Судия же повелеша разбити бочку, и обретоша вся по словеси преподобнаго. И даша преподобному бочку, и отпустиша его с миромъ, и к тому никтоже смеяше вопросити его, ловцы же отидоша посрамлени.
Преподобный же Антоний иде ко святителю Никите, радуяся и благодаря Бога о обретении бочки, и поведа вся святителю. Святитель же о семъ много хвалу воздав Богу и разсудивъ благоразсуднымъ своимъ разсуждением, и рече: «Преподобне Антоние, на се бо тя предпостави Богъ по водамъ на камени из Рима, спасителя в Великомъ Новеграде, еще же и бочку вверженую в Риме вручи тебе, да воздвигнеши церковь каменну Пречистей Богородицы и устроиши обитель».
Преподобный же Антоний полагаеть сокровище свое во святительстей ризнице на соблюдение себе, а самъ вземъ благословение у святителя и начат строити обитель; и купи землю около монастыря у посадниковъ градскихъ и со живущими иже ту на той земли людми прилучившимися и до скончания века, доколе Божиимъ строением мир вселенныя стоитъ. И при велицей реке Волхове рыбную ловитву купи на потребу монастырю, и межами отмеживъ и писму вдавъ и въ духовную свою грамоту написавъ. И начатъ труждатися беспрестани чрезъ весь день, и труды ко трудомъ прилагая, нощи же без сна пребывая, на камени стоя и моляся.
И видя его Богом подобное аггельское житие князь великий Мстиславъ и святитель Никита и вси старейшины града того и людие начаша блажити и велию веру имети, тайны же о пришествии его не ведаше никтоже, разве епископъ Никита. И начаша прибиратися братия къ преподобному, онъ же с любовию приимаше ихъ. Мне же священноиноку Андрею Богъ сподобилъ восприяти аггельский образъ во обители сей, и быхъ в послушании и во учении преподобнаго.
Потомъ начатъ святитель Никита советъ совещевати съ преподобнымъ о церкви каменной, — да бы заложити церковь каменну: «На се бо Богъ сокровище вручи тебе». И начат преподобный расчитати обретенное в бочки сребро и злато на строение храму, и рече преподобный: «Надеюся на Бога и на Пречистую Богородицу и на твои святыя молитвы, токмо ты благословение намъ даруй».
Святитель же Никита, размеривъ место церковное и сотворивъ молитву, и начатъ подшву церковную копати своима честныма рукама. И заложиша церковь каменну, и соверши Богъ и подписа чюдно и всякимъ украшениемъ украсивъ ея, образы и сосуды церковными златыми и сребряными, и ризами, и книгами божественными в славу Христа Бога нашего и Пречистыя его Матери, якоже подобаше церкви Божии. И потомъ обложиша трапезницу каменну во имя Сретения Господа Бога и Спаса нашего Исуса Христа. И келии возгради, и ограду устроивъ, и всемъ обилиемъ добре устроивъ, якоже годе.
Имения же преподобный ни от когоже не восприятъ, — ни от князь, ни от еископа, ни от велможь градскихъ, — но токмо благословение от чюдотворца Никиты епископа, но все строяше из бочки сея, еже из Рима Богъ постави водами в Великомъ Новеграде, и поты и труды своими. И аще кто что принесетъ Бога ради потребная от имения своего или пищу, преподобный же темъ братию питая, еще же и сиротъ и вдовицъ, убогихъ и нищихъ питая. И потомъ преподобный з братиею и с сиротами своими начатъ прилагати ко трудомъ труды.
Не по мнозе же времени святитель Христовъ Никита епископъ начатъ изнемогати, и призва преподобнаго, и поведа ему отшествие свое от жизни сея, и, много наказавъ его, отиде къ Богу. Преподобный же в велицей скорби и въ слезах бысть о преставлении святителя Никиты, понеже великъ духовный советъ имеяху между собою.
Божиею помощию и Пречистыя Богородицы и молитвами преподобнаго начатъ обитель распространятися и братия собиратися. И нача преподобный з братиею советъ совещавати, да бы избрати игумена себе во обитель. Многу же избранию бывшу, и не обретоша такова человека. Начаша братия молити преподобнаго Антония: «Отче преподобне Антоние, молимъ тя, послушай насъ, нищихъ, да приимеши священнический чинъ, еще же совершеный намъ отецъ буди игуменъ, да принесеши жертву Богу чисту и бескровну о нашемъ согрешении, да прията будет жертва твоя къ Богу в пренебесный жертвеникъ. Видехом бо толикия твоя труды и подвиги в месте сем, яко никакоже мощи во плоти человеку толиких трудовъ понести, аще не Господь поможетъ». И рече преподобный: «Добръ советъ вашъ, братие, но азъ недостоинъ есмь толикаго великаго сана, но избиремъ себе от братии мужа добродетелна и достойна на толикое дело». Братия же со слезами вопияху: «Отче святый, не преслушай насъ, нищих, но спаси ны». Преподобный же рече: «Буди воля Господня, аще что восхощетъ Бог, то и сотворитъ».