Кана́ о свэ́то мрэ бутя́ пхаги́рла,
Хаськи́рна бибахтя́ ман локхорэ́с,
Мэк тыро васт буты́р на дужаки́рла.
Коли́ пхэрдо́ дукха́са мро ило́,
Ту на́ мар дро думо́ ман, камлыпэ́н,
Сыр ячявэ́л э рат брышы́нд кало́,
Соб тэ кэрэ́л пал ма́ндэ жужыпэ́н.
Чюрдэ́са ман, нэ на палатуны́,
Коли́ киркипэна́ выпьена зор,
Ту чюрдэ ман екха́тыр, хоханы́,
Соб мэ екха́тыр ґалыём да хор:
Да киркипэ́н на зоралэ́с баро́,
Коли́ б тэ на́ ачявпэ битыро́.
Сонэто 091
Кон сы пхурэ́ папэ́ндыр пхутькирдо́,
Годя́тыр — екх, ловэ́ндыр — сы вави́р,
Кон — пирэ и́дя, мэк ёв паш-джидо́,
Пирэ джюклэ́ндэ, грэ́ндэ, сыр шуки́р.
Кэ пэ́скиро сы ка́жно припхандло́
Машки́р сарэ́ кучипэна́ саекх;
Пал ма́ндэ адава́ на сы пхэндло́,
Илэ́са мэ сом отдымэ́ ко екх:
Тро камлыпэ́н сарэ́стыр кучеды́р, –
Со па́пы? Со годы́? Ловэ́ додэ́!
Грая́ тэ и́дя — ма́нгэ тыкнэды́р
Сы тутыр, мэк сы бутэды́р шардэ́.
Закэ́дэ ма́ндыр ту саро́ тыро́,
Нэ со́са ж мэ ачя́впэ, чёроро́?
Сонэто 092
Сыр ту чёрэ́са ма́ндыр тут аври́,
Екха́тыр лэ́са джиибэ́н миро́:
На дурэды́р дрэ ма́ндэ рикири́,
Жыка́й дживэ́ла камлыпэ́н тыро́.
На трэ́би тэ дара́в: чёра́, дукха́
Сыр дорэсэ́на ман бибахталэ́с?
Джива́в, жыка́й дыкха́в тырэ́ якха́,
Дрэ ма́ндэ раинэ́са, сыр камэ́с.
Ту ман чюрдэ́са? Со мэ тэ кэра́в:
Мро джиибэ́н про тхав ту рикирэ́с,
Э бахт йэ хась екха́тыр мэ латха́в:
Кама́м тут — и мэра́ва бахталэ́с.
Нанэ́ бахт бидара́кири — илэ́са
Мэ на джино́м: ту ман на хохавэ́са?
Сонэто 093
Сыр тэ джива́в, коли́ ту парудя́н?[62]
Тэ хав хохаибэ́н? Куч сыкавэ́са
Якхэ́нца камлыпэ́н, нэ вави́р сан:
Дыкхи́ прэ ма́ндэ, кэ вави́р — илэ́са!
Тырэ́ якха́ про бал[63] на парудэ́,
Одо́й мэ на латхав вави́р патри́н:
Сыр бы якха́ э ладж на гарадэ́,
Ёнэ́ чивэ́н — на киркипэ́н, ягви́н.
О болыбэ́н адя́кэ тут скэрдя́:
Саекх про муй дживэ́ла гудлыпэ́н;
Тыри́ годы́ кирнэ́с ман хоходя́,
Нэ камлыпна́са трэ якха́ дыкхэ́н.
Пхаба́й дыя́ Ева́кэ — гожыпэ́н,
Катхы́р джювля́тэ сы начячипэ́н?
Сонэто 094
Яви́ холы́, ёнэ́ ла пририки́рна,
На сыкавэ́на зор дро пхэрдыпэ́н;
Сыр о бара́, ваврэ́н жэ крэнцаки́рна,
Тэрдэ́ про штэ́то дро шылалыпэ́н.
Бахт болыбна́стыр дорэсэ́н ёнэ́,
Пхувья́тыр лэ́нгэ — барвалыпэна́;
Савэ́ муя́ прэ лэ́ндэ райканэ́:
Сарэ́ рики́рна откэрдэ́ кана́.
Сы лынаи́тко цвэ́то ваш лына́й,
Ваш пэ́скэ со́? Ёв сы́го зашутёла.
Нэ сыр кирмо́ ячья́ лэ́скро хула́й, –
Чяр дылыны́ шукарэды́р дыксёла.
Яви́ шука́р, кон кэ́рла мэлалэ́с,
Сыр ли́лия — кхандэ́ла нажужэ́с.
Сонэто 095
Сыр го́жэс ту э ладж гудлякирэ́са,
Сави́ сыр о кирмо́ дрэ лулуди́,
Э мэл про тро цвэты́тко лав анэ́са! –
Сы гожыпэ́н — авря́л, э дош — дро ди́.
Чиба́, савэ́ пал тутэ тхув кхувэ́ла,
Шутлы́ додэ́на пэ́стыр дро кана́,
Тут, на́ками, пир арманя́ шарэ́на,
Буты́р шуки́р цвэты́тко лав кана́!
Сави́ куч фэлати́н ту выкэдэ́са
Вашэ́ доша́? — Хачёл сыр лачё бар!
Трэ гожыпна́са лэн учякирэ́са,
Вашэ якха́ кэрэ́нпэ куч-шука́р.
Тро гожыпэ́н зор адая́ рики́рла:
Нэ зоралы́ чюри́ — о бар пхаги́рла.
Сонэто 096
Екхэ́нгэ — дош, хай, сан тэрны́, локхи́;
Ваврэ́нгэ — куч, хай сан, локхи́, тэрны́;
Тырэ́ доша́ — гудлэ́, миштэ́с дыкхи́,
Тро гудлыпэ́н сы дош, мри шукарны.
Сы таґарня́тэ про ангушт о бар,
Мэк на́куч, нэ сарэ́ чячес шарэ́на:
Коли́ доша́ — тырэ́, ёнэ́ — шука́р,
О чячюнэ́ кучипэна́ ячена.
Бут бакрорэ́н о рув бы ухтылдя́,
Чюви́ прэ пэ́стэ цы́па[64] бакраны́;
Сыр бут якхэ́н годя́тыр злыджия́н,
Коли́ б зор сыкадя́н, тукэ дыны́.
На́ кэр адя́кэ: тут ками́, тыри́
Сы мири сла́ва, я́в жэ лачёри́.
Сонэто 097
Сыр зы́ма сыс дрэ ма́ндэ битыро́,
Праста́лас бэрш, сыр цы́по прэ якха́,
Сыс ма́нгэ шылало́; хай, короро́;
О дэ́што чён нанго́ — дэя́ дукха́.
Адя́кэ битыро́ гэя́ лына́й,
Ёв ачядя́ барьякирдо́ баро́,
Сыр э пхивлы́, коли́ мэя́ хула́й,
О пэр пхэрдо́ лыджя́л дрэва́н пхаро́.