«МОЯ ЖИЗНЬ ВО ХРИСТЕ, ЕМУ ЖЕ ПОЮ ВО ВСЯ ВЕКИ».
Архимандрит Иоанн. 1938 г. Владимирский год — 950-летие Крещения Руси.
Служба Святаго и преподобнаго отца нашего ИОАННА КРОНШТАДТСКАГО
Вечер. Блажен муж.
На Господи воззвах: стихиры, глас 1-й:
Отче Иоанне преблаженне, всех святых подражатель был еси: святую веру патриархов стяжав, пророков и апостолов ревность, святителей же преподобие и Богомыслие, исповедников дерзновение, безсребренников безмездную помощь, преподобных подвижников непрестанную молитву, сего ради святую твою память светлую празднуем.
Преподобие отче Иоанне, глас Евангелия Господня послушав и богатство и славу, яко прах, вменив, ближних твоих, яко отец истинный возлюбил еси, нищыя и убогия питавый, всем же непрестанно вопия: возлюбите Господа и обрящете жизнь вечную, ничто же предпочтите паче любве Его, да егда приидет во славе, обрящете радость со святыми, с ними же и нас поминай, молитвенниче наш неусыпный.
Отче наш Иоанне богомудре, страхом утвердився Божиим, начало премудрости разумел еси, паки же страх любовию изгнал еси, яко страх муку имать, якоже Апостол любве научил есть нас, любовию же Христу сраспявся, свойственнейший Ему быв; темже, отче наш, верных украшал еси разумы и Бога любити стадо твое научил еси. Христа Бога моли даровати и нам благодать сию и велию милость.
Господь сила сердца моего, Господь мой свет ума моего, Господь покой мой и радость моя, моя вера, надежда и любовь, сей есть пища моя и питие мое, одежда моя и покров. Вразуми убо и нас, отче святый, сия словеса твоя разумети и во Господе полагати спасение наше, подаждь и нам духа твоего, якоже Илия Елисею, да будет во Господе надежда наша, все упование наше.
Слава, глас 8-й:
Жива будет душа моя, Господи, и восхвалит Тя, сице глагола Давид пророк. Такожде и ты, святе, от стражи утренния до нощи пел еси. Научи убо и нас, заблудшее твое стадо, познати тя, пастыря добраго, и вслед гласа твоего ходити и непрестанно купно с тобою взывати: пою Богу моему, дондеже есмь.
И ныне: предпразднству593 или Богородичен Чтения 3 из Притчей, из общей Минеи Стихиры на литии — храму: на Слава, глас 1-й:
Молящеся Духом Святым молимся, сего ради вся молитвы церковныя дыхание Духа Святаго суть и вси христиане рождение Его есмы. Прииди убо и вселися в ны, Душе Святый, помилуй и созижди вся ны, да будем вси едино Тело Христово. Такова бысть непрестанная молитва твоя, предивный Иоанне, отче наш, и послуша тя Бог и помаза тя елеем радости вечныя.
И ныне: предпразднству или Богородичен На стиховне, стихиры, глас 4-й:
От пелен Господу присвоился еси, издетска смысл мужа совершенна стяжав и премудросте Божией возжелев, весь Божия обитель был еси, отче наш Иоанне благодатне.
Честна пред Господом смерть преподобных Его.
Умом благодатию освященным Святей Троице предстоя, блаженне Иоанне, отче наш, небесными зарями сущия во тьме греховней просвещал еси, освети и нас светом твоего Боговедения.
Блажен муж, бояйся Господа, в заповедех Его восхощет зело.
Непостижимый свет почи в тебе, преподобие отче, и свещу пресветлу постави тя Господь среди тьмы греховныя. Темже и мы тобою научени благодатную память твою поем, Иоанне.
Слава, глас 6-й:
Союзом любве апостолы Твоя связавый, Господи, и отца нашего Иоанна, яко новаго благовестника любве Твоея поставивый, утверди и ныне, Спасителю наш, союз любве церковныя, да совокуплени поем Тя и неизреченную Твою благость.
И ныне: предпразднству или Богородичен
Тропарь: «Боже отец наших»
или «В тебе, отче, известно спасеся еже по образу» и пр.,
или глас 8-й:
Любовию Христовою уязвися, преподобие Иоанне, многи чада церковныя, яко отец ко Христу привел еси, сего ради память твою совершающе, Спасово утешение приемлем и благодать Его исповедуем.
На утрени, по 1-м стихословии седален, глас 4-й:
Не презрел еси, отче Иоанне, ни странна, ни пришельца, но всем был еси благ и милости глубина, сирот отец и вдовам защита, нагих одеяние и алчущих пища. Помяни и нас, убогих чад твоих, и не отрини от благодатныя любве твоея.