76
Plu kam tri yari Lara vivis che la Kologrivov-familio kam dop muri. Nulu serchis el, e mem elua matro ed elua fratulo, a qui el havis nula relato, lasis audar nulo. Lavrenti Kologrivov esis moderna entraprezisto, inteligenta e talentoza. Il odiis la olda sistemo per la duopla odio da viro, qua povis komprar la tota fisko, e per la odio da parveninto ek la simpla populo. Il celis che su nelegala advokati, qui defensis politikala adversi, ya il suportis mem, quale on dicis jokante, la revoluciono, stimulis striki en la propra fabrikeyo, quankam to signifikus la propra falo kom kapitaliero. Il esis bona pafero e pasionoza chasisto, qua voyajis al Losiny-insuli por instruktar nelegala kombateri sur la paf-agro.
Il esis grandioza homo. Lua spozino, Serafima, esis digna kamaradino. Lara sentis por amba personi granda estimo. E Lara posedis la amo da omni en domo, quale se el esus parento.
En quaresma yaro de elua sensorga vivo aparis elua fratulo Rodion kun solicito.
Per fatua aluri e per naz-parolanta, nenaturala voco il dicis, ke la kadeti en sua klaso kolektabis pekunio pro donaco por la direktisto. On donis a lu ica pekunio, por ke il povis komprar donaco. Ma ante tri dii il perdabis ica pekunio an ludo-tablo til la lasta kopeko. Pos ica vorti, il lasis falar sua laxa figuro en stulego e plorachis. Kande Lara audis to, el frostetis. Rodion durigis: „Hiere me esis che Komarovski. Il ne volis parolar kun me pri ica temo, quankam tu havus sempre ankore povo pri lu. Lara, un vorto da tu suficas! Tu ne permisos, ke me devas kompensar ica shamo per mea sango."
77
„Ka kompensar per sango?" repetis Lara. El iris en la chambro hike ed ibe ed indignis. „Me ne esas kadeto, do sen honoro. Yes, kun me on povas facar, quon on volas! Ka tu en tote komprenas, quon Komarovski ofras? Yaro pos yaro me erektis cirkum me sekura muro, e nun tu venas, ploras kelke, ed omno, quon me kreis, disfalos, yes, devas krular. Irez ad la diablo! Pro me paf-mortigez tu! Ne esas mea afero! Quala sumon tu bezonas?" „Do 690 rubel, omno kalkulite, 700 rubel", respondis Rodion pos poka momento.
„Rodion, tu esas dementa! Ka tu savas, quon tu dicas? Tu perdis ludante tala sumo! Rodion, ka tu savas quante longe ordinara homo kam me bezonas por recevar ica sumo per sincera laboro?"
Pos kurta momento el durigis per kolda, stranjera voco: „Bone, me probos mea fortuno. Venez matine. E donez a me la revolvero kun tua kartochi. Oli esos mea havajo. Ne obliviez!"
El obtenis la pekunio da Kologrivov. 7
La laboro esis por Lara nula obstaklo finar la gimnazio e studiar. Nun, en venonta yaro 1912, venus la fino. En printempo 1911 finis elua skolanino Lipa la gimnazio. El ja havis yuna spozulo, la injenioro Friesendank, qua venis ek richa familio. La gepatri aprobis, ma li konsilis Lipa vartar, pro ke altrakaze la mariajo esus tro frue. Pro ica afero eventis dramatala ceni. La kapricoza e misedukita Lipa, la favorato en la familio, kriis, ploris e pedpresis.
Nulu memorigis Lara pri la debo en la richa domo, debo, quan el portis pro Rodion.
78
Lara volis kompensar la debo ja longe, ma el havis kontinua spensaji, pri qui el ne parolis. Sen ke Pavlusha savis irgo, el sendis pekunio ad ilua patro Pavel Antipov, qua esis en puno-exilo. Ed ultre el helpis ilua maladema, disputema matro. Tandem el transprenis parto dil kusti, quin Pavlusha devis pagar por lojeyo e nutrivo.
Pavlusha, qua esis kelke plu yuna kam el, amis el til la foleso, ed obediis en omna aferi. El insistis, ke il pos la fino de la real-skolo ankore lernis latina e greka por povar studiar en la Filozofiala Fakultato. El sonjis, ke post la statala exameni, li mariajus por irar al Uralo kom instruktisti. Pavlusha en puerulo-gimnazio ed el en puerino-gimnazio.
Pavlusha lojis en chambro, quan Lara aranjabis, che kalma hosti, en nova domo en la Kamergerski-strado, ne fora de la artisto-teatro.
