Ibe konversis Pritulyev, Voronyuk, Tyagunova e Vasya. Pritulyev raportis pri la trafiko-moyeni en sua regiono, ka pede o per la kavalo. Vasya saltis de sua sido e repetis la nomi ek la regiono, quale se oli esus magio. „Do ka vu livas la treno en Sukoi Brod?" il questionis per shancelanta voco. „Certe! To esas nia staciono! E lore vu iros a Buiskoye?" „Yes, trans la rurala voyo."
„Certe, yes! Me konocas la vilajo Buiskoye. Ka vu konocas anke la rivero Pelga? Ma certe, kad ne?
231
Vu devas irar sempre alonge la rivero, lore vu atingos ni. Nia vilajo Vereteniky! Che la eskarpa rivo. Ibe on ruptas stoni ek la roki, por la muel-petri. Ed en Vereteniky esas mea matro e mea amba fratini, Alyonka ed Arishka. Mea matro aspektas kam vu, Pelageya Nilovna. El esas yuna e havas blanka pelo. Onklo Voronyuk, onklo Voronyuk, me pregas vu!" „Nu, quo? Pro quo tu babilas kam kukulo? Onklo Voronyuk! Onklo Voronyuk! Certe, me savas, ke me ne esas onklino! Quon tu volas, quon tu postulas? Ka tu volas fugar, kad ne? Dicez! Tu desaparas, e me povas dicar Amen. Li pozos me avan la muro" Pelageya Tyagunova vidis aden la foreso e tacis. El metis sua manuo sur la kapo di Vasya e ludis penseme kun la bruna hari di Vasya. Elua okuli dicis, ke esus stulteso parolar koram omni kun Voronyuk pri tala aferi. Elua okuli dicis: vartez, omno venos de ipsa, restez kalma.
13
Kande li venis pluse al esto, grelis surprizi. Li vehis tra nesekura regioni, ube rapter-bandi lojis, tra regioni, ube olim revolti existis.
La treno haltis sempre plu ofte en libera agro, kontrol- grupi venis en la treno, examenis bagajo e personala detali.
Unfoye la treno restis stacar dum la nokto. Nulu venis por vekigar la voyajanti. JIVAGO saltis ek la treno, nam il kredis, ke irga acidento eventabis. La treno stacis en libera agro, en la mezo di poka abiet- foresto.
232
La kun-voyajanti, qui livabis anke la treno, raportis a doktoro JIVAGO, ke la lokomotivisto lasis haltar la treno sub la pretexto, ke hike esus danjera regiono, e ke il devus examenar la voyo unesme per drezino. Kelka voyajanti volis subornar lu por vehar, ma vane. Nun la navani intervenus, e li havus probable suceso. Dum la voyajanti raportis, le nivo brilis en reflekto dil flami ek la kameno. On perceptis kelka nigra figuri, qui kuris sur la lokomotivo. La lokomotivisto esis inter li e duktis la grupo. La navani persekutis lu. JIVAGO e kelka voyajanti iris al lokomotivo. Sur la libera voyo avan la treno prizentis su ica ceno: La navani stacis en profunda nivo cirkum la lokomotivisto. La lokomotivisto kriis: „Me dankas, vi heroi! Kun la revolvero kontre la propra fratulo! Me esas laboristo! La treno devas haltar! Kompani voyajanti! Vi vidas, quon li facas kun me! Me sorgas ya nur por via sekureso, ka vi ne komprenas? E to esas via danko! Nu, pafez, vi heroi! Kompani voyajanti, vi esas testi! Hike me esas, sur libera agro!"
Inter la voyajanti resonis diversa voci. Kelki vokis:
„Quon tu dicas? Eventis ya nulo! Ni permisos nula
violento! Li volas nur timigar tu!"
Altri vokis: „Tu agas korekta! Tolerez nulo! Adavane,
lokomotivisto!"
Navano, redhara giganto, turnis su al voyajanti e dicis en stranjera acento: „Exkuzo, ma pro quo ica bruiso? Vi ankore maladeskos en ica koldeso! Do, irez aden la vagoni, ma rapide!" La voyajanti obediis, e la redhara navano iris al lokomotivisto e dicis: „Nula histerio, kompano lokomotivisto. Ni durigos nia veho!"
