan skribi "muhim" e kelke otre "nomuhim". Alisa vidi se, bikos ela zai stan basta blisem fo vidi ley tabulas.
- Yedoh es do nul muhimtaa, - ela dumi.
Al se Rego kel he mangi skribi koysa in dafta duran kelke taim, ta ek-krai: "Silensi!" - e lekti lautem:
- "Regula charshi-dwa. Oli persona kel es pyu kem un milya gao, li gai kwiti judisala".
Oli en-kan Alisa.
- Me bu es un milya gao, - Alisa shwo.
- Un milya hi, - Rego shwo.
- Hampi dwa milya, - Regina adi.
- Wel, me bu go, enikas, - Alisa shwo. - Krome to, bu es normale regula: yu yus he inventi it.
- Es zuy lao regula in sey kitaba, - Rego shwo.
- Dan it gai bi regula numer un, - Alisa shwo.
Rego fa-pale e hasti klapi-klosi dafta.
- Bedumi ba yur desida, - ta shwo a juri pa bulaute tremi-she vos.
- Yoshi ye pyu gavaha, yur Mahantaa, - Blan Kunila shwo al ek-salti pa hasta. - Sey dokumenta es yus findi-ney.
- Kwo es? - Regina shwo.
- Me haishi bu he ofni it, - Blan Kunila shwo, - bat semblem es leta skriben bay hakmiwan a... a koywan.
- Sertem es tak, - Rego shwo, - si sol it bu es skriben a nulwan, lo kel es meno pinchan.
- A hu it es adresen? - un juriyuan shwo.
- It ga bu es adresen, - Blan Kunila shwo. - Pa fakta, ye nixa skriben on ausen-taraf.
Ta depligi papir-lif e adi:
- Yoshi, bu es leta. Es versa.
- Ob it es pa hakmiwan-ney skribitip? - otre juriyuan kwesti.
- Non, - Blan Kunila shwo, - e to es lo zuy ajibe om it.
(Oli juri aspekti perplexe.)
- Shayad ta he imiti skribitip de koywan, - Rego shwo.
(Juri fa-sigure snova.)
- Plis, yur Mahantaa, - Valet shwo, - me bu gwo skribi it, e li bu mog pruvi lo kontre. Leta bu es signati-ney.
- Si yu bu he signati it, - Rego shwo, - se sol mah dela pyu bade. Yu musbi intenti-te lo buhao: otrekas yu wud skribi yur nam kom kada honeste jen.
Al se en-ye aklama: to es ya un-ney intele duma ke Rego shwo duran dey.
- Sertem se pruvi ta-ney kulpa, - Regina shwo, - also haki los...
- Se bu pruvi ga nixa! - Alisa shwo. - Wel, yu iven bu jan kwo es skriben dar!
- Lekti ba, - Rego shwo.
Blan Kunila onpon okula.
- Wo me gai begin, yur Mahantaa? - ta kwesti.
- Begin ba fon beginsa, - Rego shwo muy gravem, - poy fai for til fin, dan stopi.
Ye komplete silensa in sala duran ke Blan Kunila lekti lautem lo sekwi-she:
Li shwo a me e lu ke wen
yu bin she ta koylok,
ta shwo ke me es hao jen
bat swimi ga bu mog.
Lu shwo a li ke me bu go
(e jenta jan ya to).