En somero 1911 Lara esis la lasta foyo kun la Kologrivov-familio en Duplyanka. El amis ica loko tre, plu ankore kam la posedanti. Ici savis to, ed esis nefixita lego, ke Lara povis pasar ibe elua libera tempo. Kande Lara venis ek la varmega, sordida treno ed absorbis la senfina, dolca kalmeso, la altri sendis el al domeno, dum on transportis la pakaro sur la charo. La veturisto di Duplyanka, qua portis kosako-kostumo sen maniki, raportis al somer-gasti pri la lokala novaji. Lara iris alonge la reli, olda voyo por pilgrimanti e lore trans prato aden la foresto. Hike el restis stacar, klozis la okuli, ed inhalis la aromoza aero ek la foreso. Ica aero esis plu sublima kam patro e matro, plu valora kam amorato, plu inteligenta kam libro. Por un momento el perceptis itere la senco dil vivo.
79
El perceptis, ke el vivis por komprenar la nekredebla beleso dil tero. El volis baptar ica beleso per nomo, ma se to esus tro multe por el, el volis parturar infanti, qui povis transprenar ica tasko.
En ica somero Lara esis fatigita dum elua arivo pro la konsumita labori, quin el ipsa volis. El esis facile iritebla. En Lara naskis timema desfido, quan el ne konocabis antee. Ica desfido nocis la karaktero di Lara, qua esis propre grandanma e sen pedanteso. La Kologrivov-familio ne volis el lasar irar. On amis Lara. Ma per elua autonomeso, Lara opinionis ke el esus superflua en domo. El refuzis la salario, ma on insistis. El ya bezonis anke la pekunio, e kom gasto dil domo laborar en altra loko esus nekonvenanta e nepraktikebla. Lara kredis, ke elua poziciono esus nesincera e netolerebla. El kredis, ke el esus charjo por omni, quankam on ne parolis pri to. El vidis en su ipsa anke charjo. Prefere el departus la familio, ma el havis debi, quin el ne povis kompensar instantale. Pro la stultesi da Rodion el sentis kam kaptita, ed el ne savis quale kalmigar la propra iraco.
El vidis omnaloke signi di desestimo. Se vizitanti venis al familio e montris atenco od anke neatenco, el kredis on vidus el en amba kazi kom inferiora. Ataki di hipokondrio ne impedis Lara partoprenar che la sennombra plezuri dal gasti en Duplyanka. El balnis e natis, vehis en kanoo, asistis che noktala pikniki, esis kun la altri che pirotekni e dansis. El ludis en laiko-teatro e pafis per Mauser-fusilo e la revolvero da Rodion al skopo-disko. El dicis jokante, ke lo esus neyusteso, ke el ne povis esar kombatemo o duelanto. Ma quante plue el amuzis, tante plue el sufris. El ipsa ne savis quon el volis.
80
Ica stando plufortigesis ankore kande el venis en la urbo. Poka konflikto kun Pavlusha eventis, quankam Lara evitis disputo kun lu, nam il esis elua lasta protekto. Il divenis en lasta tempo pasable kontenta pri su. Lua instruktanta vorti amuzis ed afliktis Lara samtempe.
Pavlusha, Lipa, la Kologrivov-familio, la pekunio - ica aferi iris cirkume en elua kapo. La vivo esis por el tormento. El perdis preske la raciono. El volis forkurar por komencar irg-ube kelko nova. En ica humoro el facis dum kristnasko 1911 fatala decido. El volis nedependanta e libera vivo sen la Kologrivov- familio. La pekunio por tala vivo donus Komarovski. El kredis, ke il devis suportar el pos omna ica yari en kavalierala maniero, sen irga postuli o longa klarigi, senegoista, sen desfacilesi.
Dum la 27a decembro el iris al Petrovka-strado, en mufo la revolvero di Rodion, en la intenco pafar a Komarovski se il refuzis od ofensis el. El iris en stranja konfuzo tra la festala stradi, sen ke el perceptis irgo. La intencata pafo resonis en elua anmo, la persono esis neimportanta. En elua koncio esis nur la pafo. El audis dum la tota voyo ica pafo, ed esis pafo a Komarovski, esis anke pafo a su ipsa, al propra destino, al querko en Duplyanka kun la skopo-disko en la trunko.
8
„Ne tushez la mufo", dicis Lara ad Ema Ernestovna, qua dicis nur „Ah" ed „Oh", dum el volis forprenar la mantelo di Lara. Komarovski ne esis heme. Ema Ernestovna volis prenar itere la mantelo, ma Lara dicis: „No. To urjas. Ube il esas?"
81
Ema Ernestovna dicis, ke il vizitus festo di kristonasko. Kun la adreso en la manuo Lara kuris adinfre trans la obskura eskalero e pasis la bunta blazoni sur la fenestri, qui kauzis memoro pri omno, quo eventis til nun. Lore el iris al Sventizki-familio.