233
14
Dum la sequanta dii, la treno devis haltar sempre itere por ne ekreleskar sur la niv-kovrita reli. En tote dezerta e solitara loko haltis la treno, ed on ne povis perceptar quik ke ibe esis la ruinuro di olima staciono. Sur la fasado on povis lektar ankore la nomo Nishny Kelmes. La staciono montris signi di incendio, e la vakua senhoma vilajo dop la staciono montris la sama signi. La unesma domo karboneskis, en la duesma domo precipitabis du trabi adinterne, omnaloke sur la strado jacis ruptita glit-veturi, fenci, olda lado, ruptita utensili. Per la varmego la nivo esis parte for, parte glacieskis. La vilajo e la staciono ne esis tota vakua. Hike ed ibe on vidis kelka homi.
„Ka via tota vilajo forbrulis en fairo?" questionis
kompatante la tren-duktanto. Il stacis sur la trotuaro,
kande la stacionisto venis ek la ruinuro.
„Bona jorno. Me salutas vu. Yes, nia vilajo ne existas
pluse. Ma existas plu mala aferi"
„Me ne komprenas."
„Ne questionez."
„Ka Strelnikov?"
„Yes."
„Ka vi facis eroro?"
„Ne ni. Ne temas pri la lineo. Nia vicini. Ibe la vilajo! Nishni Kelmes. Ibe esas la kulpanti" „Quon li facis?"
„Preske omna morto-peki. Li forpulsis la komitato kontre la rurala povreso, lore li agis kontre la dekreto pri la livro da kavali por la Reda Armeo, e li ne obediis la impero pri la mobilizado. E nun videz!"
234 „Do yes, lore omno esas klara. E nun eventis artilrio-
fairo"
„Precize."
„Ka de la kuras-treno?" „Certe."
„Regretinde. Ma to ne esas nia afero."
„Ultre to nivo di hiere. E la nuna nivo esas anke nula
joyo. Vu restos probable kelka dii hike."
„Ne parolez sensencajo. Me havas en treno soldati por
la fronto. Ni ne povas stacar longe."
„Esas nula sensencajo. Videz, la reli esas kovrita per
nivo, ni havis dum un semano nivo-tempesto. E nula
laboristi por evakuar la nivo. Preske la tota vilajo esas
for. E la altra homi ne povas facar to."
„La diablo anke! Sterko! E quon ni facas nun?"
„Ni devas liberigar la reli. Lore vu povas vehar pluse."
„Kad existas multe nivo?"
„Parte. En la meza lineo. Tri kilometri. La altra parto esas libera, ibe esas Taiga. La foresto protektis la reli. Anke en libera agro esas omna vakua, la vento forbalayis singla nivo."
„Diablo, quala puniso! Me pedfrapos la treno. La voyajanti devas helpar" „Me opinionas anke."
„Nur la reda soldati e navani ni devas indulgar. Ma ni havas viri por la laboro-armeo e pasajanti, do sepa-cent viri."
„Bone. Plu kam necese. La pasajanti devas helpar. Ni bezonas ankore shoveli ek la altra vilaji." „Mea Deo. Quala pecho! Ka ni plenigos la afero?" „Certe, ni havas multa manui. Esas treno-lineo, vivo- veino. Quon vu pensas?"
235
15
La netigo dal reli duris tri dii e tri nokti. La familio JIVAGO ed anke Nyusha helpis per omna forteso. Esis por li la maxim bela tempo dum la voyajo. La regiono posedis certena nekonocata karaktero. Ol memorigis pri la deskripto da Pushkin pri la Pugatshov- revolto, e pri la aziana atributi en la raporti da Aksakov. La sekreto da ica regiono konsistis anke en la destrukto dal domi e pro la neacesebleso dal habitanti, qui evitis la kontakto kun la voyajanti pro timo de denunco. La homi devis laborar en grupi, ne omni kune. Soldati gardis la loko.
La netigo eventis che diversa loki, samtempe, avane, en la mezo e dope. La nivo apud la reli separis la singla grupi. Tandem esis la tota lineo liberigita. Esis klara frost-dii. La voyajanti iris nur dum la nokto aden la vagoni. On laboris en diversa tempi, tale ke la homi ne divenis fatigita, nam existis nur poka nombro de shoveli, ma multa laborema viri e mulieri. La laboro esis la pura plezuro.