247
JIVAGO stacis nun extere de la vagono sur la sulo. Il perceptis la uniforma, profunda e kalma tono dal kanoraro. Tale do esas, il pensis, ni atingis la fronto. Il iris kelka pazi en veho-direciono. Pos du vagoni la treno fineskis. La lokomotivo e la altra vagoni mankis. Pro to li montris hiere ica kurajo, pensis la mediko. Probable li sentis, ke li venus senfriste al fronto. Il cirkumiris la pinto dil treno por serchar la voyo al staciono. Ma subite soldato stacis koram lu kun fusilo. Il dicis: „Adube? Pas-permiso!" „Quala staciono esas to?" „Nula! E qua esas tu?"
„Me esas mediko ek Moskva. Me voyajas kun mea familio en ica treno. Hike esas mea dokumento" „Me ne povas lektar en la tenebro irga dokumenti. Me ja povas pensar quala mediko tu esas. Me pafmortigus tu volunte senfriste. Ma nun retroirez, tale longe tu esas ankore integra."
Il kredas, ke me esus altra persono, pensis Yuri JIVAGO. Diskuto esus vane. Do me iros. Il iris en la altra direciono. La tondro dop lua dorso tacis. Ibe esis la esto. On vidis en nebulo la suno. JIVAGO progresis. La pedi dil mediko sinkis plu profunda en la lejera sablo. Pos kelka pazi il restis stacar avan neklara konturo en nebulo. Il vidis bateli, qui aparis ek la nebulo. Il stacis koram la rivo di granda rivero. La ondi batis kontre la eskal-portuo. Soldato venis de la rivo e vokis: „Quon tu volas hike?" „Quala rivero esas to?" questionis la mediko. La unesma soldato aparis nun anke e parolis kun la duesma. „Pro quo ni ne pafmortigas lu instantale? O kad il irez unesme aden la vagono?"
248
„Il devas irar unesma en la vagono. La chefo devas decidar. Pasporto!" vokis la duesma soldato e recevis la dokumenti da JIVAGO.
„Gardu lu!" il vokis ad irga altra persono. Lore il iris kun la unesma soldato al staciono. Peskisto aparis subite e tusetis.
„Tu havas fortuno, ke li volas duktar tu al chefo. Forsan esas to tua salvo. Nu, li plenigas nur lia devo. Nun esas la tempo por la populo. Plu tarde venos plu bona tempi. Tu ya vidas, li eroris. Li serchas irga persono, e li kredis, ke tu esus ica persono, la deliktanto kontre la laboristo-povo. Probez atingar la chefo! La soldati esas neimportanta. Li mortigus tu nur pro kopeke. Dicez, tu volas parolar kun la kolonelo!"
La peskisto klarigis, ke la rivero havus la nomo Rynva, e la staciono Rasvilye, qua esus avan-loko di Yuryatin. En Yuryatin eventis kombati, ma nun esus en la urbo nula soldato ek blanka armeo. La pekisto raportis ankore, ke sur la relo stacus la specala treno dil milit- komisario Strelnikov, qua recevus la dokumenti dil mediko.
Pos kelka tempo aparis altra soldato por forduktar JIVAGO. Il lasis tranar la kroso sur la sulo, quale se il devis helpar ebria kamarado, qua ne povis stacar. Il duktis la mediko aden la vagono di Strelnikov.
28
La amba personi eniris vasta salono-vagono tra per ledro kovrita koridoro. Kande li eniris la vagon, la rido e la movadi cesis. La soldato duktis nun JIVAGO tra streta koridoro en la meza vagono. Ibe regnis kalmeso ed ordino, e la soldati esis bon-vestizita e neta.
249
La mediko astonesis pri la stabala quartero dil senpartisa komisario, qua divenis fama e male reputata en kurta tempo en la tota regiono. Ma probable esis hike nur lua personala quartero, poka domala kancelereyo kun ligna kampanio-lito. Pro to regnis hike kalmeso kam en la koridori di balno-kuraceyo.
En la vagono, olima restor-vagono kun tapiso, stacis kelka stuli.
„Un momento", dicis yuna oficiro, qua sidis en la proximeso dil enireyo. La oficiro forsendis la soldato per nervoza kap-movo e la soldato desaparis. La mediko povis vidar sua dokumenti de la pordo. Oli jacis sur skrib-tablo koram plu olda oficiro. Il esis militala statistikisto. Il foliumis en libri, regardis strategiala mapi e skribis. Lore il vidis al fenestro e dicis: „Esos varmega dio hodie" Sur la sulo laboris inter la tabli teknikisto, qua reparis defekta konduktilo. La yuna oficiro levis su de la stulo por ne impedar la laboro. Apud la oficiro laboris stenografistino en olda mantelo kun defekta skrib- mashino. La yuna oficiro serchis kun el la kauzo dil defekto, e tandem venis anke la plu olda oficiro al skrib- mashino ed examenis la parti.
