Крестобогородичен: Нескве́рная А́гница Сло́ва, нетле́нная Де́ва Ма́ти, / на Кресте́ зря́щи пове́шена из Нея́ без боле́зни прозя́бшаго, / ма́терски подо́бно рыда́ющи, вопия́ше: / увы́ Мне́, Ча́до Мое́, ка́ко стра́ждеши во́лею, / хотя́ изба́вити от страсте́й безче́стия челове́ка?
Песнь 4
Ирмо́с: Прише́л еси́ от Де́вы не хода́тай, ни а́нгел, / но Са́м Го́споди вопло́щся, / и спа́сл еси́ всего́ мя челове́ка; / те́м зову́ ти́: / сла́ва си́ле Твое́й, Го́споди.
Припев: Свята́я великому́ченице Варва́ро, моли́ Бо́га о на́с.
Из Де́вы ро́ждься, / дарова́л еси́ отрокови́цам де́вам киче́ние низложи́ти льсти́ваго: / те́мже добропобе́дная Варва́ра сего́ горды́ни поруга́ся.
Прама́ти, хитростьми́ льсти́ваго прельсти́вшися пе́рвее, / пи́щи изгна́на бы́сть ра́йския: / Варва́ра же, сему́ поруга́вшися, / в небе́снем черто́зе ны́не водворя́ется.
Кресто́м Твои́м сме́рти си́лу разори́л еси́, / те́мже, телесе́ отрокови́ца, Христе́, не пощаде́вши, / терпи́т до́блественнейше ра́ны, Варва́ра, / тве́рдым умо́м.
Ин. Преподобнаго.
Припев: Преподо́бне о́тче Иоа́нне, моли́ Бо́га о на́с.
Повеле́нию Христо́ву повину́вся, оста́вил еси́ мiрску́ю красоту́, / бога́тство, сла́дость, све́тлость, / Его́же ра́ди, взе́м тво́й кре́ст, / после́довал еси́, Иоа́нне му́дре.
Слава: Сообнища́в обнища́вшему Христу́, челове́ческаго ра́ди спасе́ния, / спросла́вился еси́, я́коже То́й обеща́ся, / и сца́рствуеши же присноца́рствующему, Иоа́нне.
И ныне, Богородичен: Тя́, приста́нище спасе́ния и сте́ну необори́му, / Богоро́дице Влады́чице, вси́ ве́рнии ве́мы: / Ты́ бо моли́твами Твои́ми от бе́д избавля́еши ду́ши на́ша.
Катава́сия: Же́зл из ко́рене Иессе́ева / и цве́т от него́, Христе́, / от Де́вы прозя́бл еси́, / из горы́, Хва́льный, приосене́нныя ча́щи, / прише́л еси́, вопло́щся / от Неискусому́жныя, Невеще́ственный и Бо́же: / сла́ва си́ле Твое́й, Го́споди.
Песнь 5
Ирмо́с: Хода́тай Бо́гу и челове́ком бы́л еси́, Христе́ Бо́же: / Тобо́ю бо Влады́ко, к светонача́льнику Отцу́ Твоему́, / от но́щи неве́дения, / приведе́ние и́мамы.
Припев: Свята́я великому́ченице Варва́ро, моли́ Бо́га о на́с.
Око́нцы треми́ ба́ни просвеща́тися повеле́вши, / та́инственно написа́ла еси́ креще́ние, Варва́ро, / Тро́ичным све́том души́ светоно́сное су́щее очище́ние.
Су́щаго Бо́га разже́гшися ре́вностию, / лжеиме́нных бого́в скверна́вая оплева́ ли́ца, Варва́ра всехва́льная, / руга́ющися отрокови́ца вне́шнему міроде́ржцу.
Неи́стовства лю́таго о́тча укло́ншуюся Варва́ру, / разсту́пльшися, а́бие гора́ прия́т, / я́коже дре́вле приснопа́мятную первому́ченицу Фе́клу, / Христу́ чудоде́йствовавшу.
Ин. Преподобнаго.
Припев: Преподо́бне о́тче Иоа́нне, моли́ Бо́га о на́с.
Стра́хом Христо́вым, о́тче, утвержда́емь к Боже́ственней жи́зни, / плотско́е мудрова́ние все́ покори́л еси́ ду́ху, / твоя́, Иоа́нне, чу́вства очища́я.
Слава: Очи́стив вся́кия скве́рны те́ло, / и у́м, и ду́шу тща́ливо, [50] Богому́дре, / зарю́ прия́л еси́ трисо́лнечную, Иоа́нне, / све́тлыми тя́ богатя́щую дарова́нии.
И ныне, Богородичен: Моли́ Твоего́ Сы́на и Го́спода, Де́во Чи́стая, / плене́нным избавле́ние от проти́внаго обстоя́ния, / на Тя́ наде́ющимся, ми́рное дарова́ти.
Катава́сия: Бо́г сы́й ми́ра, Оте́ц щедро́т, / Вели́каго сове́та Твоего́ А́нгела, / ми́р подава́юща, посла́л еси́ на́м: / те́м, богоразу́мия к све́ту наста́вльшеся, / от но́щи у́тренююще, / славосло́вим Тя́, Человеколю́бче.
Песнь 6
Ирмо́с: Во глубине́ грехо́вней содержи́мь е́смь, Спа́се, / и в пучи́не жите́йстей обурева́емь, / но, я́коже Ио́ну от зве́ря, / и мене́ от страсте́й возведи́ и спаси́ мя.
Припев: Свята́я великому́ченице Варва́ро, моли́ Бо́га о на́с.
Я́коже обеща́лся еси́ му́дрость дарова́ти, Спа́се, Богонауче́ну, / Тебе́ ра́ди стоя́щим пред суди́щем мучи́телей, / ея́же му́ченица Варва́ра испо́лнися.