Сыр жэ мэ тутыр пхурэды́р ява́ва?
Нэ, яв, камлы́, по-ковлэды́р ту пэ́са,
Ту дыкх фэды́р палэ́ миро́ ило́,
Мэ рикира́в тыро́, мишто́ дыкхэ́са,
Сыр роднона́ да — чяворо́ камло́.
На да́ва, на́ манг, мэ ило́ тыро́
Палэ́, коли́ риски́рла мро́ пхуро́.
Сонэто 023
Сыр о актёро дылыно́ дрэ дар
Прэ сцэ́на выпэрэ́ла патриня́тыр,
Сыр холямо́ — хачёла сыр ванга́р
Тэ нашавэ́ла э годы холя́тыр.
Адя́кэ ж мэ дара́ва: паруды́!
Забистырдём татэ́ лава́ хула́скрэ,
Ґалёв, э зор илэ́стыр нашады́,
Киркипэна́ ман ха́на камлыпна́скрэ.
Мэк мрэ лыла́ годя́са ракирэ́на,
Со про ило́, ёнэ́ сы чибалэ́;
Соб ту тэ плэскирэ́с, ёнэ́ пхэнэ́на, –
На чиб мири́, ада лава́ чиндлэ́.
Дыкх прэ лава́: ило́ лэн бичявэ́ла,
Коли́ камэ́с, тыро́ ило́ шунэ́ла.
Сонэто 024
Мри якх кэрдя́ тыри́ шука́р патри́н,
Да лыл гарадыя́ ило́ миро́;
Мро ма́с кана́ ваш тукэ ра́мка[30] сын,
Э перспекти́ва сы мро грасторо́.
Сыр пиро ва́ст, дыкхэ́с мири́ годы́,
Кай сы кана́ патри́н три чячюны́,
Дрэ ба́ндза[31] мрэ илэ́скри гарады́,
Тырэ́ якхэ́нца о́кна[32] хачины́.
Джинэ́с, якха́ бут кэ́рна ваш якха́:
Мирэ́ — тыри́ патри́н шука́р, пирда́л
Тырэ́ якха́ миро́ ило́ дыкха́в,
И тут дрэ лэ́стэ, го́жо, почёрья́л.
На́бут джинэ́н якха́ мрэ хоханэ́:
Ту — сыкады, тыро́ ило́ — нанэ́.
Сонэто 025
Конэ́стэ черґэня́ сы бахталэ́,
Паты́в сы лэ́ндэ, куч прокхарибэ́н;
Ман тыкнэды́р черґэнорья́ латхлэ́,
Паладава́ камэ́л ман камлыпэ́н.
Учес газдёл Шэро́ тэл патыва́,
Нэ таґари́тко камлыпэ́н проджя́ла;
Сыр о кхами́тко цвэ́то дрэ ясва́
Хула́с, змэки́ шэро́, ёв пролыджя́ла.
Шэл выкхэлдя́ Вави́р мэрибэна́,
Нэ сыр пал би́бахт екх сы нашадо́,
Тэ угэнэ́ слава́кирэ лына́,
Тэ ёв пхуро́ мэя́ забистэрдо́.
Сом бахтало́, камло́ мрэ камлыпна́са,
Амэ́ екх биваврэ́скро на джива́са.
Сонэто 026
Кэ Ту, мрэ камлыпна́скиро хула́й,
Трэ патыва́са сом мэ припхандло́;
Кэ Ту лыл бичядём, латхэ́са кай
На мри годы́, миро́ ило́ вчиндло́.
Буты́ — бари́, годы мри — чёрори́,
Пхарэ́с тэ дорэса́в лава́ чячес,
Нэ мэ патя́в, со дрэ годы́ тыри́
Ёнэ́ ячена уридэ́ лачес.
Ґалёв, мрэ черґэня́ лыджя́на ман
Кэ бахт лачи́ тэ кэ паты́в бари́;
Соб мэ патывалэ́с, со мо́л ту сан,
Пхэндём: «Кама́м тут!» — пэ́стыр на́ дари́.
Жыка́й дара́в тукэ тэ сыкава́в
Мро камлыпэ́н, шэро́ дур гарава́в.
Сонэто 027
Дрэва́н кхино́, мэра́ва тэ сова́в,
Соб тэ латха́в масэ́скэ зор нэви́,
Нэ, закэри́ якха́, вса дром кэра́в
Дро мро шэро́, мро мас тэлэ́ чюви́.
Мрэ думы джян, катхы́р мэ рисиём,
Кхарэ́н ман, соб тэ джяв мэ кокоро́;
Паладава́ якха́ мэ откэрдём,
Дыкхи́ дрэ рат калы́, сыр короро́.
Мэ, рикири́ илэ́са три патри́н,
Дыкха́в якхэ́нца, сыр пирда́л о пхар:
Хачёса ту раты́, сыр э мути́н,[33]
Тэ ма́нгэ рат пхури́ дыксёл шука́р.
На дэ́ла ми́ро,[34] — туса рикирдо́
Ило́: саекх дро дром тэ джянгадо́.
Сонэто 028
Нисы́р о ми́ро тэ латха́в нашты́,
Коли́ кхино́ ратенца на сова́ва.
Сыр дывэсэ́ — бутя́, тэ со раты́?
Сыр дывэсэ́: дрэ туга хасёва́ва.
Марэ́нпэ екх ваврэ́са рат-дывэ́с,
Нэ ман ёнэ́ доха́на кхэтанэ́,
Бутя́са — ёв, туга́са — ёй. Пхарэ́с
Кэра́в буты́, нэ дром кэ ту нанэ́.
Пхэндём: «Дывэ́с, ту сан жужо́, сыр ёй»,
Коли́ о кхам тучендыр на дыкха́вас».
Ратя́кэ кало́ муй шардём, одо́й
Сыс черґэня́ — сыр ту, мэ совлаха́вас.
Нэ вса буты́р сы дывэсэ́ бутя́,
Зоралэды́р туга́са хан ратя́.
Сонэто 029
Коли́ о свэ́то, би́бахт ман традэ́на,
Прэ судьба[35] киркорэ́ чива́в ясва́,
Тэ арманя́ мирэ́ вушта́ чюрдэ́на
Ко свэ́нто болыбэ́н паладава́.
Камьём бахталэды́р мэ тэ ява́в:
Совнакунэ́ пора́, барэ́ рая́…
Ґалёв, паладава́ саро́ манга́в,
Сыр бахт на ґалёва́ва адая́.
Коли́ оди́ дрэ туга тасады́,
Мэ рипира́ва, со ту ма́нца сан,
Оди́ бага́ла э гилы́ шарды́,
Урня́ла глос, о кхам шунэ́ла ман.
Тро гудлыпэ́н, камлы, сыр зрипира́ва,
Э таґари́са бахт на спарува́ва.