JIVAGO restis kalma. La fakto, ke on sorgis en ica maniero pri bagateli esis bona signo. Nu yes, il pensis. E tamen, en la proximeso tondras kanoni e homi devas mortar, e hike on parolas pri varmega dio. Forsan li vidis ja tro plu multe, forsan li perdis lia sentimenti? Il vidis nun anke ek la fenestro.
250 29
La reli iris de la treno til al staciono Rasvilye. Ol jacis en la avan-urbo Rasvilye sur altajo. De la reli duktis ruda ligna eskalero al staciono.
Hike trovesis granda tombeyo por lokomotivi. Olda lokomotivi sen tendri, kun kameni en la formo di taso o gambalo, stacis en la mezo di ruptita vagoni. Ica tombeyo hike e la tombeyo en la urbo, la olda fero sur la reli e la rustoza tekti e shildi montris imajo de vakuo e neglijegeso sub la blanka cielo, qua forbrulis per la suno.
JIVAGO konocis la sennombra shildi en Moskva e la fasadi. La skribo sur la hikala shildi montris tale granda literi, ke on povis lektar oli de la treno. La nebulo desaparis. Nur ankore poka restaji kovris la sinistra latero dil cielo en la esto. Ma nun oli separis su kam kurteno en teatro.
Sur monto, qua esis plu alta kam la avan-urbo, montreskis granda urbo, probable la centro dil distrikto. La disto facis la konturi simpla. Ol aspektis kam la monto Athos od oaziso en la dezerto, domo super domo e strado super strado.
Yuryatin! pensis JIVAGO. Ana Ivanovna e flegistino Antipova parolis ofte pri Yuryatin. Nun me vidas la urbo la unesma foyo. En ica momento la oficiri vidis subite omna ek la fenestro, e la mediko facis lo sama. On arestis plura personi sur la eskalero al staciono, inter li gimnaziano kun kapo-lezo. Sub la bandajo on vidis sango. La gimnaziano inter la amba soldati posedis bela vizajo ed esis ankore tre yuna. Lua kasqueto preske falis de la kapo. La amba soldati impedis to.
251
JIVAGO volis intervenar e parolar kun la yunulo o diskutar pri extera aspekti e vera formi. Il vidis latere. En la mezo dil vagono stacis Strelnikov, qua enirabis subite la loko per rapida ed energiala pazi. JIVAGO astonesis pri tala impozanta personaleso. Pro quo la vivo ne lasis rekontrar li plu frue? JIVAGO komprenis senfriste, ke ica viro esis la perfekta volpovo. Omno semblis existar en kompleta formo, la bela kapo, la longa gambi en la alta boti, la rapida pazo e la uniformo ek griza tuko. La gesti dil viro semblis naturala e sen posturo. Il esis viro, qua povis vivar en singla situeso sur la tero. Ica viro devis posedar la talento pri imitado. En ica tempo singlu imitis irga personaleso, heroi, generali, estri ek la populo o mem la propra kamaradi. Strelnikov ne montris, ke la prezenteso di JIVAGO konfuzigis lu. Kontree, il turnis su ad omni kun mieno, quale se JIVAGO esus membro en ica kompanio. Il dicis: „Ni povis forpulsar li. Li esas rusi kam ni, ma kun fola idei en kapo. E ni devas kuracar li. Lia chefo esis mea amiko, il venis ek proletariala familio. Il facis multa kozi por me e me esas en lua debo. Tamen me esas gaya, ke me povis forpulsar lu dop la rivero. Guryan, me bezonas komuniko. Me ne povas sendar mesajero. Kad esas varmega hike, kad ne? Oh yes..." Il turnis su al mediko ed examenis lu de la kapo til la pedi. La aresto repozis sur irga idiotajo. Kad il? pensis Strelnikov. No, nula simileso. Il ridis e dicis a doktoro JIVAGO: „Pardonez, kompano. Hike esas konfundeso. Mea soldati eroris. On prenis vu por altra persono. Vu esas libera. Ube esas la dokumenti dal kompano? Ah, hike.
252
Vu permisos poka regardo en la dokumenti... JIVAGO, doktoro JIVAGO... Memorigas pri Moskva... Me pregas vu, ka vu povas akompanar me por kurta momento? Mea vagono stacas apud ica vagono. Esos nur kurta por kurta tempo."