Земны́я пи́щи наслажде́ние презре́вши / и о́тчее бога́тство, / ку́пно же и сла́ву возненави́девши, / Небе́снаго Жениха́ возлюби́ла еси́, / Варва́ро всесла́вная; / мече́м бо во главу́ отсе́кшися, / с му́дрыми вошла́ еси́ де́вами к Жениху́ Христу́. / Те́мже и губи́тельный неду́г отгоня́ющи, / ве́рныя врачу́еши де́йством Свята́го Ду́ха, / и мо́лишися непреста́нно о душа́х на́ших.
Глас 2. Византиево: Посрами́ся лука́вый вра́г, / от жены́ побежде́н, / я́ко прама́терь имя́ше де́йство ко греху́: / от Де́вы бо вопло́щшееся Сло́во Отчее / непрело́жно [51] и несме́сно, [52] / я́ко ве́сть Еди́н Са́м, / кля́тву разруши́ Éвину и Ада́мову Христо́с, / венча́вый досто́йно Варва́ру му́ченицу, / и тоя́ ра́ди да́руя мíру очище́ние / и ве́лию ми́лость.
Богозва́нная му́ченица Варва́ра, / на суди́щи стра́ждущи, глаго́лаше: / лю́ты у́бо ны́нешния му́ки, о мучи́телие, / но ра́достно ве́чныя жи́зни восприя́тие; / не предпочту́ же отню́д земны́х па́че небе́сных. / Сего́ ра́ди сецы́те, / стружи́те пло́ти и огню́ преда́йте мя́, / ра́дующися, отыду́ к Жениху́ моему́ Христу́. / Ея́же моли́твами, Христе́ Бо́же, / ми́лости Твоя́ низпосли́ / и спаси́ ны, тоя́ страда́ния соверша́ющия ве́рно.
Торжество́ дне́сь страстоте́рпицы Варва́ры, / прииди́те, лю́дие, воспои́м: / тоя́ бо ниже́ ме́чь, ниже́ о́гнь, ниже́ ина́я му́ка, / ниже́ многоплете́нная велиа́ра ловле́ния победи́ша. / И к не́й ве́рою возопие́м: / Христа́ моли́, доброму́ченице всесла́вная, / дарова́ти на́м ве́лию ми́лость.
Слава, глас 6, Иоанна монаха: Страда́льческим ше́ствовавши путе́м, / прароди́тельнаго избежа́ла еси́ сове́та, Варва́ро всечестна́я, / и я́ко у́бо де́ва мудра́, свещу́ нося́щи, / вошла́ еси́ во дворы́ Го́спода твоего́, / и я́ко му́ченица му́жественна, / благода́ть прия́ла еси́ цели́ти плотски́я стра́сти. / Но и на́с, воспева́ющих тя́, / душе́вных боле́зней изба́ви, / к Бо́гу моли́твами твои́ми.
И ныне, Богородичен: Никто́же, притека́яй к Тебе́, / посра́млен от Тебе́ исхо́дит, Пречи́стая Богоро́дице Де́во, / но про́сит благода́ти / и прие́млет дарова́ние к поле́зному проше́нию.
Или Крестобогородичен: Всечи́стая, я́ко ви́де Тебе́, на Кресте́ пове́шена, / пла́чущи, вопия́ше ма́терски: / Сы́не Мо́й и Бо́же Мо́й, / сладча́йшее Мое́ Ча́до, / ка́ко терпи́ши стра́сть поно́сную?
На стиховне октоиха.
Слава, преподобнаго, глас 8: Мона́хов мно́жества / наста́вника тя́ почита́ем, о́тче на́ш Иоа́нне. / Твое́ю бо стезе́ю вои́стинну пра́во ходи́ти позна́хом. / Блаже́н еси́, Христу́ рабо́тав, / и вра́жию обличи́л еси́ си́лу, / а́нгелов собесе́дниче, преподо́бных соприча́стниче и пра́ведных; / с ни́миже моли́ся Го́сподеви / поми́ловатися душа́м на́шим.
И ныне, Богородичен или Крестобогородичен. Подобен: О, преславнаго чудесе:
Не терплю́, Ча́до, ви́дящи Тя́, на дре́ве усну́вша, / бо́дрость все́м подаю́щаго, / я́ко да и́же дре́вле преступле́ния плодо́м / сно́м поги́бельным усну́вшим, / Боже́ственную и спаси́тельную бо́дрость пода́си, / Де́ва глаго́лаше, пла́чущи, Ю́же велича́ем.
Славословие великое.
Tропарь святыя, глас 8:
Варва́ру святу́ю почти́м: / вра́жия бо се́ти сокруши́, / и я́ко пти́ца, изба́вися от ни́х / по́мощию и ору́жием Креста́, всечестна́я.
Тропарь преподобнаго, глас 8:
Правосла́вия наста́вниче, / благоче́стия учи́телю и чистоты́, / вселе́нныя свети́льниче, / мона́шествующих богодохнове́нное удобре́ние, Иоа́нне прему́дре, / уче́ньми твои́ми вся́ просвети́л еси́, цевни́це духо́вная, / моли́ Христа́ Бо́га спасти́ся душа́м на́шим.
Ектении и отпуст.
На литургии
Блаженна от канона мученицы, песнь 3-я, и преподобнаго песнь 6-я.
Tропарь святыя, глас 8:
Варва́ру святу́ю почти́м: / вра́жия бо се́ти сокруши́, / и я́ко пти́ца, изба́вися от ни́х / по́мощию и ору́жием Креста́, всечестна́я.
Кондак святыя, глас 4. Подобен: Вознесыйся на Крест:
В Тро́ице благоче́стно пева́емому, / после́довавши Бо́гу, страстоте́рпице, / и́дольская притупи́ла еси́ чти́лища; / посреде́ же по́двига страда́льчествующи, Варва́ро, / мучи́телей преще́ния не устраши́лася еси́, мужему́дренная, / велегла́сно пою́щи при́сно: / Тро́ицу чту́, еди́но Божество́.