1. Сотворшаго небо и землю, море и вся, яже в них.
2. Хранящаго истину в век, творящаго суд обидимым, дающаго пищу алчущим.
1. Господь решит окованныя, Господь умудряет слепцы.
2. Господь возводит низверженныя, Господь любит праведники.
1. Господь хранит пришельцы, сира и вдову приимет, и путь грешных погубит.
2. Воцарится Господь во век, Бог твой, Сионе, в род и род. И ныне и присно и во веки веков. Аминь.
Единородный Сыне и Слове Божий, Безсмертен Сый, и изволивый спасения нашего ради воплотитися от Святыя Богородицы и Приснодевы Марии, непреложно вочеловечивыйся; распныйся же, Христе Боже, смертию смерть поправый, един Сый Святыя Троицы, спрославляемый Отцу и Святому Духу, спаси нас.
Диакон: Паки и паки миром Господу помолимся.
Хор: Господи, помилуй.
Диакон: Заступи, спаси, помилуй и сохрани нас, Боже, Твоею благодатию.
Хор: Господи, помилуй.
Диакон: Пресвятую, Пречистую, Преблагословенную, Славную Владычицу нашу Богородицу и Приснодеву Марию, со всеми святыми помянувше, сами себе, и друг друга, и весь живот наш Христу Богу предадим.
Хор: Тебе, Господи.
Иерей: Яко Твоя держава, и Твое есть Царство, и сила, и слава, Отца и Сына и Святаго Духа, ныне и присно и во веки веков.
Хор: Аминь.
«Блаженны» положено петь с тропарями, назначенными в этот день церковным Уставом: особыми тропарями на «Блаженных», или тропарями из песней утреннего канон празднику или святому.
1. Во Царствии Твоем помяни нас, Господи, егда приидеши во Царствии Твоем. На 12
1. Блажени нищий духом, яко тех есть Царство Небесное.
2. Блажени плачущии, яко тии утешатся. На 10
1. Блажени кротции, яко тии наследят землю.
2. Блажени алчущии и жаждущии правды, яко тии насытятся. На 8
1. Блажени милостивии, яко тии помиловани будут.
2. Блажени чистии сердцем, яко тии Бога узрят. На 6
1. Блажени миротворцы, яко тии сынове Божии нарекутся.
2. Блажени изгнани правды ради, яко тех есть Царство Небесное. На 4
1. Блажени есте, егда поносят вам, и изженут, и рекут всяк зол глагол на вы, лжуще Мене ради.
2. Радуйтеся и веселитеся, яко мзда ваша многа на небесех.
Слава Отцу и Сыну и Святому Духу.
И ныне и присно и во веки веков. Аминь.
1. Благо есть исповедатися Господеви. Молитвами Богородицы, Спасе, спаси нас.
2. Благо есть исповедатися Господеви, и пети имени Твоему, Вышний. Молитвами Богородицы, Спасе, спаси нас.
1. Возвещати заутра милость Твою, и истину Твою на всяку нощь. Молитвами Богородицы, Спасе, спаси нас.
2. Яко прав Господь Бог наш, и несть неправды в Нем. Молитвами Богородицы, Спасе, спаси нас.
1. Слава Отцу и Сыну и Святому Духу: Молитвами Богородицы, Спасе, спаси нас.
2. И ныне и присно и во веки веков. Амин. Молитвами Богородицы, Спасе, спаси нас.
1. Господь воцарися, в лепоту облечеся. Молитвами святых Твоих, Спасе, спаси нас.
2. Господь воцарися, в лепоту облечеся,/ облечеся Господь в силу, и препоясася. Молитвами святых Твоих, Спасе, спаси нас.
1. Ибо утверди вселенную, яже не подвижится. Молитвами святых Твоих, Спасе, спаси нас.
2. Свидения Твоя уверишася зело: дому Твоему подобает святыня, Господи, в долготу дний. Молитвами святых Твоих, Спасе, спаси нас. Слава, и ныне:
Единородный Сыне и Слове Божий, Безсмертен Сый, и изволивый спасения нашего ради воплотитися от Святыя Богородицы и Приснодевы Марии, непреложно вочеловечивыйся; распныйся же, Христе Боже, смертию смерть поправый, един Сый Святыя Троицы, спрославляемый Отцу и Святому Духу, спаси нас.
1. Приидите возрадуемся Господеви, воскликнем Богу Спасителю нашему. Спаси ны, Сыне Божий, во святых дивен сый, поющия Ти: аллилуиа.
2. Предварим лице Его во исповедании, и во псалмех воскликнем Ему: Спаси ны, Сыне Божий, во святых дивен сый, поющия Ти: аллилуиа.
1. Яко Бог Велий Господь, и Царь Велий по всей земли. Спаси ны, Сыне Божий, во святых дивен сый, поющия Ти: аллилуиа.
2. Яко в руце Его вси концы земли, и высоты гор Того суть. Спаси ны, Сыне Божий, во святых дивен сый, поющия Ти: аллилуиа.
1. Яко Того есть море, и Той сотвори е, и сушу руце Его создаете. Спаси ны, Сыне Божий, во святых дивен сый, поющия Ти: аллилуиа.